YENİ AZƏRBAYCAN PARTİYASI

Azərbaycan daim dünya güclərinin  ikili standartlara əsaslanan siyasəti ilə üz-üzə olub. Lakin tarixi Zəfərimizdən və suverenliyimizin tam təmin olunmasından ötən dövr ərzində bu yanaşmanın daha açıq müstəviyə keçdiyi diqqətdən kənarda qalmır. Demokratik prinsiplərin inkişafına xidmət etməli olan, əsl həqiqətdə isə bu və ya digər dairələrin əlində təzyiq alətinə çevrilən Avropa Şurası Parlament Assambleyasının (AŞPA) ölkəmizlə bağlı son addımı birmənalı qarşılanmamaqla yanaşı, Azərbaycana qarşı qərəzin son həddə çatdığını bir daha ortaya qoydu. Belə ki, bu beynəlxalq qurumda təklif olunub ki, Azərbaycan nümayəndə heyətinin səsvermə hüququ məhdudlaşdırılsın. Bu təşəbbüsün müəllifi  Sosialistlər siyasi qrupunun  rəhbəri, almaniyalı deputat  Frank Şvabedir və  həmin təşəbbüs təsdiqlənmişdir.  Səbəblərə diqqət yetirdikdə çoxsaylı suallar yaranır. Guya Azərbaycan qurumun qarşısında götürdüyü öhdəlikləri yerinə yetirmir, eyni zamanda, Avropa Şurası ilə əməkdaşlıqda maraqlı deyil. Frank Şvabe  təşəbbüsü irəli sürərkən  çıxışında  guya Qarabağın 100 mindən artıq erməni əhalisnin zorakılıqla qovulmasını  və AŞPA məruzəçilərinin Laçın yoluna buraxılmamasını Azərbaycanın təşkilatla əməkdaşlıqdan yayınması kimi  qiymətləndirib.  Bu təşəbbüs almaniyalı deputat tərəfindən irəli sürülsə də heç şübhəsiz  ki, onun arxasında  AŞPA rəhbərliyinin özü dayanır. Reallıq budur ki,  bu gün AŞPA Almaniya və Fransanın əlində oyuncağa çevrilib. Fransa bu təşkilatdan bir siyasi alət kimi istifadə edərək Azərbaycana qarşı əks təbliğat  kampaniyası həyata keçirir. AŞPA-nın bu addımı Fransanın  tarixi Zəfərimizdən sonra Azərbaycana qarşı açıq müstəviyə keçən qərəzli  kampaniyasının davamıdır. Bu fikirləri Yeni Azərbaycan Partiyası (YAP) Xətai rayon təşkilatının sədri, siyasi elmlər doktoru, professor Vüqar Rəhimzadə KİV-ə açıqlamasında bildirib.

Vüqar Rəhimzadə onu da qeyd edib ki, qurum bu addımını müxtəlif səbəblərlə əsaslandırmağa çalışsa da  əsas səbəb Azərbaycanın tarixi Zəfərini, Ermənistanın məğlubiyyətini həzm edə bilməməsidir.  Sual olunur: 23 illik üzvlük   Azərbaycana nə verdi? Keçilən yola qısa nəzər salsaq  Avropa Şurasının zaman-zaman Azərbaycana qarşı  qərəzli yanaşma sərgilədiyini görərik.  Bir müddət əvvəl saxta “siyasi məhbus” məsələsini siyasi alverə çevirməklə ölkəmizə qarşı bir təzyiq vasitəsi kimi gündəmdə dayanırdı. Avropa Şurasının həmməruzəçilərinin mütəmadi  olaraq Ermənistana dəstək xarakteri daşıyan  bəyanatlarla gündəmdə olmaları Azərbaycan tərəfinin haqlı narazılığına səbəb olmaqla yanaşı, bu reallığın təkrar-təkrar  səsləndirilməsinə rəvac verdi ki,  Avropa Şurası həmməruzəçilərdən ibarət deyil. Təbii ki, quruma üzv dövlətlərin hamısının ölkəmizə münasibətdə səmimi olmaması haradasa başadüşüləndir. Amma reallığı inkar edib Azərbaycanı özlərinin fərziyyələrinə uyğun olaraq ittiham etmək birmənalı qarşılana bilməz. Ermənistanın mütəmadi olaraq qurum qarşısında götürdüyü öhdəlikləri yerinə yetirməməsinə görə səsvermə hüququndan məhrum edilməsi məsələsi dəfələrlə gündəmə gətirilsə də  bugünədək belə bir addım atılmayıb. Amma Azərbaycana gəldikdə bu cür qərəzli və ikili standartlarla yanaşma ortaya qoymaq həmin beynəlxalq təşkilatın əsl simasını ortaya qoyur. Bu baxımdan ki, daim ədalətin, beynəlxalq hüququn yanında olan, demokratik prinsiplərə böyük hörmətlə yanaşan, bu dəyərlərə sadiqliyini sözdə deyil, əməldə nümayiş etdirən bir ölkəni səsvermə hüququndan məhrum etmək qərəzdən başqa bir şey deyil.

Vüqar Rəhimzadə vurğulayıb ki, bu xatırlatmanı bir daha həmin təklifin müəllifinə çatdırmaq istərdik ki, Azərbaycan 2001-ci ildə Avropa Şurasına tamhüquqlu üzv qəbul olunmaqla demokratik dəyərlərə sadiqliyini sözdə deyil, əməldə nümayiş etdirdi. Ümummilli Lider Heydər Əliyev qurumun ilk sessiyasındakı çıxışında bu məqamı xüsusi qeyd etmişdir ki, Avropa Şurası Azərbaycana nə qədər lazımdırsa, Azərbaycan da Avropa Şurasına bir o qədər gərəkdir. Ulu Öndərin bu fikirlərinin davamı olaraq isə cənab İlham Əliyev bildirir ki, demokratikləşmə  sadəcə bir niyyət, şüar deyil, Azərbaycanın hərtərəfli inkişafının əsasıdır. Atılan addımlar hansısa beynəlxalq  təşkilata xoş gəlmək deyil, Azərbaycanın uğurlu gələcəyi üçündür.

Təbii ki, hər hansı bir quruma üzv qəbul olunarkən əməkdaşlıq üçün qarşılıqlı öhdəliklər olur. 2001-ci ildən ötən 23 ildə Azərbaycan Avropa Şurasına tamhüquqlu üzv qəbul olunarkən götürdüyü  öhdəlikləri yüksək səviyyədə yerinə yetirib. Bəs, AŞPA necə üzərinə düşən öhdəlikləri yerinə yetiribmi? Qətiyyətlə və birmənalı şəkildə deyə bilərik ki, yox!

Ölkəmizdə demokratik təsisatların inkişafı istiqamətində atılan addımların uğurlu nəticələri göz önündədir. Hazırda ölkəmiz 7 fevral tarixində keçiriləcək prezident seçkiləri ərəfəsindədir. Seçkilərin demokratikliyini təmin etmək üçün zəruri olan bütün addımlar atılır. Bu mühüm məqam da xüsusi qeyd edilməlidir ki,  seçkilərin azad, demokratik, beynəlxalq  standartlara uyğun keçirilməsini təmin edən Seçki Məcəlləsi qəbul olunarkən Azərbaycan hökuməti ilə Avropa Şurasının Venesiya Komissiyası,  ATƏT-in Demokratik Təsisatlar və İnsan Haqları Bürosu ilə birgə müzakirələr aparılaraq ümumi rəyə gəlinmişdi. Azərbaycan demokratik təsistaların inkişafı istiqamətində atdığı addımlarda beynəlxalq təcrübəyə əsaslanır və yeniliyə, təkmilləşməyə maraq göstərir.

YAP Xətai rayon təşkilatının sədri qeyd edib ki,  2001-ci ildə  sözügedən təşkilata üzv olandan sonrakı dövrün təcrübəsi ermənipərəst,  İslamofob, Azərbaycanofob qüvvələrin  bu təşkilatdan daim  Azərbaycana qarşı  vasitə  kimi istifadə etmələrini açıq-aydın sübut edir. Bəzi dövlətlərin, beynəlxalq təşkilatların Azərbaycanda ən kiçik bir olayı belə lupa ilə izləmələrinə, amma maraqlarının həyata keçirilməsində bir vasitə rolunu oynayan Ermənistan kimi işğalçı, demokratiya anlayışından bixəbər olan dövlətdə cərəyan edən proseslərə göz yummalarına daim rəsmi Bakı tərəfindən sərt reaksiya verilib. Əgər ədalət maraqların arxasında əriyirsə, bu halda dünya güclərinin beynəlxalq hüququn norma və prinsiplərindən  xəbərsiz olduğunu necə söyləməyək, yaxud bu problemin mövcudluğunu necə inkar edək. Görəsən,  beynəlxalq hüququn norma və prinsiplərini zamana və məkana görə tətbiq edən dünyanın iri dövlətlərinin əlində oyuncağa çevrilən təşkilatlar heç  bu suallar ətrafında düşünürlərmi?  Bəzi iri dövlətlərin və beynəlxalq təşkilatların hər kəsə bəlli, özlərinə isə  “təsadüf” kimi görünən  ikili yanaşmalarına Azərbaycan ictimaiyyəti  daim sərt münasibətini nümayiş etdirib. Dünya güclərinin ikili siyasətinə və bu yanaşmadan  yaranan Ermənistana dəstəyə  işıq salan faktlar saysız-hesabsızdır. AŞPA nümayəndə heyətimizin səsvermə hüququnu məhdudlaşdırmaqla Azərbaycana təzyiq, Ermənistana isə dəstək göstərməyə çalışır. Avropa Şurası nə üçün bir dəfə də olsun  bir milyondan artıq soydaşımızın pozulmuş hüquqlarını  dilə gətirmədi? Postmünaqişə dövrünün reallıqları sırasında yer alan Ermənistanın mina terroru və bunun nəticəsində yüzlərlə insanın həlak olması və yaralanması  Avropa Şurasını bəs nə vaxt narahat edəcək? Azərbaycan nümayəndə heyətinin səlahiyyətlərinin məhdudlaşdırılması bəzi Qərb dövlətlərinin siyasi riyakarlığı və sifarişidir. Azərbaycanın AŞPA-dakı nümayəndə heyətinin bəyanatında da qeyd edilir ki, bu qurumdan bəzi üzv dövlətləri hədəfə almaq üçün platforma kimi istifadə olunur. Müəyyən qərəzli qruplar AŞPA-nın əsas prinsiplərindən öz dar maraqlarının təmini məqsədilə sui-istifadə edirlər. AŞPA-da siyasi korrupsiya, ayrı-seçkilik, etnik və dini nifrət, ikili standartlar, təkəbbürlülük, şovinizm hökm sürən praktikaya çevrilib. Qurumda mövcud olan dözülməz irqçilik, Azərbaycanofobiya və İslamofobiya mühiti fonunda Azərbaycan nümayəndə heyəti AŞPA ilə əməkdaşlığı və təşkilatda iştirakını qeyri-müəyyən müddətə dayandırmaq qərarına gəlib.

Vüqar Rəhimzadə qeyd edib ki, Azərbaycan nümayəndə heyətinin bu addımı artıq əksər dünya güclərinin açıq müstəviyə keçən ikili standartlara əsaslanan siyasətinə ciddi etiraz və mesajdır. Azərbaycana qarşı qarayaxma kampaniyasının  bir mərkəzdən koordinasiya olunması inkaredilməzdir. Son hadisələrə qısa nəzər salmaqla  bunu bir daha təsdiqləyə bilərik. ABŞ Dövlət Departamentinin dünya ölkələrində  insan hüquqlarına dair vəziyyətlə bağlı hesabatı, ABŞ Konqresinin ədalətsiz  907-ci düzəlişin  fəaliyyətinin bərpası  məsələsini   qabartması, Fransanın tarixi Zəfərimizdən sonra  səngiməyən qərəzli kampaniyaları və simasızlığı, bunun tərkib hissəsi olaraq bu günlərdə Fransa Senatının qəbul etdiyi qondarma qətnamə, Avropa Parlamentinin ölkəmizdə keçiriləcək prezident seçkilərinə nümayəndə heyəti göndərməkdən imtina etməsi, Avropa İttifaqının xarici və təhlükəsizlik məsələləri üzrə ali nümayəndəsi Cozef Borrellin utanmadan Azərbaycanı Ermənistana qarşı təcavüzdə ittiham etməsi və sair kimi ikili standartlardan irəli gələn addımları... Atılan belə addımların, qəbul olunan qərarların və qətnamələrin Azərbaycan üçün heç bir önəmi yoxdur. AŞPA-nın  hazırkı qərarının  insan hüquqları ilə  heç bir əlaqəsi yoxdur.  Qəbul olunmuş qərar  öz ərazi bütövlüyünü və suverenliyini  təmin etmiş Azərbaycana qarşı birmənalı şəkildə qərəz və ədalətsizlikdir.  Azərbaycan üçün nəinki AŞPA-da  səsinin dondurulması, bu qurumun özü belə  bir əhəmiyyət kəsb etmir. Təbii ki, işğalçı ilə  işğala məruz qalan dövləti eyni vaxtda  üzv qəbul edən bir qurumdan ədalət gözləmək sadəlövhlük olardı.  Azərbaycan 23 ildə daim bu ədalətsizliyin, qərəzli yanaşmanın şahidi olub.