Xəbərlər
Azərbaycan-Türkiyə-Pakistan birliyinin məramı sülh və sabitlik naminə əməkdaşlıqdır
Sahib Şükürov
YAP Göyçay rayon təşkilatının sədri
Mayın 28-də Laçında 28 May - Müstəqillik Gününə həsr olunmuş konsert keçirilib. Konsertdə Azərbaycan Prezidenti İlham Əliyev, Türkiyə Prezidenti Rəcəb Tayyib Ərdoğan və Pakistan İslam Respublikasının Baş naziri Məhəmməd Şahbaz Şərif iştirak ediblər.
Tədbirdə çıxış edən dövlətimizin başçısı bütün Azərbaycan xalqını Müstəqillik Günü münasibətilə ürəkdən təbrik edib. Prezident İlham Əliyev Azərbaycan, Türkiyə və Pakistan əməkdaşlığını ildən-ilə, gündən-günə gücləndirdiklərini, yaxşı günlərdə də, ağır günlərdə də hər zaman bir-birinin yanında olduqlarını bildirib. İkinci üçtərəfli Zirvə görüşündə bir daha strateji əməkdaşlığın təsdiqləndiyini, işğaldan azad edilmiş Laçında, Şərqi Zəngəzurda iki qardaş ölkənin liderlərinin iştirakı ilə keçirilən bugünkü mərasim Azərbaycan-Türkiyə-Pakistan birliyinin, qardaşlığının növbəti təzahürü olduğunu qeyd edib.
Dövlətimizin başçısı çıxışında 30 il ərzində işğal altında qalan Laçın şəhərində birgə olmağın böyük rəmzi məna daşıdığını vurğulayıb. Cənab prezident qeyd edib ki, 44 günlük İkinci Qarabağ müharibəsi zamanı bizi Türkiyə və Pakistan dəstəkləmişdir. “Türkiyənin və Pakistanın dəstəyi bizi ruhlandırırdı, bizə əlavə güc verirdi” - deyən dövlət başçısı bu böyük siyasi və mənəvi dəstəyə görə qardaş ölkələrin rəhbərlərinə, qardaş xalqlara minnətdarlığını bildirib.
Prezident İlham Əliyev çıxışında Azərbaycan Xalq Cümhuriyyətinin yaradılmasından bəhs edərək qeyd edib ki, 107 il bundan əvvəl müsəlman aləmində ilk demokratik respublika - Azərbaycan Xalq Cümhuriyyəti yaradılmışdır. Bu, böyük tarixi hadisə idi. Əfsuslar olsun ki, Azərbaycan Xalq Cümhuriyyətinin ömrü uzun olmadı. İki il sonra - 1920-ci ilin aprel ayında müstəqilliyimiz əlimizdən alınmışdır. Ondan bir neçə ay sonra - 1920-ci ilin noyabr ayında sovet Rusiyası tərəfindən Qərbi Zəngəzur bölgəsi Azərbaycandan ayrılıb Ermənistana birləşdirilmişdir. Bu, böyük ədalətsizlik idi və Azərbaycan xalqı buna oxşar ədalətsizliklərlə tarix boyu üz-üzə qalmışdır. Ancaq xalqımızın iradəsi və qardaş xalqların dəstəyi bizə güc verirdi, bizi ruhlandırırdı və iradəmizi gücləndirirdi.
Dövlətimizin başçısı 1991-ci ildə Sovet İttifaqı dağılandan sonra Azərbaycan öz dövlət müstəqilliyini bərpa etdiyini, ancaq Ermənistanın işğalçılıq siyasəti Azərbaycana böyük faciələr gətirdiyini, müstəqillik elan olunandan dörd ay sonra Ermənistan dövləti xalqımıza qarşı soyqırımı törətdiyini, Xocalı soyqırımı nəticəsində 613 günahsız insan, o cümlədən 106 qadın, 63 uşaq bir gecə içində vəhşicəsinə öldürüldüyünü diqqətə matdırıb. Prezident İlham Əliyev müstəqillik elan olunandan yeddi ay sonra Laçın erməni işğalına məruz qaldığını, ondan əvvəl Şuşa şəhərinin işğal olunduğunu, Ermənistanın işğalçılıq siyasəti ondan sonra da davam etdirildiyini bildirib.
“Xarici ölkələrin dəstəyi hesabına Azərbaycan ərazisinin təxminən 20 faizi erməni işğalına məruz qalmışdır”, - deyən dövlətimizin başçısı Qarabağ və Şərqi Zəngəzur bölgəsindən 100 minlərlə azərbaycanlı etnik təmizləməyə məruz qaldığını, qaçqın-köçkün həyatına başladığını söyləyib. Azərbaycan dövləti və xalqı bu ədalətsizliklə, bu işğalla heç vaxt barışmadığını, güc topladığını, beynəlxalq müstəvidə daha güclü mövqelərə sahib olmaq üçün çalışdığını vurğulayıb.
Prezident İlham Əliyev çıxışında 44 günlük İkinci Qarabağ müharibəsindən bəhs edərək, döyüş meydanında 300-dən çox şəhər və kəndin, o cümlədən Cəbrayıl, Hadrut, Füzuli, Zəngilan, Qubadlı və Şuşa şəhərlərinin işğalçılardan azad edildiyini bildirib. Dövlətimizin başçısı 2020-ci il noyabrın 9-dan 10-na keçən gecə Ermənistanın kapitulyasiya aktını imzalamağa məcbur olduğunu, bunun nəticəsində bir güllə atılmadan Laçın, Kəlbəcər və Ağdam işğalçılardan azad edildiyini, 2023-cü ildə birgünlük antiterror əməliyyatı isə dövlət suverenliyimizi tam bərpa etdiyini və Azərbaycanda separatizmin kökünün birdəfəlik kəsildiyini diqqətə çatdırıb.
Azad edilmiş bütün torpaqlarda bərpa, quruculuq işlərinin getdiyini bildirən Prezident İlham Əliyev burada böyük infrastruktur layihələrinin icra edildiyini - xəstəxanalar, məktəblər, üç hava limanının tikildiyini, dəmir yolları, avtomobil yollarının salındığını, 70 kilometrə yaxın tunelin inşasının sürətlə getdiyini vurğulayıb. Dövlətimizin başçısı diqqətə çatdırıb ki, Şərqi Zəngəzur və Qarabağ bölgələrimizdə 43 min insan yaşayır və çalışır. Bu bölgəyə həyat qayıdıb, bu bölgənin sahibləri qayıdıblar. Biz qayıtmalıydıq və qayıtmışıq.