Xəbərlər
YAP Biləsuvar rayon təşkilatının yaradılmasının 32-ci ildönümü qeyd edilib
Yeni Azərbaycan Partiyası (YAP) Biləsuvar rayon təşkilatının təsis edilməsinin 32-ci ildönümü qeyd edilib.
Tədbir iştirakçıları əvvəlcə Ulu Öndər Heydər Əliyevin rayon mərkəzindəki abidəsini ziyarət ediblər.
YAP rayon təşkilatının akt zalında keçirilən tədbirdə əvvəlcə Ulu Öndər Heydər Əliyevin və torpaqlarımızın suverenliyi və ərazi bütövlüyü uğrunda canlarını qurban vermiş şəhidlərin əziz xatirəsi ehtiramla yad edilib.
Tədbiri giriş sözü ilə açan YAP Biləsuvar rayon təşkilatının sədri Kamil Qurbanlı iştirakçıları təbrik edərək təşkilatın təsis olunduğu dövrün tarixi şəraiti, o zaman baş verən ictimai-siyasi hadisə və proseslər barədə məruzə ilə çıxış edib. O, bildirib ki, Yeni Azərbaycan Partiyası 21 noyabr 1992-ci il tarixində Naxçıvan şəhərində təsis edildikdən sonra Ulu Öndər Heydər Əliyevin şəxsiyyətinə sadiqlik nümunəsi olaraq 12 yanvar 1993-cü ildə ilk rayon təşkilatı məhz Biləsuvar rayonunda yaradılmışdır. Natiq ötən 32 illik müddət ərzində partiyanın rayon təşkilatı üzvlərinin Heydər Əliyev ideologiyasına, Azərbaycan dövlətçiliyinə daim sədaqət nümayiş etdirdiklərini qeyd edib.
Partiya veteranları Valeh Sefiyev, Əjdər Niftiyev, Rayon Ağsaqqallar Şurasının sədri Akif Kazımov öz çıxışlarında YAP Biləsuvar rayon təşkilatının uğurlu fəaliyyətinə nəzər salıblar. Natiqlər Yeni Azərbaycan Partiyasının Azərbaycan tarixinin son dərəcə ağır və keşməkeşli günlərində, ölkənin ciddi sınaqlarla üz-üzə qaldığı bir dövrdə ölkə ziyalılarının təşəbbüsü və fəal iştirakı ilə yarandığını qeyd ediblər.
Sonda Yeni Azərbaycan Partiyasının yaranması və inkişaf tarixindən bəhs edən videoçarx nümayiş etdirilib.
