Xəbərlər
Şəhid Elməddin Hüseynzadənin oxuduğu sinfə adı verilib
T.İsmayılov adına 1 nömrəli tam orta məktəbin məzunu, rayonun Vətən müharibəsi şəhidi çavuş Hüseynzadə Elməddin Fərman oğlunun oxuduğu sinfə adı verilib.
Tədbir məktəbin foyesində şəhid çavuş Hüseynzadə Elməddin Fərman oğlunun xatirəsinə asılmış lövhənin açılışı ilə başlayıb.
Sonra şəhidin oxuduğu sinifdə davam edən tədbirdə əvvəlcə ölkəmizin müstəqilliyi və ərazi bütövlüyü uğrunda öz canından keçən bütün şəhidlərin əziz xatirəsi bir dəqiqəlik sükutla yad edilib.
Şəhid çavuş Hüseynzadə Elməddinin ibtidai sinif müəlliməsi Süleymanova Kəmalə Elməddinlə bağlı xatirələrindən danışıb. Sonra şəhid Elməddinin uşaqlıq dövründəki şəkil və videolarından hazırlanmış videoçarx izlənilib.
Tədbirdə YAP Bərdə rayon təşkilatının sədri Fəqət Şadlinskaya çıxış edərək bildirib ki, Vətən müharibəsində Silahlı Qüvvələrimizin Müzəffər Ali Baş Komandanı cənab İlham Əliyevin rəhbərliyi ilə rəşadətli ordumuz qazandığı Qələbə ölkəmizin tarixinə qızıl hərflərlə yazıldı. Ölkəmizin ərazi bütövlüyü bərpa edildi. Qəhrəman oğullarımızın Vətən uğrunda göstərdiyi fədakarlıqlar bu gün dövlətimiz tərəfindən yüksək qiymətləndirilir. Onların hər biri orden və medallarla təltif olunmuş, ailələri dövlətin diqqət və qayğısı ilə əhatə olunmuşlar.
Tədbirdə həmçinin Təhsil şöbəsinin müdir əvəzi Ədalət İsmayılov, Milli Məclisin deputatı Fatma Yıldırımın köməkçisi Fuad Ağayev, məktəbin direktor əvəzi, “H.Əliyev Prospekti” ərazi partiya təşkilatının sədri Liza Cabbarova və şəhid anaları çıxış etmiş, ölkə Prezidenti, müzəffər Ali Baş Komandan cənab İlham Əliyevin rəhbərliyi altında sarsılmaz xalq Ordu bilriyinin gücü ilə qazanılan böyük Qələbədən danışmış, şəhid ailələri və qazilərə göstərilən diqqət və qayğıya görə ölkə Prezidenti cənab İlham Əliyevə və ölkənin birinci vitse prezidenti Mehriban xanım Əliyevaya minnətdarlıqlarını bildirmişlər.
Daha sonra məktəblilərin hazırladıqları kompozisiya nümayiş etdirilib və vətənpərvərlik tədbirlərində fərqlənən şagirdlərə Fəxri fərman verilib.
