Xəbərlər
Güclü dövlət və dayanıqlı inkişaf
Namiq Əhmədov
YAP Xəzər rayon təşkilatının sədri
Ölkənin idman sahəsində qazanılan nailiyyətlərinin qiymətləndirilməsi və yeni hədəflərin müəyyənləşdirilməsi Prezident İlham Əliyevin daim diqqət mərkəzindədir. 2024-cü ilin idman yekunlarına həsr olunmuş mərasim də bu baxımdan istisna deyil. Bu görüş təkcə il boyu idmançıların ölkəmizi beynəlxalq arenalarda təmsil etməsi ilə bağlı hesabat deyil, eyni zamanda, idmanın ümummilli inkişafında oynadığı strateji rolu ön plana çıxarmaq baxımından mühüm idi.
Cari il Azərbaycan idmançıları üçün uğurlu oldu. Onlar Avropa çempionatlarında, dünya birinciliklərində və Parisdə keçirilən Yay Olimpiya Oyunlarında çoxsaylı medallar qazanıblar. Prezident İlham Əliyev görüşdə bu nailiyyətlərdən danışaraq idmançıların Azərbaycanı milli ruhda təbliğ etdiyini qeyd edib. Dövlətimizin başçısı regionlarda idman infrastrukturlarının gücləndirilməsi tələbini bir daha vurğulayaraq yeniyetmə və gənclər arasında idmanın kütləviləşdirilməsi istiqamətində daha çox addım atılacağı bildirib.
Bu ilin nailiyyətləri yeni strateji prioritetlərin təməlini qoyacaq. Bu strategiyalar milli idmançıların beynəlxalq meydanlarda uğur qazanması ilə yanaşı, xalqda idman və sağlam yaşam tərzinin aşılanmasına yönələcək. Bu tipli görüşlər xalqda milli birliyə töhfə verir. İdmançıların qələbələri insanlarda özünəinam və birlik duyğusu formalaşdırır. Azərbaycanın beynəlxalq arenalarda qazandığı nailiyyətlər ölkəmizin idman dövləti kimi imicini daha da gücləndirir. Bu cür görüşlər yeni nəslin idmana olan marağını artırır. Çünki onlar başa düşür ki, uğur qazanan idmançılar ölkənin diqqət mərkəzindədir. Qarşıda duran illərdə bu istiqamətdə daha çox təşəbbüslərin olacağı şübhəsizdir. Bu strategiya yalnız idmanı deyil, ümumi sosial inkişafı da dəstəkləyəcəkdir.
2024-cü il Azərbaycan idmanının inkişafında yeni mərhələ kimi yadda qalacaq. Ölkəmizdə idman mədəniyyətinin inkişafı, gənclərin idmana cəlb edilməsi və beynəlxalq arenada uğurların artırılması istiqamətində bir sıra mühüm addımlar atılmışdır. Gənclərin idmana marağının artırılması üçün geniş təbliğat kampaniyaları həyata keçirilmişdir. Məktəblərdə və universitetlərdə keçirilən idman festivalları və müsabiqələr gəncləri sağlam həyat tərzinə təşviq etmişdir. Bununla yanaşı, yerli idman dərnəklərinin və federasiyaların fəaliyyəti daha da gücləndirilmişdir. İdmanın inkişafı təkcə idman sahəsi ilə məhdudlaşmır, eyni zamanda iqtisadiyyat və sosial sahəyə də müsbət təsir göstərir.
2024-cü ildə Azərbaycanda keçirilən beynəlxalq idman tədbirləri turist axınına şərait yaradaraq yerli iqtisadiyyata töhfə vermişdir. Eyni zamanda, idmanın populyarlaşdırılması cəmiyyətin sağlam həyat tərzinə meylini artırmış və birləşdirici sosial faktor kimi çıxış etmişdir. Əldə edilən nailiyyətlər Azərbaycan idmanının daha da inkişaf etdirilməsi üçün möhkəm zəmin yaratmışdır. Qarşıdakı illərdə yeni idman proqramlarının tətbiqi, regionlarda idmanın kütləviləşdirilməsi və istedadlı gənclərin aşkara çıxarılması istiqamətində fəaliyyətlər davam etdiriləcək. Beləliklə, 2024-cü il idman tariximizdə həm nailiyyətlər, həm də yeni imkanlar ili kimi yadda qalacaq. Dövlət və cəmiyyətin birgə səyləri ilə Azərbaycan idmanının inkişafı gələcəkdə daha böyük uğurlar vəd edir.