Xəbərlər
"Heydər Əliyevin müasir Azərbaycan gəncliyi konsepsiyası”
Yeni Azərbaycan Partiyası (YAP) Yevlax rayon təşkilatı 2 Fevral – Azərbaycan Gəncləri Günü münasibətilə “Dahi Heydər Əliyevin müasir Azərbaycan gəncliyi konsepsiyası” mövzusunda tədbir keçirib.
Tədbirdə əvvəlcə müasir müstəqil Azərbaycanın qurucusu Ulu Öndər Heydər Əliyevin və torpaqlarımızın bütövlüyü uğrunda canlarını fəda etmiş qəhrəman şəhidlərimizin əziz xatirəsi bir dəqiqəlik sükutla yad edilib.
Ümummilli Lider Heydər Əliyevin gənclər siyasətindən bəhs edən sənədli film nümayiş etdirilib.
YAP Yevlax rayon təşkilatının sədri Rafiq Əliyev Azərbaycanda “Gənclər Günü”nün elan olunmasının tarixi əhəmiyyətindən danışıb. Qeyd olunub ki, Heydər Əliyev tərəfindən əsası qoyulmuş dövlət gənclər siyasəti ölkə gəncliyinin inkişafında dərin izlər buraxıb.
O, dövlət gənclər siyasətinin icrasından irəli gələn məsələlər və rayonda bu istiqamətdə görülmüş işlər barədə danışıb.
Partiya fəalları Əlirza Abdullayev, Gülnar Cavadova, Nilufər Abbasova vurğulayıblar ki, Vətən müharibəsində Müzəffər Ali Baş Komandan İlham Əliyevin rəhbərliyi ilə qazanılan və tariximizə qızıl hərflərlə yazılan şanlı qələbəmizi məhz Ulu Öndər Heydər Əliyevin əsasını qoyduğu və Prezident İlham Əliyevin möhkəmləndirdiyi gənclər siyasətinin məntiqi nəticəsi idi.
Tədbirin sonunda YAP Yevlax rayon təşkilatı tərəfindən təltif olunan bir qrup gəncə fəxri fərman və hədiyyələr təqdim olunub.
