Xəbərlər
Dünyanın diqqət mərkəzində
Zaur Muradov
YAP İsmayıllı rayon təşkilatının sədri
Mayın 18-də Bakı daha bir mühüm beynəlxalq hadisəyə ev sahibliyi etdi -Ümumdünya Şəhərsalma Forumunun 13-cü Sessiyası (WUF13) öz işinə başladı. Dünyanın 182 ölkəsindən 45 mindən artıq iştirakçının qatıldığı bu mötəbər tədbir Azərbaycanın qlobal şəhərsalma və memarlıq gündəmində nə qədər önəmli yer tutduğunu bir daha nümayiş etdirdi. Forumun açılış mərasimində çıxış edən Prezident İlham Əliyevin səsləndirdiyi fikirlər isə təkcə Azərbaycanın coğrafi mövqeyini deyil, həm də onun tarixi missiyasını və mədəni kimliyini əks etdirirdi. Prezidentin dediyi kimi, “Azərbaycan Avropa ilə Asiya arasında yerləşir və hər zaman Şərqin Qərb ilə qovuşduğu məkan olub.”
Bu fikir sadəcə coğrafi təsvir deyil. Bu, əsrlər boyu müxtəlif sivilizasiyaların, mədəniyyətlərin və düşüncə tərzlərinin qovuşduğu Azərbaycanın tarixi gerçəkliyidir. Ölkəmiz Şərqin mənəvi dəyərləri ilə Qərbin modern inkişaf modelini bir araya gətirərək özünəməxsus inkişaf yolu formalaşdırıb. Bu xüsusiyyət Bakının simasında aydın görünür. Bakı qədimliklə müasirliyin harmoniyasını özündə birləşdirən nadir şəhərlərdən biridir. İçərişəhərin daş küçələrindən keçərək bir neçə addım sonra müasir memarlıq nümunələri ilə qarşılaşmaq mümkündür. Xəzərin sahili boyunca uzanan şəhər panoramasında qədim tarixi abidələr, XIX əsr Avropa memarlığı və müasir göydələnlər bir-birini tamamlayır. Bu vəhdət təsadüfi deyil. Bu, Azərbaycanın həm öz tarixi irsinə sadiqliyinin, həm də gələcəyə açıq baxışının nəticəsidir.
Azərbaycanın zəngin mədəni irsi yalnız paytaxtla məhdudlaşmır. Şamaxıdakı qədim məscidlər, Naxçıvanın möhtəşəm memarlıq abidələri, Nizami Gəncəvinin vətəni olan Gəncə və yenidən qurulan Şuşa ölkəmizin tarixinin canlı şahidləridir. Bu abidələr yalnız keçmişin yadigarı deyil, həm də bu gün yaşayan milli kimliyin ayrılmaz hissəsidir.
Prezident İlham Əliyev çıxışında şəhərsalma prosesini Bakı Qran-Prisinin metaforası ilə müqayisə etdi. Necə ki, sürətli yarış avtomobili qədim şəhər divarlarının yaxınlığından ehtiyatla keçir, şəhərsalma da inkişafla tarixi irsin qorunması arasında düzgün tarazlıq tələb edir. Müasirlik naminə keçmişin silinməsi deyil, keçmişi qoruyaraq gələcəyi qurmaq əsas məqsəd olmalıdır.
Bu yanaşmanın ən təsirli nümunəsi isə Qarabağda aparılan yenidənqurma işləridir. Uzun illər işğal altında qalan və tamamilə dağıdılan ərazilərdə bu gün genişmiqyaslı bərpa və quruculuq işləri həyata keçirilir. Qısa müddət ərzində yollar, körpülər, tunellər, beynəlxalq hava limanları tikilib, minlərlə insan doğma torpaqlarına geri qayıdıb. Bu proses yalnız infrastruktur layihəsi deyil, həm də milli iradənin, vətən sevgisinin və gələcəyə inamın təcəssümüdür.
WUF13 forumunun Azərbaycanda keçirilməsi təsadüfi deyil. COP29-dan sonra ölkəmizin ev sahibliyi etdiyi bu böyük beynəlxalq tədbir Azərbaycanın dünya miqyasında artan nüfuzunu göstərir. 2026-cı ilin “Şəhərsalma və Memarlıq İli” elan olunması da bu sahəyə verilən önəmin göstəricisidir.
Azərbaycan bu gün təkcə coğrafi baxımdan deyil, siyasi, iqtisadi və mədəni mənada da Şərqlə Qərb arasında körpü rolunu oynayır. Şəhərsalma isə ölkəmiz üçün sadəcə tikinti prosesi deyil, fərqli sivilizasiyaları birləşdirən, keçmişlə gələcək arasında əlaqə yaradan strateji bir missiyadır. Bakı isə bu missiyanın ən parlaq simvolu olaraq dünyanın diqqət mərkəzində qalmağa davam edir.