Xəbərlər
Nərimanov rayonunda yaşlı nəslin nümayəndələri bələdiyyə seçkilərində fəal iştirak edirlər
Yanvarın 29-da keçirilən Azərbaycan Respublikasında bələdiyyə seçkiləri ilə əlaqədar Bakının Nərimanov rayonunda yaşlı nəslin nümayəndələri arasında daha çox seçici fəallığı müşahidə edilib. Onlar məntəqələrə üz tutaraq öz səsvermə hüquqlarından istifadə edərək layiq bildikləri namizədə səs veriblər.
Nərimanov rayon sakini 82 yaşlı Arif Mustafayev öz xanımı ilə birlikdə yaşadıqları ərazi üzrə 18 saylı Nərimanov-Nizami-Binəqədi seçki dairəsinin 8 saylı seçki məntəqəsinə və 86 yaşlı Camal Qəhrəmanov yaşadığı ərazi üzrə 18 saylı Nərimanov-Nizami-Binəqədi seçki dairəsinin 3 saylı seçki məntəqəsinə gedərək səsvermə hüquqlarından istifadə ediblər.
Qeyd edək ki, bələdiyyə seçkilərində Bakının Nərimanov rayonu üzrə seçki məntəqələrində səhər saatlarından etibarən yüksək seçici aktivliyi və mütəşəkkillik müşahidə olunur.
Rayonda şəhid ailələri bələdiyyə seçkilərində aktiv iştirak edirlər. Bu gün keçirilən bələdiyyə seçkiləri ilə əlaqədar Nərimanov rayonunda yaşayan şəhid ailələri öz səsvermə hüququndan istifadə edərək səs veriblər.
Vətən müharibəsi zamanı qəhrəmancasına şəhid olmuş baş leytenant Azad Hümbətovun atası Arif Hümbətov öz ailəsi ilə birlikdə yaşadığı ərazi üzrə 19 saylı Nərimanov birinci seçki dairəsinin 10 saylı seçki məntəqəsinə gedərək səsvermə hüququndan istifadə edib.
