YENİ AZƏRBAYCAN PARTİYASI

Yeni Azərbaycan Partiyası dünənin, bu günün və gələcəyin partiyasıdır!
ÜZVLƏRİN SAYI: 0
BİZƏ YAZIN

Xəbərlər

Bakıda inkişaf potensialının və modellərinin yenidən nəzərdən keçirilməsi ilə bağlı seminar keçirilib

Mayın 3-də Bakıda Asiya İnkişaf Bankının (AİB) Rəhbərlər Şurasının 48-ci İllik Toplantısı çərçivəsində “İnkişaf potensialı və inkişaf modellərinin yenidən nəzərdən keçirilməsi” mövzusunda seminar keçirilib.

Azərbaycanın maliyyə naziri Samir Şərifov tədbirdə çıxış edərək seminarın fikir mübadiləsi və bütövlükdə artım modellərinin müzakirəsi baxımından gözəl fürsət olduğunu bildirib. Nazir vurğulayıb ki, Asiya ölkələrinin iqtisadiyyatları sürətlə inkişaf edir. Son 20 ildə təxminən 6 faizlik illik artım dərəcəsi müşahidə olunur ki, bu da böyük rəqəmdir.

Çıxışında Azərbaycanın sürətli inkişafı haqqında ətraflı məlumat verən Samir Şərifov son on ildə ölkəmizdə ümumi daxili məhsulun üç dəfə artdığını bildirib. Azərbaycan hökumətinin yeni artım modellərindən istifadə etdiyini vurğulayan nazir “Azərbaycan 2020: Gələcəyə baxış” İnkişaf Konsepsiyasının qəbul olunduğunu diqqətə çatdırıb. Qeyd edilib ki, bu modeldə əsas prioritet kimi iqtisadiyyatın şaxələndirilməsi nəzərdə tutulur. Biz bu istiqamətdə kifayət qədər uğurlu fəaliyyət göstərmişik. Son üç ildə ümumi daxili məhsulun, o cümlədən sənayenin artımı məhz qeyri-neft sektorunun inkişafı hesabına baş verib.

Azərbaycan hökumətinin neftdən əldə olunan gəlirləri qeyri-neft sektorunun inkişafına yönəltdiyini söyləyən Samir Şərifov bu siyasətin hazırda uğurla davam etdirildiyini söyləyib. Bildirilib ki, Azərbaycan üçün böyük əhəmiyyət kəsb edən məsələlərdən biri də məhz təcrübə mübadiləsidir. O, bu baxımdan Asiya qitəsində olan digər ölkələrin təcrübəsininin öyrənilməsinin əhəmiyyətini vurğulayıb.

Milli iqtisadiyyatların xarici təsirlərə məruz qaldığını, hazırda təbii ehtiyatların qiymətinin dəyişməsi və tükənməsi kimi amillərin də mövcud olduğunu diqqətə çatdıran nazir deyib: “Biz siyasi və makroiqtisadi sabitliyi saxlamalı, şaxələndirməni davam etdirməliyik. Eyni zamanda, biznes sahəsinin özünü doğrultmasını da təmin etməliyik. Kifayət qədər sərmayənin Azərbaycana gətirilməsi və təhsil sahəsinə yatırılmasına çalışırıq. Burada kənd təsərrüfatının inkişaf etdirilməsi də çox vacibdir. Kənd təsərrüfatı iqtisadiyyatın artımında prioritet məsələdir. Neft-kimya resurslarından səmərəli istifadə, turizm və xidmət sənayesinin inkişafı, informasiya texnologiyalarının tətbiqinin genişləndirilməsi Azərbaycan hökumətinin yürütdüyü siyasətin prioritet istiqamətlərindəndir.

Çinin maliyyə naziri Lou Jivei diqqətə çatdırıb ki, Asiya dünyanın ən dinamik və çevik regionudur. AİB-in hesablamalarına görə, Asiya ölkələrinin inkişaf edən iqtisadiyyatları bu il ərzində 6,3 faiz artım tempi ilə böyüyəcək. Dünya iqtisadiyyatında Asiyanın rolunun əhəmiyyətini vurğulayan Lou Jivei qitə ölkələrinin Avropa ilə müqayisədə böhrandan daha az zərər gördüklərini bildirib. Qeyd edib ki, Asiya ölkələrində adambaşına düşən ümumi daxili məhsul o qədər də yüksək deyil. Bunun üçün Asiya ölkələrinin inkişaf strategiyası təkmilləşdirilməli, yeni modellər araşdırmalıdır. Asiya ölkələri infrastrukturu təkmilləşdirməklə yanaşı, əlaqələrin daha da genişləndirilməsinə nail olmalıdır.

İndoneziyanın maliyyə naziri Bambanq Brodjoneqoro çıxışında iqtisadiyyatın şaxələndirilməsinin vacibliyindən danışıb, dayanıqlı inkişafı təmin etmək üçün daxili istehlakın artırılmasının vacibliyini bildirib. Qeyd edib ki, dünya böhranından sonra Asiya ölkələri artım tempinə deyil, dayanıqlı inkişafa diqqət yetirməlidir. Daxili istehlak yüksək olanda maliyyə böhranının təsirləri az hiss edilir.

Hindistanın maliyyə naziri Arun Jaitley ölkəsinin infrastrukturun inkişafı üçün böyük addımlar atdığını vurğulayıb. Bildirib ki, Hindistanda hazırda torpaq islahatları həyata keçirilir. Bu, çox mürəkkəb prosesdir. Əhalimizin çox olmasına və təxminən 70 faizinin müxtəlif işlərdə çalışmasına baxmayaraq, işçi qüvvəsini daha da artırmaq lazımdır. Hindistanda iqtisadi göstəricilər çox aşağı deyil. Maliyyə bazarı gücləndirilməlidir. Kapital bazarında islahatı hökumət üçün vacib məsələdir. Hindistan hökuməti bu problemi aradan qaldırmağa və investisiya mühitini yaxşılaşdırmağa çalışır.

AİB-in prezidenti Takehiko Nakao çıxışında qeyd edib ki, böhrana baxmayaraq, bir sıra ölkələr artım templərini qorumağa müvəffəq olub. O, iqtisadiyyatı gücləndirmək üçün işçi potensialının artırılmasının, maliyyə məhdudiyyətlərinin aradan qaldırılmasının və açıq bazar iqtisadiyyatının əlaqələndirilməsinin vacibliyini bildirib. T.Nakao deyib ki, biz düzgün hesablanmış addımlar atmaqla bütövlükdə regionun inkişafına böyük töhfə verə bilərik.

Sonra seminar iştirakçılarının sualları cavablandırılıb.

 

DİGƏR Xəbərlər Arxiv