Xəbərlər
Şəhidin əziz xatirəsi anılıb
Ağstafada Vətən müharibəsi şəhidi Abbasov Zöhrab Natiq oğlunun şəhadətinin ildönümü münasibətilə xatirəsi anılıb.
Yeni Azərbaycan Partiyası (YAP) Ağstafa rayon təşkilatının, Ağstafa Rayon İcra Hakimiyyəti başçısı Aparatının Vətən müharibəsi iştirakçıları və şəhid ailələri ilə işin təşkili şöbəsinin, Ağstafa rayon Gənclər və İdman idarəsinin, “Ağstafa Gənclər evi” Sosial Xidmət müəssisəsinin əməkdaşları, şəhid ailələri, partiya fəalları və rayon ictimaiyyətinin nümayəndələri Eynallı kənd qəbiristanlığında şəhidin məzarını ziyarət edib, önünə gül dəstələri düzüb, əziz xatirəsini ehtiramla anıblar.
Tədbir çərçivəsində, həmçinin şəhidimizlə eyni məzarlıqda uyuyan şəhid Əsgərov Süleyman Abbas oğlunun doğum günü münasibətilə məzarı ziyarət olunub, məzarı önünə gül dəstələri düzülərək əziz xatirəsi yad edilib.
Daha sonra tədbir iştirakçıları şəhid Zöhrab Abbasovun ailə üzvlərini ziyarət edərək onların qayğıları ilə maraqlanıb, dərin hüznlə başsağlığı veriblər.
Söhbət zamanı şəhidimizin keçdiyi şərəfli həyat və döyüş yolundan geniş bəhs edilib.
Şəhidin ailə üzvləri göstərilən diqqət və qayğıya görə Prezident, Ali Baş Komandan İlham Əliyevə və Birinci vitse-prezident Mehriban xanım Əliyevaya öz minnətdarlıqlarını bildiriblər.
Qeyd edək ki, Prezident İlham Əliyevin müvafiq Sərəncamına əsasən, şəhid Zöhrab Abbasov ölümündən sonra “Vətən uğrunda” medalı ilə təltif olunub.
