Xəbərlər
Heydər Əliyevin xatirəsinə həsr olunmuş konsert proqramı təşkil edilib
Yeni Azərbaycan Partiyası (YAP) Xocavənd rayon təşkilatı, Qarabağ Regional Gənclər və İdman İdarəsinin Xocavənd rayonu üzrə gənclər və idman sektoru və Xocavənd uşaq musiqi məktəbinin birgə təşkilatçılığı ilə Beyləqan rayonu ərazisindəki 320 ailəlik qəsəbədə Ümummilli Lider Heydər Əliyevin anadan olmasının 101-ci ildönümünə həsr olunmuş konsert proqramı təşkil edilib.
Əvvəlcə YAP Xocavənd rayon təşkilatının sədri Vüsal Hüseynov, Qarabağ Regional Gənclər və İdman İdarəsinin Xocavənd rayonu üzrə gənclər və idman sektorunun müdiri Aslan Quliyev çıxış edərək bildiriblər ki, Azərbaycan dövlətini və millətini zamanın ən çətin sınaqlarından çıxarmış Ümummilli Lider Heydər Əliyevin müstəqil Azərbaycan dövlətinin hərtərəfli inkişafı, milli dövlətçilik ideyasının bərqərar olunması və ölkəmizin beynəlxalq aləmdə nüfuzunun artması naminə göstərdiyi əvəzsiz tarixi xidmətləri olub.
Azərbaycan xalqının Ümummilli Lideri Heydər Əliyevin anadan olmasının 101-ci ildönümünün qeyd olunması, istedadlı uşaq və gənclərin üzə çıxarılması və onlara istedadlarının nümayişi üçün müvafiq şəraitin yaradılması, sakinlərin asudə vaxtlarının səmərəli və mənalı təşkili məqsədi ilə təşkil olunan konsertdə Xocavənd şəhər uşaq musiqi məktəbinin şagirdlərinin ifasında Azərbaycan və Avropa bəstəkarlarının əsərləri təqdim edilib.
