Xəbərlər
Birgə addımların atılması davamlı uğurlara yol açır
Sahib Şükürov
YAP Göyçay rayon təşkilatının sədri
Aprelin 2-də Azərbaycan Respublikasının Prezidenti İlham Əliyev ölkəmizdə rəsmi səfərdə olan Almaniya Federativ Respublikasının Prezidenti Frank-Valter Ştaynmayerlə mətbuata bəyanatlarla çıxış ediblər.
Dövlətimizin başçısı çıxışında həm təkbətək görüşdə söhbət əsnasında, həm də nümayəndə heyətlərinin iştirakı ilə aparılan danışıqlarda Almaniya-Azərbaycan əlaqələrinin gələcək inkişafının müzakirə edildiyini bildirib. Bu səfərin iki ölkə arasındakı münasibətlərə yeni müsbət təkan verəcəyinə əminliyini ifadə edib.
“İqtisadi sahədə əldə edilmiş nəticələr bizi təbii olaraq ruhlandırır. Çünki bu ilin yanvar-fevral aylarında bizim ticarət dövriyyəmiz təxminən üç dəfə artıb” - deyən dövlət başçısı bunun əsas səbəbinin Azərbaycandan Almaniyaya ixrac edilən xam neftin həcminin artması olduğunu vurğulayıb.
Prezident İlham Əliyev onu da qeyd edib ki, gələcək illərdə ticarət dövriyyəsinin şaxələndirilməsi ilə bağlı daha fəal addımlar atmalıyıq, xüsusilə bərpaolunan enerji sahəsində - harada ki, Almaniya şirkətlərinin çox böyük təcrübəsi var, Azərbaycanın da çox böyük proqramı, planları var: “Biz xarici investorların sərmayəsi hesabına 2030-cu ilə qədər bərpaolunan enerji növlərinin istehsal gücünü 6 giqavata çatdırmaq fikrindəyik və bu, tam realdır, bunun bir hissəsi Avropaya ixrac ediləcəkdir”.
Çıxışında dövlət başçısı Azərbaycanın 2024-cü ildə COP29 beynəlxalq iqlim konfransına ev sahibliyi etdiyini, bu istiqamət üzrə ölkəmizin Almaniya ilə çox fəal əməkdaşlığı olduğunu bildirib. Azərbaycan Prezidenti onu da qeyd edib ki, COP29-da 197 ölkəni təmsil edən 77 mindən çox iştirakçı qeydiyyatdan keçmişdir və bu konfrans böyük, uğurlu nəticələrlə zəngin idi.
Cənab İlham Əliyev bəyanatında bir daha mövcud reallıqları, Azərbaycanın 30 il ərzində erməni işğalından əziyyət çəkdiyini, xalqımızın etnik təmizləməyə məruz qaldığını və torpaqlarımızın təxminən 20 faizi işğal altına düşdüyünü diqqətə çatdırıb. Dövlət başçısı təəssüf hissi ilə beynəlxalq təşkilatların bu məsələ ilə bağlı ciddi addım atmadığını qeyd edib. Azərbaycanın bu münaqişəni və beynəlxalq hüququ özü döyüş meydanında və siyasi müstəvidə həll etdiyini, məhz bu tarixi Zəfərimizin sülh danışıqlarına yol açdığını vurğulayıb.
Beləliklə, Almaniya və Azərbaycan arasında münasibətlərin gələcəyi bir çox məsələlərdə yeni imkanların yaranmasını təmin edəcəkdir. Bu əlaqələrin inkişafı hər iki ölkənin qarşılıqlı maraqlarına xidmət edəcək, eyni zamanda regionda və dünyada sülh və sabitliyin bərqərar olmasına mühüm təsir göstərəcəkdir.