Xəbərlər
YAP Xətai rayon təşkilatı ərazi partiya təşkilatlarının hesabat seçki yığıncaqları davam edir
YAP Xətai rayon təşkilatı Qacaq Nəbi-8, Qacaq Nəbi-6A, Mədinə Gülgün-1, 8 Noyabr-9A ərazi ilk partiya təşkilatlarında hesabat-seçki yığıncaqlarını keçirib. Hesabat məruzələri dinlənilib, çıxışlar əsasında ərazi ilk partiya təşkilatlarının hesabat dövründəki fəaliyyətləri dəyərləndirilib.
YAP Xətai rayon təşkilatının sədri Vüqar Rəhimzadə yığıncaqlarda bildirib ki, dövlət başçısı İlham Əliyevin vurğuladığı kimi, həyat yerində durmur, qarşıya yeni vəzifələr qoyur: «Dövrün, zamanın tələblərinə uyğun təkmilləşmə bu vəzifələrin uğurlu icrasını şərtləndirir. Azərbaycanın beynəlxalq maliyyə qurumlarının hesabatlarında ən islahatçı ölkə kimi qərarlaşması və hər il bu mövqeyini uğurlu islahatları ilə daha da zənginləşdirməsi deyilənlərin təsdiqidir. Bu gün böyük inamla qeyd edirik ki, müasir müstəqil Azərbaycan dövlətinin qurucusu, ulu öndər Heydər Əliyevin siyasi kursunu bütün istiqamətlərdə uğurla davam etdirən Prezident İlham Əliyevin rəhbərliyi ilə ölkəmiz dayanıqlı iqtisadi inkişafı ilə dünyanın diqqətindədir. Hazırda ölkəmizin həyatında yeni dövrün başlanğıcı kimi dəyərləndirilən işğaldan azad edilmiş ərazilərimizdə bərpa və quruculuq işləri Azərbaycanın malik olduğu iqtisadi və maliyyə imkanlarının təqdimatında əhəmiyyətli rol oynayır. Nəzərdə tutulan bütün planları Azərbaycan öz imkanları hesabına həyata keçirir.»
V.Rəhimzadə vurğulayıb ki, tarixi Zəfərimizə birliyimiz, həmrəyliyimiz sayəsində necə nail olduqsa, Qələbəmizin yaratdığı reallıqların diktə etdiyi vəzifələri də birliyimiz sayəsində icra edəcək, Qarabağımız cənnətməkana çevriləcək, ölkəmiz daha möhtəşəm uğurlara imza atacaq.
Hesabat seçki-yığıncaqlarında təşkilati məsələlərə baxılıb. Abuzər Əsədov Qacaq Nəbi-8 ərazi ilk partiya təşkilatının sədri, Sahibə Əmiraslanova sədr müavini, Nazilə Əliyeva Qaçaq Nəbi-6A ərazi ilk partiya təşkilatının sədri, Tahir Həmzəyev sədr müavini, Cavanşir Tarverdiyev Mədinə Gülgün-1 ərazi ilk partiya təşkilatının sədri, Əlihəsən Sadıqov sədr müavini, Məlakət Abdulova 8 Noyabr-9A ərazi ilk partiya təşkilatının sədri, Günel Mircəfərova sədr müavini seçiliblər.
YAP Xətai rayon təşkilatının sədri Vüqar Rəhimzadə yeni tərkiblərə fəaliyyətlərində uğurlar arzulayıb.
