Xəbərlər
YAP-ın namizədi Ziyafət Əsgərovun növbəti görüşü Astara rayonunun Şiyəkəran kəndinin seçiciləri ilə olub
Fevralın 9-da keçiriləcək VI çağırış Azərbaycan Respublikası Milli Məclisinə seçkilərdə Yeni Azərbaycan Partiyasının (YAP) irəli sürdüyü namizədlərin təbliğat-təşviqat kampaniyası davam edir.
YAP tərəfindən 76 saylı Lənkəran-Astara seçki dairəsi üzrə namizədliyi irəli sürülən Ziyafət Əsgərovun təbliğat-təşviqat kampaniyası çərçivəsində növbəti görüşü Astara rayonunun Şiyəkəran kəndinin seçiciləri ilə olub.
Seçicilərin qarşısında çıxış edən deputatlığa namizəd Z.Əsgərov əvvəlcə Azərbaycan Respublikasının Prezidenti İlham Əliyevin ölkədə bütün sahələrdə apardığı köklü islahatlar və görülmüş işlərin əhəmiyyəti haqqında seçicilərə məlumat verib. Deputatlığa namizəd daha sonra kəndin seçicilərinin fevralın 9-da keçiriləcək parlament seçkilərində fəallıq göstərəcəyinə əminliyini diqqətə çatdırıb.
Çıxışın sonunda YAP-ın deputatlığa namizədi Ziyafət Əsgərov seçkilərdə qalib gələcəyi təqdirdə bütün seçicilərin etimadını doğruldacağına söz verib və görüşə gələn hər bir seçiciyə minnətdarlığını bildirib.
Daha sonra Astara rayonunun Şiyəkəran kəndinin seçiciləri müstəqil Azərbaycanın daha da qüdrətlənməsi naminə 76 saylı Lənkəran-Astara seçki dairəsindən YAP-ın deputatlığa namizədinə səs verəcəklərini dilə gətiriblər və seçkilərdə Z.Əsgərova uğurlar arzulayıblar.
