Xəbərlər
YAP Nizami rayon təşkilatı “Konstitusiya və Suverenlik İli” çərçivəsində Şahmat turniri keçirib
Yeni Azərbaycan Partiyası (YAP) Nizami rayon təşkilatı “Konstitusiya və Suverenlik İli” çərçivəsində Ümummilli Lider Heydər Əliyevin anadan olmasının 102-ci ildönümü münasibətilə Şahmat turniri keçirib.
Turnir Azərbaycan Respublikasının Dövlət Himninin səsləndirilməsi, Ulu Öndər Heydər Əliyevin, eləcə də ölkəmizin ərazi bütövlüyü və suverenliyi uğrunda mübarizədə canlarını qurban vermiş şəhidlərimizin xatirəsinin bir dəqiqəlik sükutla yad edilməsi ilə başlayıb.
Qeyd olunub ki, turnirdə Nizami rayonunun 25 təhsil müəssisəsindən qız və oğlan təmsilçi olmaqla 50 nümayəndə iştirak edib, öz məharətini və intellektini göstərib. Onlar arasında yarış Olimpiya sistemi üzrə keçirilib.
Gərgin mübarizə şəklində gedən turnirdə qızlar arasında birinci yerin qalibi 229 saylı tam orta məktəbin şagirdi Mehin Məstiyeva, ikinci yerin sahibi 70 saylı tam orta məktəbin şagirdi Xədicə Babazadə olub, üçüncü yeri isə 1 nömrəli İdman liseyi PHŞ-nin şagirdi Lamiyə Məmmədova və 227 saylı orta məktəbin şagirdi Ləman Nağıyeva tutublar. Oğlanlar arasında isə birinci yerin qalibi 251 saylı orta məktəbin şagirdi Cavad Mürsəlzadə, ikinci yerin sahibi 32 saylı orta məktəbin şagirdi Orxan Bağırov olub, üçüncü yeri də 229 saylı orta məktəbin şagirdi Məhəmməd Eldarlı və “Zəngi” liseyinin şagirdi İsmayıl İsmayılzadə tutublar.
Sonra mükafatlandırma mərasimi keçirilib.
Mərasimdə YAP Nizami rayon təşkilatının sədri Ramil Vəlibəyov, Nizami Rayon İcra Hakimiyyəti başçısının müavini Könül Həsənova və başqaları çıxış ediblər. Bildirilib ki, Ulu Öndər Heydər Əliyev dövlətimizin və xalqımızın hər bir uğurunda, inkişafın hər bir məqamında, hər bir nailiyyətində minnətdarlıqla, sevgi ilə xatırlanır. Çünki onların hər birində Heydər Əliyev izləri, Heydər Əliyev töhfələri vardır. Qürurla yaşadığımız müstəqil Azərbaycan Heydər Əliyevin şah əsəridir. Azərbaycan Ümummilli Lider Heydər Əliyevin müəllifi olduğu məqsədyönlü və müdrik siyasət nəticəsində mövcud inkişafa nail olub. Azərbaycan daha böyük yüksəlişə Prezident İlham Əliyevin rəhbərliyi altında Heydər Əliyev yolu ilə uğurla gedir.
Çıxışlardan sonra təltifetmə olub, qaliblərə diplomlar, medallar, hədiyyələr və kuboklar, yarış iştirakçılarına isə sertifikatlar təqdim olunub.
