Xəbərlər
Xalqlarımız arasında dərin hörmət və münasibətlər var
Nihad Pənahov
YAP Tovuz rayon təşkilatının sədri
Belarus Prezidenti Aleksandr Lukaşenko 16-17 may tarixlərində ölkəmizdə dövlət səfərində oldu. Xarici siyasətində ikitərəfli əməkdaşlığa xüsusi önəm verən Azərbaycanın tarixi Zəfərimizdən sonra bu istiqamətdə qazandığı uğurların miqyası genişliyi ilə diqqətdədir. Təkcə may ayı ərzində reallaşan səfərlərə diqqət yetirmək kifayətdir. Möhkəm təməl üzərində qurulan əlaqələrin inkişafı üçün yeni imkanlar açılır. Hazırkı dövrdə ölkəmizin əsas hədəflərinin regionda dayanıqlı sülhün və təhlükəsizliyin təmin edilməsi, işğaldan azad edilmiş ərazilərdə genişmiqyaslı bərpa-quruculuq işlərinin aparılması olduğunu nəzərə alsaq dövlətimizin başçısının səfərlər çərçivəsində ikitərəfli əlaqələrin inkişafı üçün mövcud sahələrdə olan imkanlarla yanaşı, bu məsələlərə də xüsusi diqqət göstərməsi diqqətdən kənarda qalmır. Bir mühüm məqamı da xüsusi vurğulamaq istərdik ki, işğaldan azad edilmiş ərazilərimizdə bərpa-quruculuq işlərinə başlanan gündən cənab İlham Əliyev dost ölkələrin bu prosesdə iştirakını istədiyimizi bildirdi. Dost ölkələrin bərpa-quruculuq işlərinə dəstəkləri, hədiyyələri münasibətlərimizin inkişafında öz sözünü deyir.
Cənab İlham Əliyev mətbuata birgə bəyanatında vurğuladı ki, aparılan danışıqlar - təkbətək və geniş tərkibdə görüşlər ölkələrimizin mehriban dostlar olduğunu bir daha əyani şəkildə nümayiş etdirir. Münasibətlərimizin son illərdə inkişafını müfəssəl şəkildə təhlil və bu münasibətlərin dinamik inkişafını qeyd etdik, həmçinin daha da mühüm olanı - gələcəkdə qarşılıqlı fəaliyyət yollarını müəyyənləşdirdik. Müzakirə etdiyimiz məsələlərin hamısı kifayət qədər konkret xarakter daşıyır. İlk növbədə, söhbət sənaye kooperasiyasından, Belarusda, Azərbaycanda birgə istehsalın təşkili və artıq bir çox illər öncə yaradılmış birgə istehsal potensialının artırılmasından gedir. Bu, ilk növbədə, maşınqayırmadır. Həmçinin hərbi-sənaye kompleksində, kənd təsərrüfatında, nəqliyyatda əlaqələrin inkişafı məsələləri, başqa sözlə desək, ölkələrimizin iqtisadiyyatının inkişafı üçün praktiki əhəmiyyət daşıyacaq məsələlər geniş şəkildə müzakirə olundu.
Prezident İlham Əliyev sözügedən mətbuata bəyanatında bu məqama da diqqət yönəltdi ki, dünyada vəziyyət sürətlə və bir qayda olaraq mənfi istiqamətdə dəyişir. Yeni münaqişələr, yeni qeyri-sabitlik ocaqları yaranır. Təəssüf ki, bir qayda olaraq mövcud münaqişələr öz həllini tapmır. Azərbaycan beynəlxalq hüquqa, BMT Təhlükəsizlik Şurasının qətnamələrinə, BMT-nin Nizamnaməsinə və bütün dünya ictimaiyyətinin bu gün tanıdığı beynəlxalq humanitar hüquqa tam uyğun olaraq hərbi-siyasi yolla öz münaqişəni həll etdi. Dövlətimizin başçısı hazırda işğaldan azad edilmiş ərazilərimizdə aparılan genişmiqyaslı bərpa-quruculuq işlərindən geniş bəhs etdi. Vurğulandı ki, ərazini sıfırdan bərpa etmək lazım gəlir. Müqayisə üçün qeyd edildi ki, Livanın bütün ərazisi, üstəgəl bütün bu ərazinin 50 faizi qədər sahəni əhatə edir: “Bütün bunları, sadəcə, daşın daş üstündə qalmadığı ərazidə görüləcək işləri təsəvvür etmək üçün söylədim. İşğal illərində hər şey dağıdılıb. İnfrastrukturu, yaşayış sahələrini, ictimai binaları, tarixi abidələri və digərlərini sıfırdan bərpa etmək lazım gəlir. Ona görə də Belarus şirkətlərini bu prosesə fəal qoşulmağa dəvət edirik.”
Belarus Prezzidenti bu prosesə dost dəstəyini göstərməyə hazır olduqlarını bildirdi və bu istəyini “Biz sizə qardaş və çox dost ölkəyik, təkcə İlham Heydər oğlu ilə köhnə dostlar deyilik, bizim Heydər Əliyev ilə də yaxşı münasibətlərimiz var idi. Uzun müddət olmasa da, onunla çox səmimi şəkildə çalışırdıq. Mən hələ sovet dövründə bu insana böyük hörmət bəsləyirdim. İlham Heydər oğluna tez-tez deyirəm ki, təbiət nadir hallarda övlada atanın istedadını bəxş edir. Siz çox işlər görmüsünüz. Bu gün ona birbaşa dedim ki, siz cənnətdə yaşayırsınız. Sizin təbiətiniz cənnətdir. Torpaqlarınızı qaytarmağınız və onu dirçəltməyiniz əsrlər boyu, uzun illər yaddaşlarda qalacaq. Bütün bunları ona görə deyirəm ki, əgər həmin torpaqların dirçəldilməsi üzrə bu böyük prosesdə bizə yer tapılarsa, onda bu yükün altına girməyə hazırıq və bu, sizin üçün sərfəli olacaq. Məsuliyyətlə bildirirəm ki, biz bunu böyük məmnuniyyətlə və dünyada heç kimin edə bilməyəcəyi səviyyədə edəcəyik. Çünki Belarusun və Azərbaycanın qardaş xalqları arasında dərin hörmət və münasibətlər var” fikirləri ilə təsdiqlədi. Aleksandr Lukaşenko, həmçinin bu arzunu ifadə etdi ki, dost kimi və mənim şəxsən dostum kimi Sizə və qardaş Azərbaycan xalqına bu ağır dirçəliş dövrünü itkilərsiz başa vurmağı və qarşınıza qoyduğunuz planları yerinə yetirməyi arzu edirəm: “Əminəm ki, Siz bunu edəcəksiniz, həm də istərdim ki, tez edəsiniz, Siz bunu bacarırsınız. Siz bütün dünyaya göstərdiniz ki, Sizdən əvvəlki nəsillərin dövründə həll olunmayan ən mürəkkəb məsələləri həll etməyi bacarırsınız.”
Belarus Prezidenti Aleksandr Lukaşenkonun səfər çərçivəsində işğaldan azad edilmiş ərazilərimizə- Şuşaya və Füzuliyə səfəri, işğal dövründə burada törədilən dağıntılarla yanaşı, Azərbaycanın qısa müddətdə hər bir işi sıfırdan başlayaraq genişmiqyaslı bərpa-quruculuq işlərini yaxından görmək istəyi böyük etimada və təmələ əsaslanan dostluğun, qardaşlığın təqdimatı oldu.