Xəbərlər
Deputat Elman Nəsirov seçiciləri ilə görüş keçirib
Milli Məclisin deputatı Elman Nəsirov 72 saylı Cəlilabad kənd seçki dairəsinə daxil olan Təklə kəndində seçicilərlə görüş keçirib.
Görüşdə Təklə kəndi ilə yanaşı, Abazallı, Şabanlı, Məmmədrzalı və Kövüzbulaq kənd sakinləri də iştirak ediblər.
Görüş zamanı Təklə kənd sakinləri Famil İsmayılov, Əyyar İbişov, Əli Əliyev, Bəşir Tağıyev, Şabanlı kənd sakinləri Səlim Şabiyev, İsrafil Nuriyev, Məmmədrzalı kənd sakinləri Mirzəağa Dövlətov, Əli Mahmudov, Kövüzbulaq kənd sakini Süleyman Süleymanov və Abazallı kənd sakini Arif Əliyev onların sosial problemlərinin həlli istiqamətində göstərilən böyük diqqət və qayğıya görə Prezident İlham Əliyevə öz təşəkkürlərini ifadə ediblər.
Seçicilər əsasən işlə təminat, kəndlərin işıq və qazlaşdırılması, həyətyanı və örüş torpaq sahələri, içməli su ilə təminat və sosial məsələlərlə bağlı müraciətlər ediblər. Qaldırılan məsələlərin bir hissəsi yerindəcə öz həllini tapıb.
Deputat Elman Nəsirov digər məsələlərlə bağlı aidiyyatı üzrə müvafiq qurumlara müraciət edəcəyini bildirib.
