YENİ AZƏRBAYCAN PARTİYASI

Yeni Azərbaycan Partiyası dünənin, bu günün və gələcəyin partiyasıdır!
ÜZVLƏRİN SAYI: 0
BİZƏ YAZIN

MÜSAHİBƏLƏR

Azərbaycanın sosial-iqtisadi inkişafı onun gücünü artırır, beynəlxalq müstəvidə mövqeyini möhkəmləndirir

   Milli Məclisin Regional məsələlər komitəsinin üzvü Tahir Rzayev

- Tahir müəllim, məlum olduğu kimi yanvarın 29-da  Prezident İlham Əliyevin iştirakı ilə “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının dördüncü ilinin yekunlarına həsr olunan konfrans keçirilib. Konfransın əhəmiyyəti və ötən dövrdə əldə olunan nəticələr haqqında nə deyə bilərsiniz?

- Ümumiyyətlə, bu tipli toplantıların keçirilməsi atıq ənənə halını alıb. Ölkəmizin sosial-iqtisadi inkişafı ilə bağlı hər il rüblük, yarım illik və ilin yekunlarına dair Nazirlər Kabinetinin iclasları keçirilir. Dövlət proqramlarının illik yekunlarına da dair konfranslar da keçirilir. Bu, bir hesabatdır. Görülən işlərin nəticələrini təhlil etmək və qarşıda duran vəzifələri müəyyənləşdirmək baxımından belə tədbirlər çox böyük əhəmiyyət kəsb edir.

Bu baxımdan,  “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının dördüncü ilinin yekunlarına həsr olunan konfrans  çox vacibdir. Konfransda Azərbaycan Prezidenti İlham Əliyev təkcə ötən bir ilin deyil, bütövlükdə son 14 ilin sosial-iqtisadi göstəricilərini xatırlatdı. Dövlət başçısı vurğuladı ki, əldə olunan yüksək nəticələrə ilk növbədə ictimai-siyasi sabitlik  sayəsində nail olunub. Çünki sabitlik olmayan yerdə hansısa inkişafdan söhbət gedə bilməz. Dünyada baş verən mürəkkəb, ziddiyyətli proseslər fonunda Azərbaycanda sabitlik hökm sürür, milli həmrəylik var. Bu amillər isə inkişafımızın əsasını təşkil edir.

Son 14 ilin nəticələri də bu reallığı təsdiqləyir. Belə ki, bu dövrdə iqtisadiyyatımız 3,2 dəfə, qeyri-neft iqtisadiyyatı isə 2,8 dəfə artıb. Sənaye sahəsində 2,6 dəfə, kənd təsərrüfatında isə 1,7 dəfə artım müşahidə olunur. Qeyri-neft ixracımız 4,1 dəfə artıb.

Ötən dövrdə 30 elektrik stansiyası tikilib, qazlaşdırma 93 faizdir. İçməli su təminatına gəlincə, bu göstərici ölkə üzrə  14 il əvvəl 26 faiz idisə, hazırda  67 faizdir. Hazırda regionlarda su-kanalizasiya sisteminin yaradılması istiqamətində də böyük işlər görülür. Eləcə də, bölgələrdə  4 böyük su anbarı tikilib. Taxtakörpü, Şəmkirçay, Göytəpə və  Tovuzçay su anbarları tikilib istifadəyə verilib ki, bu da böyük ərazilərin su təminatında mühüm rol oynayır.

Konfransda dövlət başçısının qeyd etdiyi kimi 14 il ərzində 12 min 300 kilometr yol, 443 körpü tikilib. Yol infrastrukturunun yeniləşdirilməsi  iqtisadiyyatın yüksəlməsinə böyük təsir göstərməklə yanaşı, əhaliyə həyat rahatlığı verir.

Yəni bütün görülən işlər Azərbaycanın sosial-iqtisadi inkişafına böyük töhfələr verir. Bütövlükdə, hər bir sahədə qazanılan nailiyyətlər Azərbaycanın gücünü artırır, beynəlxalq müstəvidə də mövqeyini möhkəmləndirir. Davos İqtisadi Forumunun Azərbaycan iqtisadiyyatına verdiyi qiymət, onun hesabatlarında ölkəmizin irəliləməsi hər birimizdə qürur yaradır. Çünki dünyanın ən mötəbər bir qurumunun mövqeyi ən obyektiv və düzgün yanaşmadır. Bütün bunlar göstərir ki, Azərbaycan Ümummilli lider Heydər Əliyevin ideyaları və Prezident İlham Əliyevin rəhbərliyi ilə uğurla inkişaf edir. Azərbayanın yolu doğru yoldur və biz bu yolu davam edərək gələcəkdə daha böyük nailiyyətlər əldə edəcəyik.

- Son illər ölkəmizin regionlarında sosial infrastruktur quruculuğu da uğurla həyata keçirilib. Bu amilin əhəmiyyəti nədən ibarətdir?

- Ölkəmizdə həyata keçirilən sosial siyasət əhalinin rifahının daha da yüksəlməsinə xidmət edir. Bu baxımdan, ötən dövr ərzində əhəmiyyətli işlər görülüb. Təkcə, ötən il ərzində  221 min yeni iş yeri açılıb ki, onların 177 mini daimidir. 14 il ərzində isə  ölkəmizdə 1,9 milyon iş yeri yaradılıb ki, onlardan 1,4 milyonu daimi iş yeridir. Ancaq bu dövrdə  əhalinin  1,5 milyon nəfər artması nəzərə alınsa, gələcəkdə də bu prosesin davamlı olacağını deyə bilərik.

Digər mühüm məqam ondan ibarətdir ki, Azərbaycanda işsizlik 5 faiz, yoxsulluq isə 5,4 faiz səviyyəsindədir. Bütün bunlarla yanaşı, Azərbaycanda sosial infrastruktur quruculuğu da uğurla davam edir və 2017-ci ildə də bu istiqamətdə mühüm işlər görülüb. Dövlət başçısının vurğuladığı kimi ötən il ölkəmizdə 133 yeni məktəb tikilib, 14 məktəb əsaslı təmir edilib, 500-ə yaxın məktəbdə isə cari təmir aparılıb. Eləcə də, bu dövrdə 30 tibb müəssisəsi tikilib və əsaslı təmir edilib. Son 14 il ərzində isə  3100-dən çox məktəb, 642 tibb müəssisəsi tikilib, yaxud təmir edilib. Qarşıdakı dövrdə də investisiya proqramına əsasən sosial infrastruktur quruculuğu davam etdiriləcək.

- Qarşıda duran əsas hədəflərdən biri kənd təsərrüfatını daha da inkişaf etdirməkdir. Dövlət başısı bu məsələ ilə bağlı konfrasda müvafiq tövsiyə və tapşırıqlarını verib...  

- Azərbaycanda 2004-cü ildən uğurla reallaşdırılan regionların sosial-iqtisadi inkişafına dair Dövlət proqramları çərçivəsində bölgələrimizin siması əhəmiyyətli dərəcədə dəyişməkdədir. Bölgələrlə paytaxt arasında fərqin minimuma enməsində və bəhs olunan müsbət dinamikanın yaranmasında Prezident İlham Əliyevin respublikanın hərtərəfli və tarazlı inkişafına göstərdiyi diqqət, siyasi iradə əsas amil rolunda çıxış edib. Dövlət proqramlarında nəzərdə tutulan tədbirlərin, müxtəlif istiqamətləri əhatə edən layihələrin reallaşdırılması sayəsində respublikanın bölgələrində yeni müsbət reallıqlar yaranıb və hədəflərə çatmaq üçün sistemli tədbirlər həyata keçirilir.
Bu hədəflər sırasında aqrar sektorda istehsalın artırılması xüsusi yer tutur. Qeyd edim ki, respublikamızda aqrar sektorun inkişafı ilə bağlı qarşıya qoyulan məqsədlərə çatmaq üçün genişmiqyaslı tədbirlər həyata keçirilir. Ölkədə 2004-cü ildən bəri uğurla reallaşdırılan regionların sosial-iqtisadi inkişafına dair müvafiq Dövlət proqramların icrası çərçivəsində aqrar sektorda daha böyük həcmlərdə istehsal imkanlarının yaradılmasına hesablanan çoxsaylı layihələr həyata keçirilib, həmçinin perspektiv üçün də yeni layihələr nəzərdə tutulub.
Son illərdə regionlarda müasir təsərrüfat subyektlərinin yaradılması ölkəmizdə aqrar sektorun yeni yanaşmalar əsasında inkişaf etdirilməsinə yaxşı nümunədir. Hazırda respublikamızda iri fermer təsərrüfatlarının yaradılması uğurla həyata keçirilir. İndiyədək dövlət başçısının tapşırığına uyğun olaraq ölkəmizin 20 rayonunda 44 min hektardan çox sahədə 22 sahibkarlıq subyekti tərəfindən 32 iri fermer təsərrüfatı yaradılıb. Ümumi dəyəri 181 milyon manat olan bu təsərrüfatların yaradılmasına 72,4 milyon manat dövlət güzəştli kreditləri verilib. İri fermer təsərrüfatlarında məhsuldarlıq hər hektardan arpa və buğda üzrə 58-60, qarğıdalı üzrə isə təxminən 120 sentner təşkil edir. Regionlarda istixanaların salınması da çox geniş vüsət alıb. Respublikanın bölgələrində əsasən ixraca hesablanan istixanaların yaradılması təşəbbüsünü Prezident İlham Əliyev irəli sürüb. Dövlət başçısının çağırışına uyğun olaraq hazırda 400 hektardan çox sahədə yeni, müasir istixana kompleksləri yaradılır. Artıq bir sıra bölgələrdə fəaliyyətə başlayan istixanalarda yüksək məhsuldarlığa nail olunur.
Ölkəmizdə Prezident İlham Əliyevin aqrar sahədə intensiv texnologiyaların tətbiqi ilə bağlı tapşırığına uyğun olaraq həmçinin aqroparkların yaradılmasına başlanılıb. İndiyədək ölkənin regionlarında 10 min hektar ərazidə 2 aqropark yaradılıb. Bunlar Xaçmaz rayonunda “Yalama Aqroparkı” və qərb bölgəsində “Şəmkir Aqroparkı”dır.

Perspektivdə Azərbaycanın bölgələrində aqroparkların sayı daha da artacaq. Hazırda ölkə ərazisində aqroparkların yaradılması güclü şəkildə təşviq olunur. Yeni yaradılan aqroparklar həm bitkiçilik, həm də heyvandarlıq istiqamətlidir. Bu aqroparklarda 10 min yeni iş yerinin açılması nəzərdə tutulur. On aqropark üzrə dəyəri 390 milyon manat olan 13 layihəyə investisiya təşviqi sənədi verilib. Hazırda Hacıqabul, Goranboy, Samux, Ağcabədi, Qax, Salyan, Kürdəmir, Şamaxı, Saatlı, Cəlilabad, Füzuli və İsmayıllı rayonlarında 58 min hektar ərazidə 12 aqroparkın yaradılmasına başlanılıb. Aqroparklar tam fəaliyyətə başladıqdan sonra kənd təsərrüfatında daha böyük nəticələr əldə olunacaq.  

Konfransda cənab Prezident kənd təsərrüfatının inkişafı ilə bağlı qarşıda dayanan vəzifələr barədə fikirlərini bildirdi və konkret tapşırıqlarını verdi. Şübhəsiz ki, qarşıda duran vəzifələr də uğurla icra olunacaq və biz bu sahədə böyük  inkişafın şahidi olacağıq. 

- Tahir müəllim, regionların sosial-iqtisadi inkişafı təmsil etdiyiniz Ağcabədi rayonunda özünü necə göstərir?

- Ağcabədi rayonu sosial-iqtisadi baxımdan respublikanın ən inkişaf edən rayonlarından biridir. Rayonumuzda hazırda böyük sənaye müəssisələri tikilib istifadəyə verilir, eləcə də aqropark yaradılır. Ötən  il Prezident İlham Əliyev rayonumuza  səfər etdi və səfər çərçivəsində bir sıra müəssisələrin açılışını etdi. Onların sırasında çörək zavodunun, Olimpiya-İdlman Mərkəzinin, Dövlət  Bayraq Muzeyinin açılışını xatırlada bilərəm.  

Ümumiyyətlə, Prezident İlham Əliyev dəfələrlə Ağcabədi rayonunda səfərdə olub və 20-dən çox müəssisənin, obyektin  açılışında iştirak edib. Hazırda rayonda su- kanalizasiya layihəsi bitmək üzrədir. Ağcabədi respublika üzrə ən çox pambıq istehsal edən  rayonlardan biridir. Bu gün rayonda elektrik enerjisi problemi yoxdur. Rayonun əksər kəndləri asfaltlaşdırılıb, qazlaşdırılıb. Cəmi bir neçə kəndə qaz çəkilməyib ki, yaxın zamanlarda bu məsələ də həll olunacaq. Bütövlükdə, Ağcabədi əhalisinin həyat səviyyəsini daha da yaxşılaşdırmaq üçün görülən işlər bundan sonra da davam etdiriləcək.