Xəbərlər
Azərbaycan gəncliyinin uğurlu sabahına inam
Gündüz Bayramov
YAP Samux rayon təşkilatının sədri
“Hər bir Azərbaycan gənci öz həyat yolunu müstəqil Azərbaycan Respublikasının gələcək həyat yolu kimi qəbul etməlidir”. Ulu öndər Heydər Əliyevin Gənclərin I forumda səsləndirdiyi bu fikir gənc nəslin fəaliyyətinin əsas istiqamətinə çevrilib.
Bu həqiqət hər kəsə məlumdur ki, yalnız ümummilli lider Heydər Əliyevin hakimiyyətə qayıdışından sonra gənclərə diqqət və qayğı dövlət siyasətinin əsas tərkib hissələrindən biri olub. Müstəqilliyimizin ilk illərində ölkəyə rəhbərlik edənlərin idarəçilik qabiliyyətlərinin yoxluğu, şəxsi maraqlarının girovuna çevrilmələri digər sahələr kimi, gənclərə münasibətdə də özünü biruzə verdi. Etiraf etmək lazımdır ki, gənclərin diqqətdən kənarda qalması bir çox problemlərin yaranmasına, daha dəqiq desək, onların bu və ya digər qüvvələrin təsiri altına düşmələrinə səbəb olmuşdur. Təbii ki, bu hal uzun müddət davam edərdisə müstəqil Azərbaycanın bu günkü gününü təsəvvür etmək o qədər də çətin deyildi. Lakin ulu öndər Heydər Əliyevin hakimiyyətə qayıdışı gənclərlə iş sahəsində mövcud problemləri aradan qaldırdı.
Gəncləri Azərbaycanın gələcəyi adlandıran Heydər Əliyevin imzaladığı fərman və sərəncamlar, onun gənc nəslə olan diqqət və qayğısını bir daha təsdiqlədi. 1994-cü il iyulun 26-da Ümummilli liderin fərmanı ilə Gənclər və İdman Nazirliyi yaradıldı. Fəaliyyətini bilavasitə gənclərlə işə həsr edən belə bir orqanın yaradılması olduqca əhəmiyyətli idi. Gənclər siyasətinin işlənib hazırlanması və uğurla həyata keçirilməsi istiqamətində ciddi addımlar atılmağa başladı. 1995-ci ildə Gənclər Təşkilatlarının Milli Şurası yaradıldı. Azərbaycan gənclərinin cəmiyyətin inkişafında və bir çox vacib problemlərin həllində rolunu artırmaq, ölkənin gələcək inkişafında iştirakını və məsuliyyətini yüksəltmək məqsədilə ümummilli lider Heydər Əliyev tərəfindən hələ 1995-ci ildə Azərbaycan Gənclərinin Forumunun keçirilməsi təşəbbüsü irəli sürüldü. Beləliklə də, 2 fevral 1996-ci ildə gənclərin I Forumu keçirildi. Forumda gənclər və idman siyasəti sahəsində görülən işlərdən, gəncliyin qarşısında böyük məsuliyyətin dayandığından danışan ulu öndər Heydər Əliyev Azərbaycan gəncliyinin daha uğurlu sabahına inandığının vurğuladı. Həmin dövürdə gənclərin problemlərinin həllini təmin edən fərmanların imzalanması, qanunların qəbul edilməsi, gənclərin dövlət quruculuğuna fəal cəlb olunması dövlətin gənclər siyasətinə mühüm töhfə verdi. Bununla da Azərbaycan gəncinin tam hüquqlu vətəndaş kimi öz gələcəyinə sahib çıxması və ona göstərilən ehtimadı doğrultmağa çalışması üçün bütün şərait yaradıldı. Ümummilli liderimizin 1997-ci il 2 fevral tarixində imzaladığı Fərmana əsasən həmin tarix “Azərbaycan gəncləri günü” elan edilmişdir.
Dövlətimizin gənclər siyasəti bu gün Ümummilli Liderin layiqli davamçısı Prezident İlham Əliyev tərəfindən yeni inkişaf mərhələsinə qaldırılıb. Gənclərin hərtərəfli inkişafı, mükəmməl təhsil alması müxtəlif sahələr üzrə potensiallarının aşkar edilməsi, bacarıqlarının stimullaşdırılması üçün münbit şərait yaradılıb. Azərbaycan gəncliyi ictimai həyatın bütün sahələrində fəal iştirakı ilə seçilir. Ölkə başçısının müvafiq sərəncamları ilə 2007-ci ilin “Gənclər ili”, 2020-ci ilin “Könüllülər ili” elan edilməsi ölkəmizdə uğurla həyata keçirilən dövlət gənclər siyasətindən və gənclərə qayğıdan xəbər verir.
Azərbaycanda həyata keçirilən gənclər siyasəti gənc nəslin hərərəfli inkişafı üçün şərait yaratmaqla yanaşı, onları vətənpərvər ruhda formalaşdırıb. Bu baxımdan 44 günlük Vətən müharibəsi Azərbaycan gəncinin vətənpərvərliyini, gücünü, əzmini bütün dünyaya nümayiş etdirdi. Müharibənin əsas ağırlığı Azərbaycan gəncinin üzərinə düşdü. Çünki amansız döyüşlərdə əldə silah düşmənin üzərinə gedən ilk növbədə gənclər oldular. Gənclərimizin fəallığı sayəsində bütün sosial media platformalarında düşmənə adekvat cavablar verildi. Müharibəyə yollanan gənclərin hamısı döyüşlərdə qəhrəmancasına iştirak etdi. Hər biri öz igidliyi ilə vətənpərvərlik salnaməsi yazdı, zəfər dolu döyüş yolu ilə dillərdə dastana döndü. Onlar bütün dünyaya Azərbaycan gəncinin nəyə qadir olduğunu göstərdilər.
Ölkəmizdə uğurla həyata keçirilən gənclər siyasətinin nəticəsidir ki, bu gün Azərbaycan gəncləri cəmiyyətin inkişafında və dövlətçiliyin möhkəmləndirilməsi prosesində fəal iştirak edirlər. Və bu gün gənclər fəxr edir ki, məhz ulu öndər Heydər Əliyevin qurduğu müstəqil Azərbaycanın vətəndaşıdırlar və bundan sonra da Azərbaycanın müstəqilliyinin möhkəmlənməsi, qüdrətinin artması yolunda əllərindən gələni edəcəklər.