Xəbərlər
Şuşadan dünyaya verilən qlobal mesaj
Təvəkkül Əliyev
YAP Şuşa rayon təşkilatının sədri
Son illərdə Azərbaycanın informasiya siyasəti və beynəlxalq imic formalaşdırma strategiyası ciddi uğurlar əldə edib. Bu sahədə Prezident İlham Əliyevin təşəbbüsü ilə reallaşan mühüm platformalardan biri də Şuşa Qlobal Media Forumudur. Artıq ənənəyə çevrilmiş bu forum həm regional, həm də beynəlxalq media dairələrinin diqqət mərkəzindədir. Dövlət başçısının forumdakı çıxışları isə Azərbaycanın regional liderlik ambisiyalarını və qlobal çağırışlara verdiyi konstruktiv cavabları aydın şəkildə əks etdirir.
2025-ci ildə forumun Xankəndi şəhərində yeni inşa olunmuş Konqres Mərkəzində keçirilməsi xüsusi simvolik məna daşıyır. Keçmişdə separatizmin mərkəzi kimi tanınan bu məkanın indi beynəlxalq tədbirlərə ev sahibliyi etməsi Azərbaycanın ərazi bütövlüyünün tam bərpa olunduğunu və dövlət suverenliyinin möhkəmləndiyini göstərir. Prezident İlham Əliyevin vurğuladığı kimi, artıq bu məkanda separatçılar deyil, dövlət başçıları və nüfuzlu media təmsilçiləri toplaşır.Azərbaycanın bu platforma vasitəsilə verdiyi əsas mesajlardan biri də ölkənin sülh və əməkdaşlıq yolu ilə regionda sabitliyi təmin etməyə çalışmasıdır. Bu baxımdan, forum zamanı COP29 tədbirinə ev sahibliyi məsələsinin önə çəkilməsi təsadüfi deyil. İqlim dəyişiklikləri ilə bağlı məsələlərdə Azərbaycanın irəli sürdüyü təşəbbüslər və ədalətli mövqe ölkənin beynəlxalq etimadını gücləndirir. Prezidentin qeyd etdiyi kimi, yaşıl enerji sahəsində aparılan islahatlar və Qarabağda inşa edilən su elektrik stansiyaları bu strategiyanın konkret nəticələridir.
Forum çərçivəsində Prezident İlham Əliyevin Zəngəzur dəhlizi ilə bağlı verdiyi mesajlar da diqqət çəkdi. Bu layihənin yalnız Azərbaycan üçün deyil, bütövlükdə region üçün strateji əhəmiyyət daşıdığı vurğulandı. Azərbaycanın əsas hissəsini Naxçıvanla birləşdirəcək bu dəhliz eyni zamanda beynəlxalq nəqliyyat və logistika xəttinə çevriləcək. Ermənistanın layihədən yayınması isə onun həm iqtisadi, həm də siyasi təcridini daha da dərinləşdirir.
Ölkəmizin həyata keçirdiyi infrastruktur layihələri də forumda ətraflı şəkildə təqdim olundu. Bakı limanının genişləndirilməsi, Bakı-Tbilisi-Qars dəmir yolunun yenilənməsi və Xəzər dənizi üzərindən həyata keçirilən yükdaşımalar Azərbaycanın nəqliyyat mərkəzinə çevrilmək istiqamətində atdığı əhəmiyyətli addımlardır. Eyni zamanda, rəqəmsal texnologiyaların tətbiqi və gömrük prosedurlarının sadələşdirilməsi də bu prosesin ayrılmaz tərkib hissəsidir.
Prezidentin çıxışında Azərbaycanın Qlobal Cənub və Qlobal Şimal arasında körpü roluna malik olduğu xüsusi olaraq vurğulandı. Bu mövqe Azərbaycanın balanslı və tərəfsiz xarici siyasət kursunun göstəricisidir. İqlim ədalətinə dair "çirkləndirən daha çox məsuliyyət daşımalıdır" prinsipi isə ölkəmizin beynəlxalq ədalətə verdiyi töhfənin ifadəsidir.Eyni zamanda, Prezident çıxışında Füzulidə Özbəkistan tərəfindən tikilən məktəbi xatırladaraq, Türk dövlətləri arasında artan əməkdaşlıq və qardaşlıq münasibətlərinə toxundu. Bu nümunə Azərbaycanın türk dünyası ilə əlaqələrinin dərinləşdiyini və regionda birləşdirici rol oynadığını təsdiqləyir. Xankəndidə keçirilən İqtisadi Əməkdaşlıq Təşkilatının Zirvə görüşü də bu baxımdan həm rəmzi, həm də siyasi baxımdan mühüm hadisə idi.
Sonda isə Prezident İlham Əliyev çıxışında Ulu Öndər Heydər Əliyevin vəsiyyətinə istinad edərək, Qarabağda suverenliyin bərpasını və separatçılığın ləğvini həm siyasi, həm də mənəvi borc kimi qiymətləndirdi. Şuşa Qlobal Media Forumu bir daha göstərdi ki, Azərbaycan öz strateji hədəflərini qətiyyətlə həyata keçirən, sülh və əməkdaşlığa əsaslanan, beynəlxalq ictimaiyyətin etibar etdiyi güclü bir dövlətdir.