Xəbərlər
Azərbaycan dinamik inkişaf edir
Xızı rayonunda seçicilərlə görüş keçirilib
2024-cü il fevralın 7-də ölkəmizdə keçiriləcək prezident seçkiləri ilə əlaqədar Yeni Azərbaycan Partiyası tərəfindən namizədliyi irəli sürülmüş İlham Heydər oğlu Əliyevin seçkiqabağı təşviqat kampaniyası çərçivəsində yanvarın 18-də Xızı rayonunun Sitalçay kəndində seçicilərlə görüş keçirilib.
Görüş Dövlət Himninin səsləndirilməsi ilə başlayıb. Sonra cənab İlham Əliyevin 20 illik fəaliyyətinə həsr olunmuş videoçarx nümayiş olunub.
Görüşdə YAP Xızı rayon təşkilatının sədri Ayaz Quliyev, təşviqat qrupunun üzvləri Vəsilə Əhmədova və Pərviz Əliyev çıxış ediblər.
Çıxışlarda cənab İlham Əliyev tərəfindən həyata keçirilən çoxşaxəli siyasətdən, əldə olunan uğurlardan bəhs edilib. Qeyd olunub ki, Azərbaycanın iqtisadi uğurları günbəgün artır və iqtisadi uğurların qazanılması ilə xalqımızın rifah halının daha da yaxşılaşdırılması təmin edilir.
Natiqlər vətəndaşları dövlətimizin dinamik inkişafını təmin edən, ölkəmizi qələbədən-qələbəyə aparan Yeni Azərbaycan Partiyasının namizədi cənab İlham Əliyevə səs verməyə dəvət ediblər.
Tədbirin sonunda Yeni Azərbaycan Partiyasının Himni səsləndirilib.
