Xəbərlər
Milli Məclisin deputatı Vüqar Rəhimzadə şəhid ailələrini ziyarət edib
Milli Məclisin deputatı Vüqar Rəhimzadə Culfa rayonunun Ərəfsə kəndində şəhidlərin əziz xatirəsinə ucaldılan “Şəhid Ruhu” abidə kompleksini ziyarət edib. Millət vəkili, həmçinin Qazançı kəndindən olan şəhid Elsevər Eldar oğlu Aslanov, Ləkətağ kəndindən olan şəhid Babək Əsgər oğlu Əliyev və Milax kəndindən olan şəhid Cəmaləddin Vahid oğlu Qəribovun ailələrini evlərində ziyarət edib.
Görüşlərdə Vüqar Rəhimzadə bildirib ki, torpaqlarımızın azadlığı uğrunda şəhidlik zirvəsinə ucalan Vətən övladlarının hər birinin keçdiyi döyüş yolu, göstərdiyi qəhrəmanlıqlar indiki və gələcək nəsillər üçün vətənpərvərlik məktəbidir. Vətənimizin ərazi bütövlüyü uğrunda canlarından keçən igidlərimizin xatirəsi xalqımız tərəfindən hər zaman uca tutulur.
Şəhidlərin ailələri göstərilən diqqət və qayğıya görə Prezident İlham Əliyevə və birinci xanım Mehriban Əliyevaya minnətdarlıqlarını ifadə ediblər.
Qeyd edək ki, Milli Məclisin deputatı, həmçinin Ərəfsə kəndinin ən yaşlı sakini, 96 yaşlı İzzət Teymur qızı Hüseynova, Qazançı kəndinin ən yaşlı sakini, 98 yaşlı Gülgəz Əli qızı Süleymanova və Milax kəndinin ən yaşlı sakini, 91 yaşlı Cığatel Hüseyin qızı Hacıyevanı evlərində ziyarət edib, onlara ən xoş arzularını çatdırıb.
