YENİ AZƏRBAYCAN PARTİYASI

Dini Qurumlarla İş üzrə Dövlət Komitəsinin sədri Mübariz Qurbanlı fevralın 10-da İmişli rayon ictimaiyyətinin nümayəndələri və sahibkarlarla görüşüb.

Görüşdən əvvəl ümummilli lider Heydər Əliyevin abidəsi önünə gül dəstələri düzülüb, xatirəsi ehtiramla yad edilib.

Rayondakı Heydər Əliyev Mərkəzində keçirilən görüşdə çıxış edən İmişli Rayon İcra Hakimiyyətinin başçısı Vilyam Hacıyev regionların sosial-iqtisadi inkişafı Dövlət Proqramı çərçivəsində görülən işlər, reallaşdırılan layihələr barədə məlumat verib. Aqrar sektorun inkişafından, kəndlərarası yolların tikintisindən, yeni təhsil və səhiyyə müəssisələrinin açılmasından danışan icra hakimiyyətinin başçısı bunu dövlətimizin başçısının regionlara qayğısı kimi səciyyələndirib. Bildirib ki, rayonda iki 100 yerlik uşaq bağçası, Heydər Əliyev Mərkəzi, uşaq əyləncə və ticarət mərkəzləri inşa olunub, yem və qənd zavodları, 50 tonluq taxıl anbarı, regional ədliyyə mərkəzi istifadəyə verilib, mərkəzi xəstəxana əsaslı təmir edilib.

Dini Qurumlarla İş üzrə Dövlət Komitəsinin sədri Mübariz Qurbanlı tədbirdə çıxış edərək ötən əsrin sonlarında ölkəmizin ictimai-siyasi həyatında baş verən proseslərə qısa nəzər salıb, ulu öndər Heydər Əliyevin xalqımız və dövlətimiz qarşısındakı misilsiz xidmətlərindən bəhs edib. Bildirilib ki, respublikamızın sosial-iqtisadi inkişafı, xalqımızın həyat səviyyəsinin yüksəlməsi hər bir Azərbaycan vətəndaşının qurub-yaratmaq əzmini artırıb. Prezident İlham Əliyevin rəhbərliyi ilə həyata keçirilən çevik və düşünülmüş sosial-iqtisadi siyasət, qarşıda duran strateji hədəflərin düzgün müəyyənləşdirilməsi dünyanı bürüyən qlobal maliyyə-iqtisadi böhran şəraitində belə, ölkəmizin davamlı və dinamik inkişafını təmin edir.

M.Qurbanlı qeyri-neft sektorunun inkişafı, iş adamlarına hərtərəfli dəstək göstərilməsi, sahibkarlığın inkişafına mane olan amillərin aradan qaldırılması ilə əlaqədar həyata keçirilən tədbirlərdən danışıb, neftin qiymətinin kəskin şəkildə aşağı düşməsinin Azərbaycandan da təsirsiz ötüşmədiyini bildirib. Qeyd olunub ki, dünyada baş verən qlobal iqtisadi böhranın Azərbaycan iqtisadiyyatına təsiri Prezident İlham Əliyevin uzaqgörən siyasəti nəticəsində minimuma endirilib. Qarşıya qeyri-neft sektorunun inkişafı, iqtisadiyyatın neftdən asılılıqdan azad edilməsi kimi mühüm vəzifələr qoyulub. Bu sahədə dövlətimizin başçısının verdiyi konkret tapşırıqlar ictimaiyyət tərəfindən tam dəstəklənir.

Komitə sədri qarşıda duran konkret vəzifələrdən, sahibkarlığın inkişafı ilə əlaqədar həyata keçirilən tədbirlərdən də danışıb. Vurğulanıb ki, Prezident İlham Əliyevin düşünülmüş və uzaqgörən siyasəti nəticəsində yaradılan siyasi sabitlik, güclü iqtisadi potensial, vaxtında aparılan islahatlar və görülən qabaqlayıcı tədbirlər, iqtisadiyyatın şaxələndirilməsi, neftdən asılılığın azaldılması, sahibkarlığın inkişafı və sair ölkə iqtisadiyyatının mənfi təsirlərə qarşı dayanıqlığını təmin edib.

Diqqətə çatdırılıb ki, regionların sosial-iqtisadi inkişafı Dövlət proqramlarının həyata keçirilməsi nəticəsində bölgələrimizin siması büsbütün dəyişib. Bu proqramlarda infrastruktur layihələrinə böyük önəm verilib. Qısa müddətdə Azərbaycanda, o cümlədən İmişlidə də şəhər mərkəzi, kənd və qəsəbələr abadlaşıb, yollar salınıb, xəstəxanalar, müasir idman kompleksləri, yüzlərlə məktəb binaları inşa olunub.

M.Qurbanlı son 12 ildə Azərbaycanda əldə olunan uğurları faktlarla diqqətə çatdıraraq deyib: “Bu dövrdə ölkəyə 200 milyard manat sərmayə qoyulub. Onun da yarısı xarici sərmayədir. Respublikada 10 min kilometrdən çox yol çəkilib, 3 minə yaxın məktəb, 600-ə yaxın xəstəxana tikilib, təmir edilib, 1500-ə yaxın subartezian quyusu qazılıb. Qeyd edim ki, ölkə üzrə ümumi məktəblərin sayı təqribən 5 minə yaxındır. Bunun 3 mini son 12 ildə tikilib. Həmçinin bölgələrdə 89 köçkün qəsəbəsi inşa olunub, 225 min insan yeni evlərə, mənzillərə köçürülüb. Maaşlar təxminən beş dəfə, pensiyalar yeddi dəfə artırılıb. Bir milyon 500 min iş yeri yaradılıb ki, bunun da 1 milyonu daimi iş yeridir. Hazırda Azərbaycan iqtisadiyyatının böyük hissəsi - 80 faizdən çoxu özəl sektorda formalaşır. Bu illər ərzində Azərbaycanda 70 mindən çox müəssisə yaradılıb və ümumiyyətlə, müəssisələrin sayı 100 minə yaxındır. Sahibkarlara güzəştli şərtlərlə 1 milyard 700 milyon manat kredit verilib”.

Sonra çıxış edən sahibkarlar dövlətimizin başçısının qarşıya qoyduğu vəzifələrin həyata keçirilməsinin dinamik inkişafa səbəb olacağını bildirib, yeni istehsal və emal müəssisələrinin, iş yerlərinin yaradılması ilə bağlı bir sıra təkliflər veriblər.

Milli Məclisin deputatları Çingiz Qənizadə və Əsabil Qasımov aparılan iqtisadi islahatların ölkənin, eləcə də İmişlinin inkişafına böyük təkan verəcəyini bildiriblər.

İctimaiyyət nümayəndələri regionlara, o cümlədən İmişliyə göstərdiyi diqqət və qayğıya görə dövlətimizin başçısına minnətdarlıqlarını ifadə ediblər.