YENİ AZƏRBAYCAN PARTİYASI

Şəhla Abdullayeva

YAP Ucar rayon təşkilatının sədri

Müasir müstəqil Azərbaycan Ulu Öndər Heydər Əliyevin şah əsəridir. Bu fikir özündə dünənimiz, bu günümüz və gələcəyimizlə bağlı bütün məqamları ehtiva edir. Bu fikrin davamı olaraq dövlət başçısı İlham Əliyev bildirdi ki, Heydər Əliyevin əsəri olan müasir Azərbaycan dövləti daha da qüdrətli, zəngin, hərtərəfli inkişafa nail olacaq.

Təbii ki, bu əminlik möhkəm təmələ, Ümummilli Lider Heydər Əliyevin müəyyənlənləşdirdiyi və gələcəyə hesablanmış inkişaf strategiyasına əsaslanır. Ulu Öndərin hakimiyyətinin hər iki dövrü  xalqa, dövlətə xidmət nümunəsidir. Hakimiyyətinin birinci mərhələsində, 1969-82-ci illərdə Azərbaycanı keçmiş İttifaqın ən geridə qalmış respublikasından qabaqcıl ölkəyə çevirən Ümummilli Lider müstəqil ölkəmizin sənaye və iqtisadi potensialını məhz o illərdə formalaşdırmışdır. Heydər Əliyev zəkası bütün sədləri yararaq və qarşıya çıxan heç bir çətinliyə baxmayaraq Azərbaycanı olduqca  mürəkkəb zamanın dalğaları arasından çıxarıb həm bölgədə, həm də dünyada layiqli yer qazandırdı. Onun ürəyi Azərbaycanın müstəqil gələcəyi, xalqımızın xoşbəxtliyi üçün çırpınmışdır. O, Azərbaycanın ən çətin anlarında onu xilas etmək üçün misilsiz fədakarlıq göstərmiş, ölkəsini bəlalardan qurtarmağı bacarmışdır. Ümummilli Liderin formalaşdırdığı və inkişaf etdirdiyi azərbaycançılıq fəlsəfəsi Azərbaycanın müasir dünyada xüsusi yerini müəyyən etdi, milli dövlətçiliyimizin bünövrəsini təşkil edərək dünya azərbaycanlılarının həmrəyliyi üçün möhkəm zəmin yaratdı. Azərbaycan tarixinin 1969-cu ildən bəri yaşanan dövrü Ulu Öndər Heydər Əliyevin adı ilə bağlıdır və tariximizə Heydər Əliyev dövrü kimi həkk olunub. Bu dövrün isə Azərbaycanın gələcək taleyi baxımından başlıca məzmunu azərbaycançılıqdır.

Azərbaycana rəhbərliyinin birinci dövründə Ümummilli Lider Heydər Əliyev özünün qeyri-adi idarəçilik bacarığı, polad iradəsi və yüksək vətənpərvərliyi sayəsində, uzaqgörən və məqsədyönlü qərarları ilə çox qısa müddətdə respublikamızda sosial-iqtisadi, elmi-texniki və mədəni sahələrin inkişafında böyük sıçrayışa nail oldu. Azərbaycanın beynəlxalq aləmdə elmi-texniki, iqtisadi və mədəni əlaqələrinin genişləndirilməsi üçün göstərdiyi səylər xüsusi qeyd edilməlidir. Bu mühüm addımlar dahi şəxsiyyətin gələcəyin müstəqil Azərbaycanını nəzərdə tutaraq milli məfkurənin yüksəlişi və xalqın milli dövlətçilik arzularının daha da güclənlənməsi üçün dövlət quruculuğu sahəsində gördüyü işlərin tərkib hissəsi idi. Müxtəlif ölkələrdə yaşayan azərbaycanlılar arasında əlaqələrin qurulmasına xüsusi diqqət göstərildi.  Keçmiş İttifaq respublikalarında, digər xarici ölkələrdə Azərbaycan mədəniyyəti və incəsənəti günlərinin keçirilməsi də bu məqsədə xidmət edirdi.

Tariximizin gedişatının və həyatımızın ahənginin köklü surətdə dəyişdiyi, azadlıq və müstəqillik duyğularının milli düşüncəmizdə üstünlük təşkil etməyə başladığı həmin  illər Azərbaycanın quruculuq salnaməsinin ən parlaq səhifələridir. Ulu Öndərin xalqın yaradıcılıq enerjisini bir məqsədə yönəltməklə tarixi yaddaşın bərpası istiqamətindә atdığı qətiyyətli addımlar o dövrdə milli ruhun canlanmasına xidmət göstərdi, özünüdərki və soy-kökə qayıdışı təmin etmiş, müstəqil dövlət quruculuğuna aparan yolun təməl daşına çevrildi. Beləliklə, xalqımızın illərdən bəri sıxılıb qalmış milli dövlətçilik ideyasının gələcəkdə böyük hərəkətverici qüvvəyə çevrilməsi üçün münbit zəmin yarandı. Ümummilli Lider Heydər Əliyev bütün varlığı ilə sevdiyi və canından əziz bildiyi doğma xalqının mənafelərini daim önə çəkmiş və respublikamızın inkişafı üçün malik olduğu bütün imkanlardan istifadə etmişdir. Milli kadrların yetişdirilməsi, milli dilin inkişaf etdirilməsi və istifadəsi, dövlət idarəetmə strukturlarında çalışan məmurların  azərbaycanlı olmasına diqqət göstərilməsi Ümummilli Liderin dövlətinə, xalqına bağlılığının, böyük sevgisinin nümayişi idi.

Ulu Öndər Heydər Əliyevin  fəaliyyətinin Naxçıvan mərhələsi də bu günümüz və gələcəyimizlə bağlı mühüm addımlarla, qəbul edilən qərarlarla  zəngindir. Ümummilli Lider yalnız muxtar respublika  deyil, bütün Azərbaycan üçün həyati əhəmiyyət kəsb edən, dövlət quruculuğu prosesində mayak rolunu oynayan qərarların qəbul edilməsinə nail oldu. Naxçıvan Muxtar Sovet Sosialist Respublikası Ali Sovetinin 1990-cı il noyabrın 17-də keçirilən 12-ci çağırış birinci sessiyasında “Naxçıvan Muxtar Sovet Sosialist Respublikasının adının dəyişdirilməsi haqqında”, “Naxçıvan Muxtar Respublikasının Dövlət rəmzləri haqqında” tarixi qərarlar qəbul edildi. Ulu Öndərimizin sədrliyi ilə keçirilən həmin tarixi sessiyada Azərbaycan Xalq Cümhuriyyətinin üçrəngli bayrağı Naxçıvan Muxtar Respublikasının Dövlət Bayrağı kimi qəbul olundu. Həmçinin Naxçıvan Muxtar Respublikasının ali qanunvericilik orqanı olan Ali Sovetin adı dəyişdirilərək Ali Məclis adlandırıldı. 1991-ci il sentyabrın 3-də Naxçıvan Muxtar Respublikası Ali Məclisinin fövqəladə sessiyasında Ulu Öndər Heydər Əliyev Ali Məclisin Sədri seçildi. Dünya azərbaycanlılarının birliyinə, həmrəyliyinə xidmət edən bu mühüm addımı da xüsusi qeyd etməliyik ki, 1991-ci il dekabrın 16-da Ümummilli Liderimiz Heydər Əliyevin rəhbərliyi ilə keçirilən Naxçıvan Muxtar Respublikası Ali Məclisinin sessiyasında “31 Dekabr Dünya Azərbaycanlılarının Həmrəylik və Birlik Günü haqqında” qərar qəbul olunmuşdur. Tarixi qərar sonrakı dövrdə birliyimizi və həmrəyliyimizi möhkəmləndirdi, Naxçıvandan başlanan Ümummilli Lider Heydər Əliyev xilaskarlıq missiyası xalqımızı vahid ideologiya ətrafında birləşdirərək Milli Qurtuluşa və Qələbəyə qovuşdurdu.

Zamanın hökmü ilə ötən əsrin 90-cı illərində dövlət müstəqilliyini bərpa edən Azərbaycan Ermənistanın təcavüzü, xarici təzyiqlər və daxili çəkişmələr üzündən dünyanın siyasi xəritəsindən silinmək və dövlətçiliyini itirmək təhlükəsi ilə qarşılaşdı. Taleyimizin həll olunduğu ağır bir zamanda xalqın təkidli tələbinə səs verərək Naxçıvandan Bakıya gələn Ulu Öndər  Heydər Əliyev doğma Vətənin xilası naminə misilsiz fədakarlıq nümayiş etdirdi, ölkəmizi ictimai-siyasi pərakəndəliyin və anarxiyanın məngənəsindən qurtardı, bütün sahələrdə müşahidə olunan dərin tənəzzülün qarşısını aldı,  yenidən qurduğu və hər cür qəsdlərdən qoruduğu dövlətin dayanıqlı inkişaf yolunu müəyyən etdi. Onun ölkəmizə rəhbərliyi illəri xalqımızın nadir tarixi imkandan faydalanaraq, böyük əziyyətlər bahasına öz müstəqilliyini əbədi və dönməz etdiyi taleyüklü mərhələdir.

1993-cü ilin may-iyununda ölkədə yaranan gərginlik, mürəkkəb hadisələr Azərbaycanın müstəqilliyi üçün ən böyük təhlükə idi. O vaxt müstəqilliyimizin taleyi həll olunurdu.  Azərbaycanın  düşdüyü ağır iqtisadi, sosial, siyasi-ictimai və mənəvi böhran daha da dərinləşərək  son həddə çatmışdı. Daxili sabitlik pozulmuş, ayrı-ayrı qüvvələrin qarşıdurması, bəzi cinayətkar qrupların, separatçı qüvvələrin respublikanı parçalamaq niyyətlərini həyata keçirmək istəyi vəziyyəti daha da ağırlaşdırmışdı. Belə bir çətin günlərdə Ümummilli Lider Heydər Əliyev ölkəsinin taleyinə biganə qalmadı, xalqın təkidli tələbi ilə hakimiyyətə qayıtdı. Xalqın tələbi ilə 9 iyunda Bakıya qayıdan, həmin ayın 15-də Azərbaycan Ali Sovetinin sədri seçilən, iyunun 24-də isə Milli Məclisin qərarı ilə Azərbaycan Respublikası Prezidentinin səlahiyyətlərini həyata keçirməyə başlayan, 1993-cü il oktyabrın 3-də ümumxalq səsverməsi, milyonların etimadı nəticəsində  Prezident seçilən Ulu Öndər Heydər Əliyev bugünkü və gələcək inkişafımızın əsası olan strategiyanı müəyyənləşdirdi.  Ulu Öndər Heydər Əliyevin yaradıcısı olduğu Yeni Azərbaycan Partiyasının tarixi Zəfərimizin reallıqları fonunda keçirilən VII qurultayında dövlət başçısı İlham Əliyev keçilən yolu təhlil edərək belə bir çağırışı səsləndirdi ki, biz bu tarixi yaxşı bilməliyik. O tarixi yaşamayanlar isə bunu öyrənməlidirlər: “Mən demişəm, bizim dərsliklərdə bu tarixlə bağlı geniş məlumat verilməlidir. O tarixin canlı şahidləri öz xatirələrini bölüşməlidirlər ki, bu tarix əbədi yaşasın.” Prezident İlham Əliyev, eyni zamanda, bildirdi ki, o dövrü bilməyən, o vaxt yaşamayan gənc nəsil nəyin bahasına  müstəqilliyi qoruyub saxladığımızı, kimə  borclu olduğumuzu bilməlidir. Əgər Ulu Öndər Heydər Əliyev o vaxt hakimiyyətə gəlməsəydi, bu gün Azərbaycan bəlkə də ancaq kiminsə əlinin altında bir oyuncaq dövlət, bir yarımmüstəmləkə kimi yaşaya bilərdi: “Biz bu tarixi bilməliyik, bilirik və bundan sonra öz fəaliyyətimizi bu möhkəm təməl üzərində quracağıq, necə ki, bu vaxta qədər qurmuşuq. 1993-2003-cü illər həlledici illər olmuşdur.”

Azərbaycan daim yerləşdiyi coğrafi məkana, malik olduğu təbii resurslara görə dünyanın diqqətində olub. Lakin müstəqilliyimizin bərpasının ilk illərində ölkədə ictimai-siyasi durumun gərginliyi  Azərbaycanla iqtisadi əlaqələrin qurulmasında maraqlı olan dövlətlərin tərəddüdlərinə səbəb olmuşdur. Onlar yatıracaqları investisiyların təhlükəsizliyinə tam əmin deyildilər. 1993-cü ildə Ümummilli Lderin xalqın təkidli tələbi ilə hakimiyyətə qayıdışından sonra ölkədə  sabitliyin, normal iqtisadi mühitin yaradılması həmin dövlətlərin, şirkətlərin tərəddüdlərinə son qoydu. Azərbaycan qısa müddətdə  sabitlik diyarına, böyük  investisiyalar məkanına çevrildi. Ümummilli Lider dünya təcrübəsinə istinadən bildirdi ki, heç bir ölkə təcrübə mübadiləsi olmadan, səylər birləşdirilmədən təkbaşına iqtisadi tərəqqiyə nail ola bilməz. “Əsrin müqaviləsi” Azərbaycanın iqtisadi və siyasi müstəqilliyini möhkəmləndirdi, yeni dostlar, tərəfdaşlar qazanmasına stimul oldu.  2017-ci ildə “Yeni əsrin müqaviləsi”nin imzalanması Azərbaycanın etibarlı tərəfdaş  kimi möhkəmlənən mövqeyinə işıq saldı. Ümummilli Liderin müəllifi olduğu neft strategiyasının uğurları davamlılığı ilə dünyanın diqqətindədir. Azərbaycan regional inkişafın aparıcı qüvvəsi, dünyanın enerji təhlükəsizliyinin təminatçısı kimi rolunu artırır. Tarixi Zəfərimizdən sonra ölkəmizin etibarlı, arzuolunan tərəfdaş kimi mövqeyinin möhkəmləndiyi diqqətdən kənarda qalmır. Artıq Azərbaycan bərpaolunan enerji mənbələri ilə diqqətdədir və bu sahədə əməkdaşlıq üçün geniş imkanlar yaranır. Cənab İlham Əliyevin Sərəncamı ilə 2024-cü ilin ölkəmizdə “Yaşıl dünya naminə həmrəylik İli” elan edilməsi də bir çox məqamlara işıq salır. Bütün bunlar Heydər Əliyev siyasətinin təntənəsidir.

Qeyd etdiyimiz kimi, iqtisadi müstəqillik siyasi müstəqilliyimizi möhkəmləndirdi.   Ümummilli Liderin həyata keçirdiyi siyasətin əsas tərkib hissələrindən biri də  ölkəmizin ətrafında yaradılan informasiya blokadasının yarılması oldu. Ümummilli Lider erməni yalanlarını faktlar əsasında ifşa edərək bir daha sübut etdi ki, Qarabağ Azərbaycanın əzəli torpağıdır. Artıq bu gün tarixin arxivinə atılmış Qarabağ münaqişənin həlli ilə bağlı möhkəm hüquqi bazanın yaradılması istiqamətində məqsədyönlü addımlar atıldı. Ulu Öndər Heydər Əliyev, həmçinin belə bir çağırışı da səsləndirmişdir ki, sülh danışıqlarını cəsarətlə aparmaq üçün güclü ordu olmalıdır. Yaradılan möhkəm təməl əsasında bu gün Azərbaycan Ordusu missiyasını şərəflə yerinə yetirir, Azərbaycana qarşı törədilən hər bir təxribatın qarşısını qətiyyətlə alır. 44 günlük İkinci Qarabağ müharibəsində tarixi Zəfərimiz, ötən ilin sentyabrında həyata keçirilən bir günlük antiterror tədbirləri nəicəsində suverenliyimizin tam bərpa olunması deyilənlərə bariz nümunədir. Heydər Əliyev siyasi kursunun layiqli davamçısı Prezident İlham Əliyev təkmil islahatları, uğurlu siyasəti ilə Azərbaycanı bütün sahələrdə gücləndirdi. Xalqımız tam əmin idi ki, dövlətimizin qətiyyəti sayəsində torpaqlarımız işğaldan azad ediləcək və elə də oldu. Cənab İlham Əliyev böyük inam və qürur hissi ilə bildirir ki, 20 ildə verilən bütün vədlər həyata keçirildi. Yeni dövrün başlanğıcı olan 7 fevral növbədənkənar prezident seçkilərində inamlı qələbə qazanan cənab İlham Əliyev andiçmə mərasimində son 20 ilin uğurları fonunda bu məqamı xüsusi qeyd etdi: “Biz bu gün Ağdamdayıq, Füzulidəyik, Laçındayıq, Cəbrayıldayıq, Zəngilandayıq, Qubadlıdayıq, Kəlbəcərdəyik, Şuşadayıq, Hadrutdayıq, Xocalıdayıq, Ağdərədəyik, Əsgərandayıq, Xankəndidəyik! Bu yeni dövr uğurla başlayır. Əminəm ki, uğurla da davam edəcək.” 

Azərbaycanın uğurlarında Heydər Əliyev Fondunun töhfələrini xüsusi qeyd etməliyik. Yaradılması Ümummilli Lider Heydər Əliyevin doğum gününə təsadüf edən Heydər Əliyev Fondunun fəaliyyətinin 20 ili tamam olur. 20 il zaman baxımından kiçik görünsə də Fondun gördüyü işlərin, həyata keçirdiyi layihələrin və onların uğurlu nəticələrinin miqyası baxımından zəngin bir dövrdür. Cənab İlham Əliyevin 2017-ci ildə imzaladğı Sərəncama əsasən  Heydər Əliyev Fondunun prezidenti Mehriban xanım Əliyeva Azərbaycanın Birinci vitse-prezidenti təyin edildi. Dövlətimizin başçsının sədrliyi ilə keçirilən Təhlükəsizlik Şurasının iclasında cənab İlham Əliyev bu qərarı şərtləndirən amillər sırasında Heydər Əliyev Fondunun çoxşaxəli fıaliyyətini, Mehriban xanım Əliyevanın rəhbərliyi ilə görülən işləri xüsusi qeyd etdi.   “2004-cü ildən bu günə qədər Mehriban Əliyeva Ulu Öndərin adını daşıyan Heydər Əliyev Fondunun prezidentidir” söyləyən Prezident İlham Əliyev bildirdi ki, Heydər Əliyev Fondu onun rəhbərliyi ilə nəinki Azərbaycanın, regionun ən böyük və nüfuzlu ictimai təşkilatına çevrilmişdir. Heydər Əliyev Fondunun çoxşaxəli fəaliyyəti Azərbaycan xalqı tərəfindən yüksək qiymətləndirilir. Fondun təşəbbüsü ilə bir çox önəmli layihələrə, proqramlara start verilmişdir. Onların arasında “Yeniləşən Azərbaycana yeni məktəb” proqramı xüsusi qeyd edilməlidir. Məhz bu proqramın başlanması nəticəsində  ölkəmizdə üç mindən çox məktəb əsaslı təmir olunub və ya yenidən tikilmişdir. Digər layihələr də ölkəmizin hərtərəfli inkişafına xidmət göstərir. Heydər Əliyev Fondunun xətti və dəstəyi ilə minlərlə insan tibbi müalicə ilə təmin edilmişdir. Fondun fəaliyyəti məhz o məqsədi güdür ki, ehtiyacı olan insanlara yardım etsin və ən az müdafiə olunan vətəndaşlara imkan daxilində öz dəstəyini göstərsin. Heydər Əliyev Fondunun mədəniyyətlə, incəsənətlə bağlı layihələri  mənəvi, tarixi, mədəni irsimizin qorunması işində əvəzolunmaz rol oynayır.

Hazırda Heydər Əliyev Fondu işğaldan azad edilmiş ərazilərimizdə tarixi və dini abidələrimizin bərpası, yenidən qurulması işlərini yüksək səviyyədə həyata keçirir. Fondun təşkilatçılığı ilə bu torpaqlarda keçirilən tədbirlər tarixi Zəfərimizin yaratdığı reallıqların dünyaya çatdırılmasında və qəbul etdirilməsində öz sözünü deyir.

Qalib Azərbaycan yeni-yeni hədəflərə doğru inamla addımlayır. Hər bir uğur Heydər Əliyev siyasətinin təntənəsidir. Qarşıdakı illərdə Qarabağlı və Şərqi Zəngəzurlu Azərbaycanı daha möhtəşəm uğurlar gözləyir.