Xəbərlər
Azərbaycan-Almaniya əməkdaşlığı region üçün xüsusi əhəmiyyət daşıyır
Fəsli Nəbiyev
YAP Gənclər Birliyinin sədr müavini
Aprelin 2-də Almaniya Federativ Respublikasının Prezidenti Frank-Valter Ştaynmayerin Azərbaycana rəsmi səfəri iki ölkə arasında münasibətlərin inkişafında yeni mərhələnin başlanğıcı kimi dəyərləndirilir. Azərbaycan Prezidenti İlham Əliyev ilə keçirilən görüşlərdə geniş spektrli məsələlər müzakirə olunub və tərəflər əməkdaşlığın daha da dərinləşdirilməsi üçün güclü iradə nümayiş etdiriblər.
İqtisadi əlaqələr xüsusilə diqqət mərkəzində olub. Prezident İlham Əliyev vurğulayıb ki, bu ilin ilk iki ayında Azərbaycanla Almaniya arasında ticarət dövriyyəsi üç dəfə artıb ki, bu da əsasən xam neft ixracının həcminin yüksəlməsi ilə bağlıdır. Bununla yanaşı, bərpaolunan enerji sahəsində əməkdaşlıq potensialı yüksək qiymətləndirilib. Azərbaycan 2030-cu ilə qədər 6 giqavatlıq yaşıl enerji istehsalı hədəfləyir və bu sahədə Almaniya şirkətlərinin təcrübəsi xüsusi əhəmiyyət kəsb edir.
COP29 beynəlxalq iqlim konfransının uğurlu keçirilməsi də bu əməkdaşlığın nümunəsidir. Prezident Əliyev qeyd edib ki, Almaniya bu prosesdə Azərbaycanın vacib tərəfdaşlarından biri olub. Təəssüf doğuran yeganə məqam isə Ermənistanın bu konfransı boykot etməsi olub.
Səfər zamanı regionda sülh prosesi də müzakirə edilib. Prezident İlham Əliyev Azərbaycanın işğaldan azad olunmuş torpaqlarda bərpa işləri və Ermənistanla sülh dialoqu istiqamətində atdığı addımlar barədə məlumat verib. O bildirib ki, 30 illik münaqişəyə baxmayaraq, bu gün iki ölkənin mövqeləri sülhə doğru xeyli yaxınlaşıb.
Bu səfər Almaniya Prezidentinin Azərbaycana ilk rəsmi səfəri kimi tarixə düşür və ikitərəfli münasibətlərin yeni, daha güclü mərhələsinə təkan verir. Enerji, iqlim, iqtisadiyyat və sülh gündəliyinin ortaq nöqtələrdə birləşməsi iki ölkəni daha da yaxınlaşdırır.