Xəbərlər
Azərbaycan-Türkmənistan münasibətləri yeni mərhələdə
Gündüz Bayramov
YAP Samux rayon təşkilatının sədri
2026-cı il iyunun 22-də Türkmənistan Prezidenti Sərdar Berdiməhəmmədov Azərbaycana dövlət səfəri edib. Səfər çərçivəsində Azərbaycan Prezidenti İlham Əliyev ilə keçirilən görüşlər və mətbuata verilən bəyanatlar bir daha göstərdi ki, Azərbaycan-Türkmənistan münasibətləri strateji tərəfdaşlıq səviyyəsinə yüksələrək yeni inkişaf mərhələsinə qədəm qoyub.
Prezident İlham Əliyev mətbuata bəyanatında vurğulayıb ki, aparılan həm təkbətək, həm də geniş tərkibdə danışıqlar zamanı ikitərəfli əməkdaşlığın bütün vacib istiqamətləri ətrafında ətraflı fikir mübadiləsi aparılıb, gələcək əməkdaşlığın prioritetləri müəyyənləşdirilib. Dövlət başçısı qeyd edib ki, Azərbaycan və Türkmənistan xalqlarını ortaq tarixi köklər, dil, mədəniyyət və mənəvi dəyərlər birləşdirir. Bu amillər ölkələrimiz arasında münasibətlərin daha da möhkəmlənməsi üçün etibarlı zəmin yaradır.
Bəyanatda iqtisadi əməkdaşlığın genişləndirilməsi xüsusi yer tutub. Prezident İlham Əliyev enerji, nəqliyyat, logistika və ticarət sahələrində qarşılıqlı fəaliyyətin böyük perspektivlərə malik olduğunu bildirib. Xəzər dənizi vasitəsilə həyata keçirilən yükdaşımaların həcminin artması, Şərq-Qərb və Orta Dəhliz marşrutlarının inkişafı fonunda Azərbaycan və Türkmənistanın əməkdaşlığı regionun geoiqtisadi əhəmiyyətini daha da artırır.
Dövlət başçısı çıxışında nəqliyyat sahəsini qarşılıqlı fəaliyyətin əsas istiqamətlərindən biri kimi qiymətləndirib. Azərbaycanın yaratdığı müasir nəqliyyat infrastrukturu, beynəlxalq limanlar və logistika imkanları Türkmənistan üçün də geniş əməkdaşlıq perspektivləri açır. Bu baxımdan iki ölkə arasında koordinasiyanın gücləndirilməsi həm region dövlətləri, həm də Avrasiya məkanında iqtisadi əlaqələrin inkişafına mühüm töhfə verəcəkdir.
Prezident İlham Əliyev vurğulayıb ki, Azərbaycan və Türkmənistan beynəlxalq təşkilatlar çərçivəsində də bir-birini daim dəstəkləyir. Xüsusilə BMT və digər beynəlxalq platformalarda nümayiş etdirilən qarşılıqlı dəstək iki qardaş ölkənin strateji maraqlarının üst-üstə düşdüyünü göstərir. Bu əməkdaşlıq regional sabitliyin və təhlükəsizliyin möhkəmləndirilməsinə də xidmət edir.
Mətbuata bəyanat zamanı Prezident İlham Əliyev humanitar sahədə əməkdaşlığın da önəmini qeyd edib. Təhsil, elm, mədəniyyət, idman və digər istiqamətlərdə həyata keçirilən layihələr xalqlar arasında dostluq və qardaşlıq əlaqələrinin daha da möhkəmlənməsinə xidmət edir. Azərbaycan və Türkmənistanın ortaq mədəni irsi bu sahədə əməkdaşlığın inkişafı üçün geniş imkanlar yaradır.
Türkmənistan Prezidenti Sərdar Berdiməhəmmədov da öz növbəsində bəyan edib ki, Azərbaycanla əməkdaşlığın genişləndirilməsi Türkmənistanın xarici siyasətində mühüm yer tutur. O, iki ölkə arasındakı münasibətlərin uzunmüddətli maraqlara cavab verdiyini və bütün əsas istiqamətlər üzrə inkişaf etdiriləcəyini vurğulayıb.
Ümumilikdə, Türkmənistan Prezidentinin Azərbaycana dövlət səfəri və Prezident İlham Əliyevin mətbuata verdiyi bəyanat Azərbaycan-Türkmənistan münasibətlərinin yüksələn xətt üzrə inkişaf etdiyini bir daha nümayiş etdirdi. Bu səfər iki qardaş ölkə arasında siyasi dialoqun, iqtisadi tərəfdaşlığın və humanitar əlaqələrin daha da möhkəmlənməsinə xidmət etməklə yanaşı, regionda sabitlik, əməkdaşlıq və qarşılıqlı etimadın güclənməsinə mühüm töhfə verəcəkdir.