Xəbərlər
MM-in deputatı: Ölkəmizdə sahibkarların fəaliyyəti üçün hər cür şərait yaradılıb
“Dünya Bankının “Doing Business 2019” hesabatında Azərbaycanın mövqeyi 2017-ci illə müqayisədə 32 pillə irəliləyərək 190 ölkə arasında 25-ci yerdə qərarlaşması ölkəmizin böyük uğurudur”. Bu fikri Milli Məclisin deputatı Rüfət Quliyev deyib.
R.Quliyev bildirib ki, ölkəmizin əldə etdiyi bu uğurların əsasında Prezident İlham Əliyev tərəfindən həyata keçirilən güclü siyasi iradəsi və davamlı dəstək dayanır. Onun sözlərinə görə, hesabatda nəzərdə tutulan elə meyarlar var ki, həmin meyarlara əsasən, ölkəmiz ilk 10 ölkə sırasına daxil olub. Bütün bunlar ölkəmizdə son 2 ildə aparılan iqtisadi, islahatların daha da dərinləşməsinin nəticəsidir.
“Ölkəmizdə həyata keçirilən islahatların ən böyük göstəricisi nüfuzlu beynəlxalq reytinqlərlə yanaşı, “Doing Business 2019” hesabatının da bütün indikatorlarını əhatə etməsidir. Aparılan islahatların yoxlanılması məqsədilə ölkələrə ayrı-ayrılıqda xüsusi ekspert missiyaları göndərilir, islahatların real praktikada tətbiqi yerində müvafiq meyarlarla araşdırılır. Nəticədə hər bir ölkənin həm ümumi, həm də 10 indikator üzrə xüsusi qiymət balı hesablanaraq mövqeləri müəyyən edilir. Bu, ölkəmizin beynəlxalq aləmdə yüksək nüfuza malik olduğunun göstəricisidir. Hesabatda ölkəmizin 190 ölkə arasında 25-ci olması Azərbaycanın investisiya, biznes mühiti nöqteyi-nəzərindən cəlbedici ölkəyə çevrildiyini göstərir. Kiçik və orta sahibkarlıqla məşğul olan şəxslər ölkəmizin bu uğurundan bəhrələnməyə çalışmalıdırlar. Ölkəmizdə sahibkarların fəaliyyəti üçün hər cür şərait yaradılıb. Bu baxımdan sahibkarlar işlərini daha aktiv qurmalı, məhsullarını xarici bazarlara çıxarmaqda maraqlı olmalıdırlar”-deyə, deputat qeyd edib.