Xəbərlər
Mübariz və qətiyyətli
2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təşviqat mərhələsi çərçivəsində Yeni Azərbaycan Partiyası (YAP) tərəfindən 91 saylı Göyçay seçki dairəsindən deputatlığa namizədliyi irəli sürülmüş Fərid Əkbərovun Göyçay rayonu, Alxasava kəndində seçicilərlə görüşü keçirilib.
Görüşdə çıxış edən YAP Göyçay rayon təşkilatının sədri Sahib Şükürov deputatlığa namizəd Fərid Əkbərov haqqında seçicilərə məlumat verib. S.Şükürov bütün seçkilərdə inamlı zəfərlər əldə edən Yeni Azərbaycan Partiyasının bu dəfə də möhtəşəm qələbə qazanacağına inamını ifadə edib: “Hesab edirəm ki, bundan sonrakı dövrdə regionun inkişafı daha böyük vüsət alacaq. Artan iqtisadi gücümüz, aparılan islahatlar daha böyük işlərin görülməsinə vəsilə olacaq”.
Çıxış edən deputatlığa namizəd Fərid Əkbərov əvvəlcə YAP-ın seçki platforması haqqında məlumat verərək, YAP-ın “Yeni dövrə Yeni Azərbaycanla!” şüarı ilə qatıldığını, Prezident İlham Əliyevin həyata keçirdiyi uğurlu siyasət nəticəsində Azərbaycanın böyük inkişaf yolu keçdiyini qeyd edib. F.Əkbərov seçiciləri parlament seçkilərində fəal iştirak etməyə səsləyib.
Tədbirdə, həmçinin təşviqat qrupunun üzvləri Zahidə Mirzəliyeva, Namət Şirinov, Əlisafa Bəykişiyev və digərləri çıxış edərək seçiciləri sentyabrın 1-də keçiriləcək seçkilərdə fəal iştirak etməyə və ən layiqli namizədə səs verməyə çağırıblar.
Seçicilər adından çıxış edən Alxasava kənd sakinləri 1 sentyabr seçkilərində YAP-ın namizədinə səs verəcəklərini vurğulayıblar.
