Xəbərlər
Novruz bayramı – milli dəyərlərimizin parlaq təcəssümü
Fəsli Nəbiyev
YAP Gənclər Birliyinin sədr müavini
Novruz bayramı Azərbaycan xalqının ən qədim və əziz bayramlarından biridir. Bu bayram təkcə təbiətin oyanışı deyil, həm də dostluq, sülh və birlik rəmzidir. Qədim zamanlardan insanlar Novruz bayramında kin-küdurəti unudub, barışa nail olmağa çalışıblar. Bu, həmrəylik və yüksək mənəviyyat bayramıdır. Ulu Öndər Heydər Əliyev Novruz bayramını xalqımızın birlik və həmrəylik bayramı kimi səciyyələndirərək bildirmişdir ki, bu bayram insanları mehribanlığa, dostluğa və sülhə səsləyir.
Azərbaycan xalqının birliyi və həmrəyliyi, xüsusilə, Prezident İlham Əliyevin rəhbərliyi altında torpaqlarımızın işğaldan azad edilməsi ilə daha da möhkəmləndi. Bu gün biz artıq Novruz bayramını Şuşada, Suqovuşanda, Talışda və Xankəndində qeyd edirik. Bu, tarixi ədalətin bərpasının, Azərbaycanın gücünün və xalqımızın birliyinin rəmzidir. Hər il Novruz bayramı ərəfəsində azad edilmiş torpaqlarda bayram tonqalı qalanması Azərbaycanın qələbəsini, xalqımızın doğma yurduna qayıdışını simvolizə edir.
Novruz bayramının UNESCO tərəfindən Qeyri-Maddi Mədəni İrsin Reprezentativ siyahısına daxil edilməsi isə bu bayramın bəşəri dəyər kimi qəbul edilməsinin bariz nümunəsidir. Novruz təkcə Azərbaycan xalqının deyil, ümumilikdə Şərq xalqlarının qeyd etdiyi qədim bayramlardan biridir. Həmçinin, BMT-nin qərarı ilə martın 21-i “Beynəlxalq Novruz Günü” elan edilib ki, bu da bayramın dünya miqyasında tanınmasının göstəricisidir.
Novruz həm də milli adət-ənənələrimizin yaşadılması və gələcək nəsillərə ötürülməsində mühüm rol oynayır. Bayram süfrəsində səməni əsas atributlardan biri kimi yer alır. Səməni yazın, həyatın, bolluq və bərəkətin rəmzi hesab olunur. Novruz süfrəsində milli şirniyyatlarımız – paxlava, şəkərbura və qoğal xüsusi yer tutur. Bunlar təkcə ləzzətli təamlar deyil, həm də dərin rəmzi məna daşıyan nemətlərdir.
Novruz bayramı həm də xalqımızın mənəvi dəyərlərinin, xeyirxahlıq və humanizm prinsiplərinin təcəssümüdür. Bayram günlərində insanlar bir-birilərinə baş çəkir, küsülülər barışır, ehtiyacı olanlara kömək edilir. Xalqımızın əsrlər boyu yaşatdığı bu gözəl bayram milli kimliyimizin, mədəni irsimizin və dəyərlərimizin qorunub saxlanmasına xidmət edir.
Bu gün Novruz bayramı Azərbaycanda geniş şəkildə qeyd edilir. Paytaxt Bakıda və ölkənin müxtəlif bölgələrində bayram şənlikləri təşkil olunur, tonqallar qalanır, xalq sənətkarlığının nümunələri təqdim edilir, müxtəlif konsert proqramları keçirilir. Milli adət-ənənələrimizin, folklorun, musiqimizin və incəsənətimizin nümayiş olunduğu bu tədbirlər Novruzun təkcə bir bayram deyil, həm də milli kimliyimizin ayrılmaz hissəsi olduğunu bir daha sübut edir.
Novruz bayramı Azərbaycan xalqının ruhunu, tarixini, mədəniyyətini və ənənələrini yaşadan, birliyi və sülhü tərənnüm edən müqəddəs bayramdır. Bu bayram hər zaman xalqımıza sevinc, xoşbəxtlik və firavanlıq gətirsin!