Xəbərlər
Avrasiya məkanında təhlükəsizlik və inkişaf modeli
Sahib Şükürov
YAP Göyçay rayon təşkilatının sədri
Azərbaycan Respublikasının Prezidenti İlham Əliyev Pekində Çinin CGTN (China Global Television Network) telekanalına müsahibə verib. Aprelin 25-də həmin televiziya kanalında yayımlanan müsahibədə Dövlətimizin başçısı Çin-Azərbaycan münasibətlərindən danışıb, Çin Xalq Respublikasının Sədri Si Cinpinlə olan dostluğundan bəhs edib, ölkəmizdə həyata keçirilən geniş islahatlardan, müasir və yaşıl sənayelərin qurulmasına keçid barədə məlumat verib, digər mühüm məsələlərə toxunub.
Prezident İlham Əliyev müsahibəsində Çin Xalq Respublikasının Sədri Si Cinpinlə hərtərəfli strateji tərəfdaşlıq əlaqələrinin qurulması haqqında Birgə Bəyanatı imzaladıqlarını, bununlada iki ölkə arasındakı münasibətləri daha yüksək səviyyəyə qaldırdıqlarını bildirib. Eyni zamanda bir çox sahəni əhatə edən 20-dən artıq sənədin imzalandığını diqqətə çatdırıb.
Dövlətimizin başçısı hər dəfə Çinə gələndə inkişaf, bir çox yeni infrastruktur layihələrini, binaları və gözəl şəhəri gördüyünü vurğulayıb. Çinə ilk səfərinin 2005-ci ildə olduğunu qeyd edən Prezident İlham Əliyev bildirib ki, ötən 20 il ərzində ölkənin sürətli inkişafının və inanılmaz dəyişikliklərin şahidi olmuşam.
Dövlətimizin başçısı müsahibəsində Hərtərəfli Strateji Tərəfdaşlıq Əlaqələrinin Qurulması Haqqında Birgə Bəyanatın mətninin geniş gündəliyinin olduğunu bildirib. Prezident İlham Əliyev hər iki ölkənin milli maraqlara aid məsələlərdə həmrəylik və dostluq nümayiş etdirdiyini, bir-birinin suverenliyini və ərazi bütövlüyünü qətiyyətlə dəstəklədiyini vurğulayıb. Bəyanatın digər hissəsinin ticarət, daşımalar, xalqlararası əlaqələr, humanitar tərəfdaşlıq kimi çox sayda məsələləri əhatə etdiyini vurğulayıb.
“Azərbaycan öz bölgəsində bir çox ölkə ilə və həmçinin bəzi Avropa ölkələri ilə Strateji Tərəfdaşlıq haqqında bəyanatlar imzalayıb, lakin Çin ilə Bəyanat onların daxilində ən güclüsüdür. Məhz buna görə bu sənədin xüsusi vacibliyi bir daha göz qarşısındadır”, - deyə Prezident İlham Əliyev əlavə edib.
“Çinin keçdiyi tərəqqi yolu bizim üçün ilham mənbəyi olmuşdur. Səlahiyyətlərimə başlayanda mənim əsas məqsədim ölkədə siyasi və sosial sabitliyi qorumaq idi. O vaxt ölkə çox yoxsul idi. Əlbəttə ki, bizə müdaxilələr olunurdu, yürütdüyümüz siyasətə təsir göstərmək cəhdləri edilirdi, müxtəlif Qərb dairələri tərəfindən daxili işlərimizə müdaxilələr olunurdu. Belə bir vəziyyətdə siyasi sabitliyi və təhlükəsizliyi qorumaq bir nömrəli vəzifə idi. Çünki mən aydın dərk edirdim ki, bunsuz biz inkişaf edə bilmərik. Belə də oldu”, - deyən Azərbaycan Prezidenti qeyd edib ki, güclü iqtisadiyyat qurmağa başladıq.
Dövlət başçısı bu gün Azərbaycanın xarici borcunun ÜDM-in 7 faizindən az, mübadilə olunan valyuta ehtiyatları xarici borcundan 14 dəfə çox olduğunu diqqətə çatdırıb. Prezident İlham Əliyev əlavə edib ki, işsizlik, yoxsulluq səviyyəsini 5 faizə endirdik, iqtisadiyyatımızı şaxələndirdik. Beləliklə, Çin burada çox mühüm rol oynayır. Dövlət başçısı başçısı bu vaxtadək Çin şirkətlərinin investorlarla, Azərbaycanın yaşıl enerjisinə sərmayə yatıran şirkətlərlə podratçı qismində çalışdıqlarını bildirib. Dövlət başçısı qeyd edib ki, bizim imzaladığımız və icra fazasında olan müqavilələr bizə 2030-cu ilə qədər 6500 meqavat bərpaolunan enerji verəcək. Azərbaycanın ümumi quraşdırılmış gücü 8 min meqavat təşkil edir. Beləliklə, beş ildən sonra biz demək olar ki, elektrik enerjisinin bugünkü tutumunu iki dəfə artırmış olacağıq - 6 min meqavat Günəş və külək elektrik enerjisindən əldə olunacaq, 500 meqavat hidroelektrik stansiyalarından gələcək.
Prezident İlham Əliyev Azərbaycanın artıq küçələrdə hərəkət edən elektriklə işləyən 160 avtobus aldığını, əlavə 200 avtobusun alınması üçün podrat müqaviləsi bağlanıldığını bildirib. Dövlət başçısı diqqətə çatdırıb ki, bu il Azərbaycanda ildə 500 avtobus istehsal etmək gücündə olan BYD-nin elektrik avtobuslarının birgə istehsalına başlanılacaq.