YENİ AZƏRBAYCAN PARTİYASI

Əli Hüseynli

Milli Məclisin deputatı

Əli müəllim, müasir Azərbaycan dövlətinin bütün nailiyyət və qələbələri xalqımızın Ümummilli Lideri Heydər Əliyevin adı ilə bağlıdır. Müdrik dövlət xadiminin 3 oktyabr 1993-cü ildə Azərbaycan Respublikasının Prezidenti seçilməsindən sonra görülən işlər ölkəmizin əsl müstəqilliyini və davamlı yüksəlişini təmin etdi. Həmin tarixi dövrə nəzər saldıqda hansı nəticələri ifadə etmək olur?

- Danılmaz faktdır ki, XX əsrin sonlarında ölkəmizin müstəqilliyinin qorunması, dövlətin siyasi, hüquqi və iqtisadi əsaslarının möhkəmləndirilməsi, beynəlxalq aləmdə Azərbaycanın mövqeyinin gücləndirilməsi məhz Ümummilli Lider Heydər Əliyevin rəhbərliyi ilə həyata keçirilmişdir.

1991-ci ildə Azərbaycan öz müstəqilliyini formal olaraq bərpa etsə də, ölkədə siyasi sabitlik, iqtisadi inkişaf və təhlükəsizlik təmin olunmamışdı. Son dərəcə ağır tarixi şəraitdə Heydər Əliyevin siyasi iradəsi və uzaqgörən siyasəti uzaqgörən siyasəti hadisələrin düzgün məcrada inkişafı üçün həlledici amilə çevrildi. Belə ki, daxili siyasi qarşıdurmalar, Ermənistanın təcavüzü, iqtisadi böhran, dövlətçiliyin zəif institusional bazası respublikanı dünya xəritəsindən silinmə təhlükəsi ilə üz-üzə qoymuşdu. Belə mürəkkəb bir şəraitdə 1993-cü ilin iyun ayında xalqın tələbi ilə Heydər Əliyev Naxçıvandan Bakıya gələrək hakimiyyətə qayıtdı və dövlət quruculuğu prosesinə milli lider kimi rəhbərlik etməyə başladı.

1993-cü il oktyabrın 3-də xalqın böyük etimadını qazanaraq Azərbaycan Respublikasının Prezidenti seçilən Heydər Əliyevin ən böyük xidmətlərindən biri siyasi sabitliyin bərpası oldu. “Müstəqilliyi qorumaq onu əldə etməkdən qat-qat çətindir. Biz müstəqilliyimizi əbədi, dönməz və sarsılmaz etməliyik”, həqiqətini ortaya qoyan Ulu Öndər dövlət çevrilişi cəhdlərini aradan qaldırdı, ölkədə vətəndaş qarşıdurmalarına son qoydu.

Onun bilavasitə rəhbərliyi altında Azərbaycan Respublikasının Konstitusiyasının qəbulu hüquqi dövlət və vətəndaş cəmiyyəti quruculuğunun bünövrəsini müəyyənləşdirdi. Bu sənəd demokratik idarəetmənin, hakimiyyət bölgüsünün və vətəndaş hüquq və azadlıqlarının əsaslarını təsbit etdi. Milli Məclisin, icra strukturlarının və məhkəmə hakimiyyətinin fəaliyyət mexanizmi də məhz bu dövrdə formalaşdı. Beləliklə, dövlət institutlarının sabit fəaliyyəti üçün hüquqi zəmin yaradıldı.

- Bəhs olunan mərhələdə ölkənin iqtisadi inkişafının təmin olunması, hərbi qüdrəti və beynəlxalq siyasi nüfuzunun artırılması istiqamətində həyata keçirilən tədbirlərin strateji əhəmiyyəti nədən ibarət idi?

- Müstəqilliyin ilk illərində nizami ordunun olmaması Azərbaycanın müdafiə qabiliyyətini zəiflədir və Ermənistan qarşısında ölkəni çətin vəziyyətə salırdı. Heydər Əliyev tərəfindən qısa müddətdə güclü, peşəkar ordu quruculuğu istiqamətində mühüm addımlar atıldı. Məhz onun atdığı qətiyyəti sayəsində müdafiə sənayesi və hərbi təhsil sistemi formalaşdırıldı milli təhlükəsizlik konsepsiyası işlənib hazırlandı. Bununla da dövlət quruculuğunun mühüm sütunu olan güclü silahlı qüvvələrin təməli qoyuldu.

Dövlət quruculuğunun əsas prioritetlərindən biri möhkəm iqtisadi bazanın yaradılmasıdır. Bu reallığı hər kəsdən yaxşı bilən Heydər Əliyev bazar iqtisadiyyatı prinsiplərini Azərbaycanda tətbiq etdi, islahatlar həyata keçirdi. Onun ən böyük layihəsi “Əsrin müqaviləsi” oldu. 1994-cü ildə imzalanmış bu müqavilə Azərbaycanın enerji resurslarını dünya bazarına çıxardı, özəlləşdirmə və bazar iqtisadiyyatına keçid islahatları həyata keçirildi. Bakı-Tbilisi-Ceyhan və digər enerji-nəqliyyat layihələri həm də regionda Azərbaycanın geosiyasi rolunu artırdı. Xarici sərmayələrin ğlkəyə cəlb olunması iqtisadiyyatı böhrandan çıxardı və gələcək inkişaf üçün güclü zəmin yaratdı. Nəticədə iqtisadi müstəqillik gücləndi, dövlətin sosial funksiyalarını yerinə yetirməsi üçün möhkəm maddi baza formalaşdı. İqtisadi strategiya və gələcəyə yönəlik baxışlarını Heydər Əliyev belə ifadə edirdi: “Azərbaycan öz təbii sərvətlərinin həqiqi sahibidir və bu sərvətlər xalqımızın rifahına xidmət etməlidir”. Vətəndaş rifahını müasir dövlətin əsas məqsədlərindən biri kimi müəyyənləşdirən Heydər Əliyevin dövründə təhsil və səhiyyə sahələrində islahatlar aparıldı, qaçqın və məcburi köçkünlərin sosial müdafiəsi təmin olundu.

Heydər Əliyev balanslaşdırılmış, praqmatik xarici siyasət kursu ilə Azərbaycan regionun mühüm aktoruna və liderinə çevrildi. O, BMT, ATƏT, Avropa Şurası kimi beynəlxalq təşkilatlarla əməkdaşlığı genişləndirdi, həm Qərb, həm də Şərq ölkələri ilə qarşılıqlı faydalı münasibətlər qurdu. Bu siyasət Azərbaycanın beynəlxalq aləmdə nüfuzunun artmasına səbəb oldu. Beləliklə, dövlətin beynəlxalq legitimliyi möhkəmləndi və Azərbaycan regional güc mərkəzinə çevrildi.

Heydər Əliyev dövlət quruculuğunu yalnız siyasi və iqtisadi aspektlərlə məhdudlaşdırmadı. O, milli-mənəvi dəyərlərə əsaslanan dövlətçilik fəlsəfəsini formalaşdırdı. Azərbaycançılıq ideologiyası ölkənin birləşdirici mənəvi sütununa çevrildi, bütün dünya azərbaycanlılarını birləşdirən əsas ideya kimi formalaşdı. Milli həmrəylik müstəqil dövlətin uzunmüddətli inkişaf yolunu müəyyənləşdirdi. Tarixi-mədəni irs qorundu, gənc nəslin milli ruhda tərbiyəsi diqqət mərkəzində oldu. Bu proseslər dövlətlə cəmiyyət arasında güclü etimad münasibətlərinin formalaşmasına gətirdi.

- Əli müəllim, qalib və qüdrətli Azərbaycan bu gün Prezident İlham Əliyevin liderliyi ilə inamla inkişaf edərək yeni zirvələr fəth edir…

Bu gün müstəqil Azərbaycan dövləti regionun aparıcı güclərindən birinə çevrilmişsə, bu, məhz Heydər Əliyevin qoyduğu möhkəm təməl üzərində mümkün olmuşdur. Müasir Azərbaycan dövlətçiliyində Heydər Əliyev irsi indi Prezident İlham Əliyevin simasında yeni reallıqlara və çağırışlara uyğun olaraq daha böyük uğurla davam etdirilməkdədir. Xalqın dərin etimadına arxalanaraq və qalib ordumuzun yenilməz qüdrətinə güvənərək Qarabağ məsələsinin ədalətli həllinə nail olmaqla Azərbaycan dünyasına bənzərsiz tarixi Zəfər ruhunu bəxş etmiş Müzəffər Ali Baş Komandanımızın həyata keçirdiyi siyasi xətt də bu kursun məntiqi davamıdır.

Beləliklə, Heydər Əliyev müasir Azərbaycan dövlətinin memarı, İlham Əliyev isə onun qurduğu möhkəm təməl üzərində dövlətimizi XXI əsrin regional güc mərkəzinə çevirən liderdir. Birincinin dediyi “Müstəqilliyi qorumaq” şüarı ilə ikincinin “Tarixi ədaləti bərpa etmək” missiyası birləşərək müasir Azərbaycan reallığını formalaşdırır. Bu gün ölkəmizin inkişafı, təhlükəsizliyi və beynəlxalq nüfuzu məhz bu siyasi irsin davamlılığının bariz sübutudur. Dövlət başçımızın dediyi kimi, “Bizim siyasətimizin təməlində Heydər Əliyev siyasəti dayanır. Bu siyasət müstəqilliyi qorudu, dövlətçiliyi möhkəmləndirdi və Azərbaycanın gələcəyini təmin etdi.”