Xəbərlər
Azərbaycan diasporu Dağlıq Qarabağda keçirilən qondarma “prezident seçkilərinə” etiraz edir
Dünyanın müxtəlif ölkələrində fəaliyyət göstərən diaspor təşkilatları Azərbaycan Respublikasının ayrılmaz tərkib hissəsi olan Dağlıq Qarabağda qondarma rejimin “prezident seçkisi” keçirməsinə qəti etiraz edir.
Diasporla İş üzrə Dövlət Komitəsindən bildiriblər ki, bununla əlaqədar xaricdə yaşayan azərbaycanlılar və Azərbaycanın diaspor təşkilatları - Azərbaycan-Kipr Dostluq Cəmiyyəti, Kocaeli Derince Azerbaycan Evi Derneyi, Moskvanın Azərbaycanlı İcması, Orenburq Azərbaycanlıları Milli Konqresi, Samara Vilayəti Azərbaycanlılar Liqası, “Dostluq” Primorye azərbaycanlılarının ictimai təşkilatı, Ukrayna Azərbaycanlıları Radası, Gürcüstan Azərbaycanlılarının İnteqrasiya Mərkəzi, Moldova Azərbaycanlıları Konqresi, Almaniya Azərbaycanlıları Alyansı, Şərqi Avropa Azərbaycanlılarının Koordinasiya Şurası, Skandinaviya Azərbaycanlıları Koordinasiya Şurası və digər ölkələrdə fəaliyyət göstərən Koordinasiya Şuraları, Amerikada, Türkiyədə, Rusiyada yaşayan soydaşlarımız və s. etirazlara başlayıb.
Təşkilatlar və diaspor fəalları xarici ölkələrin rəsmi qurumlarına, nüfuzlu beynəlxalq təşkilatların mərkəzi ofislərinə bəyanatlar, məktublar göndərərək etirazlarını bildirir və beynəlxaq ictimaiyyəti hüquqa zidd olan bu prosesə müdaxilə etməyə çağırır.
Bir sıra ölkələrin mətbuatında, eləcə də sosial şəbəkələrdə müxtəlif dillərdə yayımlanmış müraciətlərdə qeyd edilir ki, Azərbaycanın işğal edilmiş torpaqlarında yaradılan qondarma quruma, dünyada pandemiya tüğyan etdiyi bir vaxtda “prezident seçkilərinin” keçirilməsi və daha sonra mayın 21-də Şuşada andiçmə mərasiminin planlaşdırılması beynəlxalq hüquqa, bölgədə sülhə və sabitliyə qarşı təhdid, Azərbaycana qarşı təxribatdır.
Qarabağ Azərbaycandır! Artıq bir sıra dövlətlər və beynəlxalq təşkilatlar bu “seçki” şousunu pisləyərək, Azərbaycanın ərazi bütövlüyünü dəstəklədiyini, qondarma “Dağlıq Qarabağ respublikasını” və buradakı “seçkiləri” tanımadığını bəyan edib. Dünyanın bir çox dövlətləri, o cümlədən Avropa İttifaqı, ATƏT, NATO, İslam Əməkdaşlıq Təşkilatı, Qoşulmama Hərəkatı, Türk Şurası, GUAM, Avropa Parlamenti, TÜRKPA kimi beynəlxalq təşkilatlar, nüfuzlu KİV-lər, eləcə də görkəmli şəxsiyyətlər bu “seçkiləri” məqsədli təxribat, Qafqazda sülhə, sabitliyə yönəldilən məsuliyyətsiz siyasi addım, münaqişənin sülh yolu ilə nizamlanmasına qarşı ciddi əngəl, beynəlxalq hüquq normalarına təhdid kimi dəyərləndirərərk, bu qondarma “seçkilərin” və onların nəticələrinin qanunsuz olduğunu bəyan etdilər. Yalnız Ermənistan rəhbərliyi, qondarma rejimlər və erməni lobbisi tərəfindən dəstək görən, heç bir beynəlxalq təşkilat və ölkə tərəfindən tanınmayan işğalçı rejim və onun burada təşkil etdiyi qondarma “seçkiləri” beynəlxalq hüquqa ziddir.
Eyni zamanda, Ermənistan-Azərbaycan Dağlıq Qarabağ münaqişəsinin həllinə dair aparılan danışıqlara böyük zərbə olan bu addım, qarşı tərəfin əsil niyyətini üzə çıxararaq məsələnin həllində maraqlı olmadığını bir daha göstərmiş olur. Qanunsuz parlament tərəfindən saxta seçkilərin keçirilməsi Ermənistanın sülh danışıqlarında beynəlxalq ictimaiyyəti aldatmağa cəhd göstərdiyini sübut edir. Bu səbəbdən dünya dövlətləri, eləcə də beynəlxalq təşkilatlar Ermənistana qarşı daha ciddi təzyiq və sanksiyalar tətbiq etməklə onu beynəlxalq hüquq normalarına hörmətlə yanaşmağa məcbur etməlidir.
“Azərbaycanın beynəlxalq ictimaiyyət tərəfindən tanınmış ərazilərində saxta “prezident seçkisinin” keçirilməsi və “andiçmə” şousunun təşkili yolverilməzdir. Biz azərbaycanlılar bunu işğal olunmuş Azərbaycan torpaqlarında, başda Xocalı faciəsi olmaqla dinc insanların qatili olan separatçı rejimin və işğalçı Ermənistanın cinayətkar fəaliyyətlərinin davamı kimi qiymətləndirərək, bu təxribatçı, eləcə də cinayətkar əməlləri kəskin şəkildə pisləyirik”, - deyə müraciətlərdə vurğulanır.
Soydaşlarımız və diaspor təşkilatları tərəfindən yayımlanmış müraciətlərdə beynəlxalq ictimaiyyətdən separatçı rejimin saxta “prezidentinin andiçmə” şousunun qarşısının alınması və Ermənistanın bu cinyatəkar əmələ dəstəyinin dayandırılması üçün məsələyə təcili müdaxilə edilməsi xahiş olunur.
Müraciətlə bağlı sosial şəbəkədə yüzlərlə statuslar paylaşılıb, etirazlar bildirilib və proses davam edir.