YENİ AZƏRBAYCAN PARTİYASI

-Malik müəllim, 2020-ci ili başa vurmağa saylı günlər qalır. Hər ilin, hər günün bir hesabat olduğunu nəzərə alsaq, bu ili necə xarakterizə edərdiniz?

- Başa çatmaqda olan 2020-ci ilin  dünyada əsas mövzusu COVID-19-la  mübarizə, regionda isə  Ermənistan silahlı qüvvələrinin müxtəlif istiqamətlərdən hücumlarının qarşısının  Azərbaycan Ordusu tərəfindən qətiyyətlə alınması,  44 günlük İkinci Qarabağ müharibəsinin  Azərbaycanın Qələbəsi ilə tarixə yazılması,  yeni reallıqların yaradılmasıdır.
Pandemiyaya qarşı mübarizəyə gəldikdə, Azərbaycan həm ölkə daxilində, həm də beynəlxalq müstəvidə  bu ümumi bəlaya qarşı mübarizə üzrə operativ tədbirlər görüb və görməkdə davam edir. Ümumdünya Səhiyyə Təşkilatının ilk gündən Azərbaycanla bağlı proqnozu belə olub ki, ölkəmiz  bu mübarizədən az itki ilə çıxacaq.

2020-ci ilin  mühüm hadisələrindən biri  ölkəmizdə növbədənkənar parlament seçkilərinin keçirilməsidir.  Məlum olduğu kimi, ötən ilin sonlarında ölkənin ictimai-siyasi həyatında aparıcı rol oynayan, qəbul etdiyi qərarları, irəli sürdüyü təşəbbüsləri ilə Azərbaycanın  hərtərəfli inkişafına dəstək olan, milyonların sevgisini, etimadını qazanan  Yeni Azərbaycan Partiyası ölkədə həyata keçirilən təkmil islahatların qanunverici orqanda da öz əksini tapması üçün  parlamentin buraxılması və növbədənkənar parlament seçkilərinin keçirilməsi təşəbbüsü ilə çıxış etdi. Prosedur qaydalarına uyğun olaraq atılan addımlardan sonra möhtərəm Prezidentimiz İlham Əliyevin Sərəncamı əsasında bu il fevralın 9-da növbədənkənar parlament seçkiləri keçirildi. Bu  seçkilər nəticəsində çoxpartiyalı parlament formalaşıb və bu, demokratiyanın inkişafında önəmli addımdır. Milli Məclisin, həmçinin komitələrin rəhbərliyində müxalifət nümayəndələrinin təmsil olunması siyasi sistemdə təkmilləşmənin bariz nümunələrindəndir. VI çağırış Milli Məclisin ilk iclasında Prezident İlham Əliyev bu məqamı xüsusi qeyd etdi ki, indiki genişmiqyaslı islahatlar dövründə siyasi islahatlar mütləq aparılmalıdır. Siyasi islahatlar partiyalararası geniş dialoq aparılmadan həyata keçirilə bilməz. Azərbaycanın yeni siyasi konfiqurasiyası formalaşır. Atılan addımlar nəticəsində ölkədə  çoxpartiyalı sistem daha da möhkəm əsaslar üzərində qurulacaq.  9 fevral tarixi, eyni zamanda, yeni, təkmil, müasir parlamentin formalaşmasının başlanğıcı oldu.  Dövlətimizin başçısı qeyd edilən çıxışında   parlamentin yeni heyətinə mühüm  tövsiyələr verərək bu əminliyini ifadə etdi ki,  altıncı çağırış Milli Məclis də uğurla fəaliyyət göstərəcək və beləliklə, ölkəmizdə aparılan genişmiqyaslı və çoxşaxəli islahatlara, onların dərinləşməsi işinə öz töhfəsini verəcək. Yeni parlamentin formalaşmasından  ötən qısa müddətdə qəbul olunan qanun layihələri, həmçinin bəzi qanunlara əlavə və dəyişikliklərin  edilməsi təkmilləşmənin müasir dövrün tələbləri sırasında olduğuna, ən əsası dövlətimizin başçısı İlham Əliyevin tövsiyələrinə uyğun olaraq qanunvericilik bazası hazırlanarkən kəmiyyətə deyil, keyfiyyətə üstünlük verildiyini təsdiqləyir. Eyni zamanda, möhtərəm Prezidentimiz həmin proqram və tövsiyə xarakerli çıxışında millət vəkillərini ölkədə gedən proseslərdə fəal iştirak etməyə, seçiciləri ilə mütəmadi görüşərək onların problemləri ilə yaxından tanış olmağa və  icra orqanları qarşısında qaldırmağa çağırışlar etmişdir. Vətəndaş məmnumnluğunun artırılması, ölkə ictimaiyyətini narahat edən məsələlərin öz həllini tapması dövlətimizin başçısı İlham Əliyevin daim  gündəmdə saxladığı məsələlər sırasındandır. 

- Cənab İlham Əliyevin  son 17 ildə atdığı hər bir addım “Mən hər bir Azərbaycan vətəndaşının Prezidenti olacağam” vədinin reallıqda təsdiqidir. Günümüzün bu gerçəkliyini necə şərh edərdiniz?

- Möhtərəm Prezidentimiz İlham Əliyevin son 17 ildə   fəaliyyətinin əsasında  dövlətə,  xalqa  xidmət etmək, hər bir azərbaycanlının Prezidenti olmaq, dövlətçiliyimizi hər vasitə ilə möhkəmləndirmək amalı dayanıb. 2003-cü il oktyabrın 1-də müasir müstəqil Azərbaycan dövlətinin qurucusu,  ulu öndər Heydər Əliyev  xalqa müraciətində bu əminliyi ifadə etmişdir ki,  həm İlham Əliyev, həm də Yeni Azərbaycan Partiyası bundan sonra da xalqımızın ən layiqli övladlarını öz ətrafında sıx birləşdirərək Azərbaycan dövlətinin inkişafı və xalqımızın firavanlığı yolunda çox işlər görəcəklər. Axıra çatdıra bilmədiyim taleyüklü məsələləri, planları, işləri Sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm.

    Cənab İlham Əliyevin 17 illik fəaliyyəti, yeni inkişaf modeli əsasında Azərbaycana davamlı uğurlar qazandırması  bu inamın, etimadın real həyatda təsdiqidir. Son 17 ilə qısa nəzər salanda  dövlətimizin başçısı İlham Əliyevin  həyata keçirdiyi  siyasətin  strateji hədəfinin  güclü Azərbaycan dövlətinin formalaşdırılması,  ölkə iqtisadiyyatının inkişaf etdirilməsi, müasir iqtisadi, sosial və mədəni infrastrukturun yaradılması, əhalinin sosial rifahının təmin edilməsi, sosial dövlət konsepsiyasının  inkişaf etdirilməsi,  ölkəmizin beynəlxalq münasibətlər sistemində yeri və rolunun möhkəmlənməsi,  güclü və müasir ordunun yaradılması, ümumiyyətlə, bu məqsədlərə çataraq yeganə problemimiz olan Ermənistan-Azərbaycan Dağlıq Qarabağ münaqişəsinin ədalətli həlli olduğunu görürük.  Cənab İlham Əliyevin islahatlar kursu ölkəmizin hərtərəfli inkşafını təmin etdi, ən əsası “Azərbaycan 2020: gələcəyə baxış” İnkişaf Konsepsiyasına uyğun olaraq Azərbaycanın inkişaf etmiş ölkələr sırasında addımlamaq istəyini reallığa çevirdi.

Azərbaycanın yeni iqtisadi və sosial çağırışların müzakirəsi üçün ideal məkan kimi qəbul edilməsi, həmçinin dünyanın yeni xarici siyasətinin Azərbaycanda müzakirə olunması və sair kimi biri-birindən önəmli addımlar ölkəmizin beynəlxalq münasibətlər sistemində yeri və rolunu daha da möhkəmləndirir. Azərbaycan ötən dövrdə özünü dünyaya sosial dövlət kimi təqdim edib. Dövlətimizin siyasətində insan amilinə dəyər cənab İlham Əliyevin 2003-cü ildə irəli sürdüyü “neft kapitalını insan kapitalına çevirək” tezisində  özünün aydın ifadəsini tapdı. Bu baxımdan ki, bu tezis özündə yalnız  elmə, texnologiyalara, təhsilə qoyulan vəsaiti deyil,  Azərbaycan vətəndaşına hər yerdə hörmətin olunmasını, dövlət məmurlarının xalqın qayğıları ilə yaşayıb onların problemlərinin həllinə dəstək olmalarını ehtiva edir.  Prezident öz şəxsi nümunəsi ilə bütün məmurlara xalqla bir yerdə olmalarının vacibliyini örnək göstərir. Daim öz xalqının yanında olmaq, onun çətinliklərinə, problemlərinə həssaslıqla yanaşıb onların operativ həlli istiqamətində əsas tədbirlər görmək Prezident İlham Əliyevin fəaliyyətinin əsasıdır. Möhtərəm Prezidentimiz İlham Əliyevin  50 illiyində  Ağcabədi rayonunun  Taxtakörpü ərazisində Laçın rayonundan olan 552 məcburi köçkün ailəsi üçün yeni yaşayış qəsəbəsinin açılışında iştirak etməsi bu gün də ölkə ictimaiyyəti tərəfindən böyük rəğbət hissi ilə xatırlanır. Prezidentimizin ən xoş anını, sevincini  paylaşmaq üçün ictimaiyyətlə görüşə daha çox maraq göstərməsi, səmimiyyəti ona olan sevgini, etimadı daha da artıran məqamlardandır. Xatırlasaq, həmin açılış mərasimində cənab İham Əliyev bildirmişdir ki, bu, müvəqqəti yaşayış məntəqəsidir. Torpaqlarımız işğalçılardan azad olunandan sonra bütün köçkünlər üçün Laçında, Kəlbəcərdə, Ağdamda hələ ki, işğal altında olan digər torpaqlarda bundan da gözəl evlər tikəcəyik: “Mən buna şübhə etmirəm. Biz öz ərazi bütövlüyümüzü mütləq bərpa edəcəyik. Mən bu barədə fikirlərimi dəfələrlə bildirmişəm, bir daha demək istəyirəm ki, bu, sadəcə olaraq sözlər deyil, sadəcə olaraq bizim arzularımız deyil, bu, həqiqətdir.”

Doğma yurd-yuvalarından  didərgin düşmüş soydaşlarımızın yanında olmaq, onların arzularını, istəklərini dinləmək cənab İlham Əliyev üçün hər zaman önəmli olub. 44 günlük İkinci Qarabağ müharibəsi Azərbaycanın Qələbəsi, Ermənistanın kapitulyasiyası ilə başa çatdıqdan sonra ölkə Prezidenti, Müzəffər Ali Baş Komandan İlham Əliyevin və xanımı Mehriban Əliyevanın  işğaldan azad edilmiş torpaqlarımıza-Cəbrayıl, Füzuli və Ağdama  səfər etmələri, Qələbə sevincini ilk olaraq xalqla paylaşmaları da bu  birliyin, həmrəyliyin təzahürüdür. Ölkə Prezidenti daim xalqa arxalandığını, xalqdan güc aldığını bildirir. 44 günlük Vətən müharibəsi bu birliyin sarsılmazlığını bir daha nümayiş etdirdi.

-Malik müəllim, şanlı Qələbəmizə gedən yola bir nəzər salmağınızı istərdik. Artıq  zaman hakimliyini, tarix yaddaşlığını ortaya qoyaraq işğalçı Ermənistanın və ona havadarlıq edən dövlətlərin 30 il danışıqları imitasiya naminə, vaxt uzatmaq üçün apardıqlarını təsdiqlədi...     

 - Dövlətimizin başçısı İlham Əliyevin xalqa müraciətlərində, xarici mətbuata müsahibələrində qeyd etdiyi kimi, 44 günlük Vətən  müharibəsi həqiqət anı idi. Kimin haqqın-ədalətin, kimin şərin, kimin dostun, kimin düşmənin yanında olduğu bir daha açıqlandı. Bu, 44 günlük müharibə dövrünün reallıqlarıdır. 30 ilə baxış fonunda  isə  Ermənistanın işğal altında saxladığı torpaqları öz xoşu ilə vermək istəmədiyi, havadarlarının isə beynəlxalq hüququ, ədaləti kobud şəkildə pozaraq təcavüzkara bu niyyətini gerşəkləşdirməkdə yardımçı olduğu açıq-aydın görünür. Ermənistanın yeni ərazilər uğrunda müharibə planı olduğunu rəsmi Bakı ən yüksək tribunalardan bəyan edirdi.

Bu il işğalçı Ermənistan Azərbaycana  qarşı 3 dəfə hərbi təxribat törədib. İyulun 12-də Ermənistan-Azərbaycan dövlət sərhədinin Tovuz istiqamətində  Ermənistan  silahlı qüvvələri Azərbaycan mövqelərinə artilleriya atəşi ilə zərbə endirdilər və bu hərbi təxribat nəticəsində  hərbçilərimiz həlak oldu, yaralandılar.  Ermənistan  torpaqlarımızı işğal etmək istəyini nümayiş etdirdi. Amma Azərbaycan Ordusu  layiqli cavab verərək onları yerinə oturtdu. Bu əməliyyatın da  Azərbaycan Ordusunun şanlı tarixində öz yeri var.  Necə ki, 2016-cı ildə Aprel döyüşlərində Azərbaycan Silahlı Qüvvələri düşmənə dərs verdi, Ağdərə, Füzuli, Cəbrayıl rayonlarının bir hissəsini düşməndən azad etdik. İki il bundan əvvəl – 2018-ci ildə uğurlu Naxçıvan əməliyyatı nəticəsində on min hektardan çox torpaq sahəsi Azərbaycan Ordusu tərəfindən götürüldü və işğalçılar o bölgələrdən qovuldu.

  Bu ilin  avqust ayında Azərbaycana diversiya qrupu göndərildi. O diversiya qrupu da zərərsizləşdirildi. Sentyabrın 27-də Ermənistan silahlı qüvvələrinin  müxtəlif istiqamətlərdən Azərbaycan ərazilərinə hücumları zamanı  kəndlərimiz, hərbi mövqelərimiz artilleriya atəşinə məruz qaldı, mülki şəxslər, hərbçilər arasında itkilər oldu.  Dövlətimizin başçısı İlham Əliyevin bəyanatında qeyd edildiyi kimi, “artıq yetər, bu işğala son qoyulmalıdır və son qoyulacaqdır” söylədik.  Ölkə Prezidenti, Ali Baş Komandan İlham Əliyevin “Azərbaycan əsgəri irəli, torpağımızı azad etməliyik” əmrinə uyğun olaraq ordumuz əks-hücum əməliyyatlarını uğurla davam etdirərək 44 günlük Vətən müharibəsini Azərbaycanın siyasi Qələbəsi ilə başa vurdu.

-Malik müəllim, bugünün reallıqları belə ümumiləşdirmə aparmağa əsas verirmi müasir müstəqil Azərbaycan dövlətinin qurucusu, ulu öndər Heydər Əliyev xalqın təkidli tələbi ilə hakimiyyətə qayıdışı ilə Xilaskarlıq missiyasını yerinə yetirərək, möhtərəm Prezidentimiz İlham Əliyev isə Azərbaycanın ərazi bütövlüyünü bərpa  edərək adlarını  tarixə qızıl hərflərlə yazdılar?

Əlbəttə. Ümummilli Lider yeni Azərbaycan qurdu. O Azərbaycan ki, bu gün möhkəm bünövrəsi olan binaya bənzədilir. Mərtəbələrinin sayı gündən-günə artdıqca, daha möhtəşəm, qürurverici görünür. Azərbaycan   ulu öndər Heydər Əliyevin  düşünülmüş və məqsədyönlü siyasəti nəticəsində   yaradılan möhkəm təməl üzərində con 17 ildə daha da zirvələrə yüksəlir.  Yeni əsrin yeni lideri olan Prezident İlham Əliyev  öz praqmatik və müdrik siyasəti ilə Azərbaycanı daim irəli aparır. Xalqımız ölkə Prezidentinin ətrafında dəmir yumruq kimi birləşib.  Azərbaycan irəliyə doğru inamla addımlayır.  44 günlük İkinci Qarabağ müharibəsində qazanılmış möhtəşəm Zəfər bunun ən yeni sübutudur. Möhtərəm Prezidentimiz İlham Əliyevin rəhbərliyi ilə günbəgün qüdrətlənən,  güc toplayan Azərbaycan xalqı, onun rəşadətli Ordusu düşməni torpaqlarımızdan qovdu, üçrəngli bayrağımızı  işğal altında olan bütün torpaqlarımızda dalğalandırdı, ərazi bütövlüyümüzü bərpa etdi,   Azərbaycan əsgəri öz qanı, canı bahasına 30 illik işğala son qoydu.  Azərbaycan Prezidenti İlham Əliyev bu Zəfərin memarı, İkinci Qarabağ müharibəsinin  əsl qəhrəmanı, Azərbaycanın ərazi bütövlüyünü bərpa edən Lider kimi adını əbədi olaraq tarixə yazdı. Dövlətimizin başçısı İlham Əliyevin Sərəncamı əsasında Qarabağın ürəyi Şuşamızın işğaldan azad olunduğu günün- 8 noyabrın Zəfər Günü kimi təsis edilməsi, Qələbəmizin  dünyaya təqdimatı kimi dəyərləndirilən Zəfər paradının keçirilməsi bir daha  sübut etdi ki, Azərbaycan xalqı yenilməz, məğrur xalqdır. Daim xalqı ilə bir olan, onun xoşbəxt gələcəyini düşünən  Liderə milyonların sevgisi, etimadı  şəksizdir. Zəfər paradında dost, qardaş Türkiyənin Prezidenti Rəcəb Tayyib Ərdoğanın ifadə etdiyi bu əminliyi bir daha xatırlatmaq istərdik: “Azərbaycan qardaşım İlham Əliyevin liderliyi altında dastan yazmağa davam edəcək.” Bu fikirlər beynəlxalq səviyyədə etiraf edilir ki, Prezident İlham Əliyev praqmatik siyasətçidir. Hadisələri, prosesləri dəqiqi qiymətləndirir, mühüm məsələlərin elmi cəhətdən  əsaslandırılmış həlli yollarını təqdim edir, verdiyi bütün vədləri  gerçəkləşdirir.

Zəfərimiz günbəgün qüdrətlənən, ən islahatçı ölkələr sırasında qərarlaşan Azərbaycanın qarşısında yeni imkanlar açacaq. Zəfərin mübarək Azərbaycan! Eşq olsun Ali Baş Komandana! Eşq olsun Azərbaycan Ordusuna! Yeni ilə Zəfərinlə addımla məğrur, yenilməz Azərbaycan xalqı!