Xəbərlər
Şəki seçiciləri YAP-ın namizədlərini dəstəkləyirlər
Azərbaycan Respublikasında 2025-ci il yanvarın 29-na təyin edilmiş bələdiyyə seçkilərinin təşviqat mərhələsi çərçivəsində Şəki rayonu, Kiş bələdiyyəsi üzrə Yeni Azərbaycan Partiyasının (YAP) namizədlərinin seçicilərlə görüşü keçirilib.
YAP Şəki rayon təşkilatının sədri Daşqın Mikayılov seçkilərin vətəndaşlara yerli səviyyədə qərarların qəbulunda iştirak etmək imkanı verdiyinə və cəmiyyətin ehtiyaclarına uyğun xidmətlərin göstərilməsini təmin etdiyinə görə seçiciləri seçkilərdə fəal iştirak etməyə dəvət edib. Təşkilat sədri vurğulayıb ki, YAP həmişə olduğu kimi, xalqın rifahını təmin etmək və ölkənin davamlı inkişafını təmin etmək məqsədilə seçkilərə ciddi hazırlıq görür.
Tədbirdə çıxış edən təşviqat qrupunun üzvü, şəhid anası Dursun Cavadova, bələdiyyə üzvlüyünə namizədlər Tofiq Məmmədov, Bəxtiyar Güliyev qeyd ediblər ki, bələdiyyələr yerli özünüidarəetmə orqanı kimi, cəmiyyətin gündəlik ehtiyaclarını qarşılamaq və yerli problemlərin həllini təmin etmək üçün mühüm rol oynayır. Onlar əhalinin rifahını artırmaq məqsədilə sosial, iqtisadi və mədəni layihələrin həyata keçirilməsinə məsuliyyət daşıyırlar. YAP-ın namizədləri söz veriblər ki, yeni formalaşacaq bələdiyyələrdə təmsil olunmaq hüququ qazanacaqları halda öz fəaliyyətlərini məhz bu hədəflər istiqamətində quracaq və onlara göstərilən etimadı əməli işləri ilə doğruldacaqlar.
Seçicilər Nəzir Kərimov və Güldəmir Alıyev YAP-ın fəaliyyətini dəstəklədiklərini və bələdiyyə seçkilərində partiyanın namizədlərinə səs verəcəklərini vurğulayıblar.
