Xəbərlər
Vacib mesajlar
Fidan Hüseynova
YAP Quba rayon təşkilatının sədri
Prezident İlham Əliyev Azərbaycan Respublikasının Müdafiə Nazirliyinin komando hərbi hissəsinə Döyüş bayrağının təqdim etmə mərasimində çıxışı zamanı bütün dünyaya ölkəmizin ağır, bəzən dözülməz sınaqlardan alnıaçıq, başı uca çıxaraq Vətən müharibəsində qələbə qazanmasının sirrini bir daha nümayiş etdirdi. Dövlət başçısı həm Azərbaycan cəmiyyətinə, həm region ölkələrinə, həm də ki, dünya dövlətlərinə vacib mesajlar verib.
Hərbçilər qarşısında çıxış edən müzəffər Ali Baş Komandan bölgədə gedən siyasi proseslərlə bağlı mühüm məqamlara toxundu.
İkinci Qarabağ müharibəsi zamanı Azərbaycanın xüsusi təyinatlıları bir sıra uğurlu əməliyyatlar keçirərək düşmənə sarsıdıcı zərbələr endirdi. Bu baxımdan bu qoşun növünün artırılması və Ordumuzun maddi-texniki təminatının gücləndirilməsi əsas prioritet kimi seçilib.
Azərbaycan Ordusu Vətən Müharibəsində düşməni darmadağın edərək, doğma torpaqlarımızdan qovdu. 30 illik işğaldan sonra ərazi bütövlüyümüz bərpa olundu. Dövlətimizin başçısı qeyd etdiyi kimi, mövcud reallıqlar, gərgin geosiyasi vəziyyət bizi diqqətli olmağa, daha da güclənməyə vadar edir. Ermənistan regionda sülhü və sabitliyi təmin edəcək sülh sazişinin imzalanmasını ləngidir. Ermənistandakı revanşist qüvvələr anlamırlar ki, bu saziş daha çox onların ölkəsinə və xalqına lazımdır. Onlar özlərini yaxşı aparmadığı təqdirdə, mütləq yenidən cəzalarını alacaqlar.
Dövlət başçısı çıxışında sülh gündəliyini təhdid edən, baş qaldırmış revanşist qüvvələr və Ermənistana havadarlıq röyasında olan siyasi dairələrə də mesajlar verdi. Prezident İlham Əliyev vurğuladı ki, dünyada geosiyasi vəziyyət gərginləşir, bölgəmizdə yeni təhdidlər mövcuddur, Ermənistanda revanşist qüvvələr baş qaldırır. Bütün bunları nəzərə alaraq, Ordumuzun daha da gücləndirilməsi vəzifəsi bir nömrəli vəzifə olaraq qalır. Buna nail olmaq üçün kompleks tədbirlər görülür. Ermənistan keçən ilin oktyabr ayında rəsmən Azərbaycanın ərazi bütövlüyünü tanıyıb. Bu, müsbətə doğru atılan bir addımdır. Ancaq bundan sonra həmin bu ifadələr kağız üzərində də olmalıdır və Ermənistan buna imza atmalıdır. Belə olan halda Cənubi Qafqazda uzunmüddətli sülh yarana bilər.
Prezident İlham Əliyev bildirdi ki, son iki il yarım ərzində biz bir neçə dəfə məcbur olub Ermənistan tərəfinə öz gücümüzü göstərmişik, birincisi, onların hərbi təxribatlarına cavab olaraq. İkincisi, onlara bir siqnal göndərmişik ki, özlərini yaxşı aparmasalar, öz imzalarına hörmət etməsələr, nəticə onlar üçün acınacaqlı olacaq.
44 günlük Vətən Müharibəsindən sonra Azərbaycanda müasir ordu quruculuğu istiqamətində mühüm tədbirlər, layihələr həyata keçirilir. Azərbaycan Ordusunun döyüş hazırlığının yüksəldilməsi, maddi-texniki bazasının təkmilləşdirilməsi, peşəkarlığının artırılması, müasir silah-sursat, hərbi texnika ilə təmin olunması prosesi davam etdirilir. Artıq yeni silahların alınması ilə bağlı müqavilələr də imzalanıb. Müqavilə əsasında ölkəmizə yeni pilotsuz uçuş aparatları və uzaqmənzilli raketlər gətiriləcək. Bu, Azərbaycan Silahlı Qüvvələrinin imkanlarını daha da artıracaq. Bir sözlə, ordumuz güclənməkdə davam edir. Bu dövlətimizin, eləcə də bütün regionun təhlükəsizliyi baxımından vacibdir.
Bütün bunlar onu deməyə əsas verir ki, Prezidentimiz İlham Əliyevin rəhbərliyi ilə qalib Müzəffər Azərbaycan ordusu xalqımıza bundan sonra da qələbə zəfərləri bəxş edəcək, yüksək səviyyədə hərbi hazırlıq və peşəkarlıq nümunəsi göstərərək regionun lider ordusu olduğunu bütün dünyaya bir daha nümayiş etdirəcək.