Partiya xəbərləri
YAP Gənclər Birliyinin iclası keçirilib
Dekabrın 6-da Yeni Azərbaycan Partiyası (YAP) Gənclər Birliyinin iclası keçirilib.
İclasda YAP Gənclər Birliyinin 2024-cü il ərzində həyata keçirdiyi işlər və gələcək fəaliyyət istiqamətləri müzakirə edilib.
YAP Gənclər Birliyinin sədri Bəxtiyar İslamov 2024-cü ildə Birliyin fəaliyyətinin Yeni Azərbaycan Partiyası Mərkəzi Aparatının tövsiyə və tapşırıqlarına uyğun təşkil edildiyini vurğulayıb. O, “Yaşıl dünya naminə həmrəylik ili” çərçivəsində “Yaşıl dünya üçün innovasiyalar” Rəqəmsal İdeya Müsabiqəsi və ümumrespublika “Nə? Harada? Nə zaman?” intellektual oyununun keçirildiyini bildirib. Bu tədbirlərin gənclərin innovasiyayönümlü potensialını üzə çıxarmaq, həmrəylik ruhunu gücləndirmək və ekoloji maarifləndirməyə dəstək vermək məqsədi daşıdığı vurğulanıb.
İclasda ali təhsil müəssisələrində fəaliyyət göstərən “YENİ Klub”ların əhatə dairəsinin genişləndirilməsi və fəaliyyətlərinin inkişaf etdirilməsi üçün təkliflər irəli sürülüb, eləcə də YAP Gənclər Birliyinin qarşıdakı 6 aylıq fəaliyyət planı müzakirə olunub. Bu çərçivədə 2025-ci ildə tələbələrin intellektual potensialını, liderlik bacarıqlarını inkişaf etdirmək, yaradıcı təşəbbüslərini artırmaq və onları innovativ fəaliyyətlərə təşviq etmək məqsədilə daha çox layihənin reallaşdırılması qərara alınıb.
