Xəbərlər
Göygöldə Heydər Əliyevin xatirəsinə həsr olunan tədbir keçirilib
Yeni Azərbaycan Partiyası (YAP) Göygöl rayon təşkilatı və Göygöl Rayon İcra Hakimiyyətinin birgə təşkilatçılığı ilə Ümummilli Lider Heydər Əliyevin anadan olmasının 101-ci ildönümü münasibətilə rayon Gənclər Evində “Heydər Əliyev müasir müstəqil Azərbaycanın memarıdır” mövzusunda tədbir keçirilib.
Əvvəlcə Ulu Öndər Heydər Əliyevin abidəsi ziyarət olunub, abidə önünə gül dəstələri düzülüb, Ümummilli Liderin xatirəsi ehtiramla anılıb.
Sonra tədbir iştirakçıları məktəblilərin Ulu Öndərin xatirəsinə həsr olunmuş rəsm sərgisinə baxış keçiriblər.
Tədbirdə Dövlət Himni səsləndirilib. Ümummilli Lider Heydər Əliyevin və torpaqlarımızın ərazi bütövlüyü və suverenliyi uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.
Sonra Ulu Öndər Heydər Əliyevin həyat və fəaliyyətinə həsr edilən film nümayiş olunub.
Tədbirdə çıxış edən RİH başçısı Elvin Paşayev, YAP Göygöl rayon təşkilatının sədri Vüqar İsayev, YAP İdarə Heyətinin üzvü Elşad Mirbəşiroğlu, AMEA-nın Tarix və Etnologiya İnstitutunun Qərbi Azərbaycan şöbəsinin müdiri Cəbi Bəhramov, tarix üzrə fəlsəfə doktoru, dosent Bəxtiyar Həsənov müasir Azərbaycan dövlətinin qurucusu və memarı Ümummilli Lider Heydər Əliyevin Azərbaycan xalqı qarşısındakı tarixi xidmətlərinin sonsuz olduğunu diqqətə çatdırıblar. Qeyd olunub ki, Azərbaycan xalqı yeni əsrə və yeni minilliyə məhz Ulu Öndər Heydər Əliyev zəkasının işığında qədəm qoyub. Davamlı yüksəliş yolunda inamla irəliləyən müasir Azərbaycan Heydər Əliyevin ideyalarının təntənəsidir.
Çıxışlarda Ulu Öndər Heydər Əliyevin rəhbərliyi ilə yaradılan Yeni Azərbaycan Partiyasının keçdiyi şərəfli inkişaf yoluna da nəzər salınıb.
Sonra Ulu Öndər Heydər Əliyevin anadan olmasının 101 illiyi münasibətilə Göygöl rayonunda keçirilən silsilə yarışların qalibləri mükafatlandırılıb, rayonun ictimai-siyasi həyatında fərqlənən bir qrup şəxsə fəxri fərman, partiya sıralarına yeni qoşulanlara üzvlük vəsiqələri təqdim edilib.
Tədbir Yeni Azərbaycan Partiyasının Himninin səsləndirilməsi ilə başa çatıb.
Qeyd edək ki, tədbir çərçivəsində Göygöl şəhər Heydər Əliyev adına mədəniyyət və istirahət parkında yerləşən “Yay kinoteatrı”nda konsert proqramı təşkil olunub.
