Xəbərlər
YAP: Dünənin, bu günün və gələcəyin partiyası
Azər Süleymanov
YAP Nəsimi rayon təşkilatının sədri
Yeni Azərbaycan Partiyası (YAP) 32 illik tarixi ərzində xalqa, Vətənə və dövlətçiliyə xidmət edərək müstəqil Azərbaycanın möhkəmlənməsi və dinamik inkişafında mühüm rol oynamışdır. Ümummilli Lider Heydər Əliyevin ideyalarını və strateji xəttini həyata keçirən YAP, Azərbaycanın ictimai-siyasi həyatında əhəmiyyətli uğurlar qazanmış və milli dövlətçilik ideologiyasının formalaşdırılmasında mühüm töhfə vermişdir. Baxmayaraq ki, 32 il tarix baxımından qısa müddət hesab olunur, bu dövr ərzində görülən işlər və əldə edilən nəticələr miqyası ilə diqqətəlayiqdir.
YAP-ın yaranması zamanı ölkədə anarxiya, xaos və dövlətçiliyin məhvi təhlükəsi hökm sürürdü. Xalq nicat yolunu yalnız Heydər Əliyevin hakimiyyətə qayıdışında görürdü. Bu məqsədlə 91 nəfər Azərbaycan ziyalısı 1992-ci ildə Ulu Öndərə müraciət edərək, yeni yaradılacaq partiyaya rəhbərlik etməsini xahiş etdi. Heydər Əliyev bu çağırışa cavab olaraq 24 oktyabr 1992-ci ildə Yeni Azərbaycan Partiyasının yaradılmasına və ona rəhbərlik etməyə razılıq verdi. 21 noyabr 1992-ci ildə Naxçıvanda keçirilən təsis konfransı tarixi hadisəyə çevrildi və Heydər Əliyev yekdilliklə partiyanın Sədri seçildi. Qısa müddət ərzində YAP siyasi hakimiyyətə gəldi və Azərbaycan xalqının təkidli tələbi ilə Heydər Əliyev Bakıya dəvət edildi. Dahi Lider, əvvəlcə parlamentin sədri, daha sonra isə Azərbaycan Respublikasının Prezidenti seçildi. Bununla da, ölkənin məhv olmaq təhlükəsi aradan qalxdı və Azərbaycanın tənəzzüldən tərəqqiyə doğru yolu başlandı.
YAP-ın yaranması Azərbaycanın siyasi və iqtisadi müstəqilliyinin möhkəmlənməsi, ictimai-siyasi sabitliyin bərpası və ölkənin beynəlxalq nüfuzunun artması ilə nəticələndi. Partiyanın fəaliyyəti nəticəsində milli maraqlara əsaslanan strateji siyasət həyata keçirildi. Ümummilli Lider Heydər Əliyevin siyasi kursu bu gün Prezident İlham Əliyev tərəfindən uğurla davam etdirilir. Cənab İlham Əliyevin rəhbərliyi ilə YAP, Azərbaycanın regionda və dünyada lider mövqeyini təmin etməklə yanaşı, ölkədə mühüm islahatlar həyata keçirir.
YAP-ın VII Qurultayı partiyanın tarixində yeni inkişaf mərhələsinin başlanğıcı oldu. Qurultayda partiyanın strukturunda əhəmiyyətli dəyişikliklər aparıldı, idarəetmənin təkmilləşdirilməsi məqsədilə yeni Nizamnamə təsdiq edildi. Birinci müavin postunun təsis olunması və bu vəzifəyə Birinci vitse-prezident Mehriban Əliyevanın seçilməsi partiyanın idarəetmə prosesində mühüm əhəmiyyət daşıyır. Prezident İlham Əliyevin Qurultaydakı proqram xarakterli nitqi partiyanın müstəqil dövlətçiliyin möhkəmlənməsi, demokratik siyasi sistemin inkişafı və Azərbaycanın gələcək perspektivləri üçün prioritetlərini müəyyənləşdirdi.
YAP-ın fəaliyyəti nəticəsində Azərbaycanın beynəlxalq aləmdə nüfuzu artıb. Xüsusilə 44 günlük Vətən müharibəsində əldə olunan tarixi Qələbə YAP-ın uğurlarının zirvəsi oldu. Müzəffər Ali Baş Komandan İlham Əliyevin rəhbərliyi ilə Azərbaycan Ordusu ərazi bütövlüyünü bərpa etdi və tarixi ədalət təmin olundu. Bu Qələbə ölkəmizin inkişaf yolunda yeni reallıqlar və perspektivlər yaratdı.
YAP-ın ideologiyası, fəaliyyəti və uğurları onu “dünənin, bu günün və gələcəyin partiyası” kimi xarakterizə edir. Ulu Öndər Heydər Əliyevin “Gün gələcək Azərbaycan dünyaya günəş kimi boylanacaq” sözləri bu gün reallığa çevrilmişdir. Prezident İlham Əliyevin rəhbərliyi ilə Azərbaycanın qarşısında duran əsas vəzifə ölkənin regionun və dünyanın ən qüdrətli dövlətləri sırasında liderliyini qorumaqdır.
Yeni Azərbaycan Partiyası öz fəaliyyətini müasir dövrün çağırışlarına uyğun davam etdirərək, milli dövlətçilik ideyalarının möhkəmləndirilməsi və xalqın rifahının təmin olunması istiqamətində çalışır. Bu, partiyanın davamlı uğurlarının və Azərbaycanın daha yüksək zirvələrə çatmasının əsas təminatıdır.