Xəbərlər
Azərbaycan–Gürcüstan strateji tərəfdaşlığının yeni mərhələsi
Əli Hüseynli
Milli Məclisin deputatı
Aprelin 6-da Azərbaycan Respublikasının Prezidenti İlham Əliyevin Gürcüstana dövlət səfəri regionun geosiyasi reallıqları fonunda mühüm siyasi hadisə kimi qiymətləndirilir. Səfər çərçivəsində dövlət başçımızın Gürcüstan Prezidenti Mixeil Kavelaşvili və Baş nazir İrakli Kobaxidze ilə keçirdiyi görüşlər və prezidentlərin mətbuata verdikləri bəyanatlar iki ölkə arasında strateji tərəfdaşlığın daha da dərinləşdiyini və yeni mərhələyə qədəm qoyduğunu təsdiqləyir.
Prezidentlərin bəyanatlarında xüsusi vurğulanan əsas məqamlardan biri Azərbaycan–Gürcüstan münasibətlərinin sarsılmaz strateji tərəfdaşlıq xarakteri daşımasıdır. İlham Əliyev çıxışında qeyd etdi ki, iki ölkə arasında əlaqələr qarşılıqlı hörmət, suverenliyə və ərazi bütövlüyünə dəstək prinsiplərinə əsaslanır. Bu isə regionda sabitliyin təmin olunmasında mühüm amil kimi çıxış edir.
Öz növbəsində Mixeil Kavelaşvili Azərbaycanla əməkdaşlığı Gürcüstanın xarici siyasətinin prioritet istiqamətlərindən biri kimi qiymətləndirərək, Bakı ilə Tbilisi arasında siyasi dialoqun yüksək səviyyədə olduğundan məmnunluğunu ifadə etdi.
Səfərin əsas istiqamətlərindən biri enerji və nəqliyyat sahəsində əməkdaşlıqdır. Prezidentlərin bəyanatlarında Azərbaycanın təşəbbüsü ilə həyata keçirilən beynəlxalq enerji layihələrinin əhəmiyyəti xüsusi qeyd edildi. Xüsusilə, Cənub Qaz Dəhlizi kimi layihələrin Avropanın enerji təhlükəsizliyinə verdiyi töhfə vurğulandı.
Bununla yanaşı, Orta Dəhliz çərçivəsində Azərbaycan və Gürcüstanın tranzit imkanlarının artırılması, yükdaşımaların həcminin genişləndirilməsi və regionun logistika mərkəzinə çevrilməsi istiqamətində əməkdaşlığın dərinləşdirilməsi əsas prioritetlərdən biri kimi önə çəkildi.
Prezidentlərin çıxışlarında regional təhlükəsizlik məsələləri də geniş yer aldı. İlham Əliyev Cənubi Qafqazda uzunmüddətli sülhün təmin olunmasının vacibliyini qeyd edərək, Azərbaycan tərəfindən irəli sürülən sülh gündəliyinin əhəmiyyətini vurğuladı. Gürcüstan tərəfi isə regionda əməkdaşlıq və dialoqun gücləndirilməsinin tərəfdarı olduğunu ifadə etdi.
Bu kontekstdə Gürcüstanın regionda sabitliyin qorunmasına verdiyi töhfə və Azərbaycanla koordinasiyalı fəaliyyətin əhəmiyyəti diqqətə çatdırıldı.
Səfər zamanı iqtisadi əlaqələrin genişləndirilməsi, qarşılıqlı investisiyaların təşviqi və ticarət dövriyyəsinin artırılması məsələləri də müzakirə olundu. Prezidentlər iqtisadi əməkdaşlığın şaxələndirilməsinin vacibliyini qeyd edərək, qeyri-neft sektorunda yeni imkanların mövcud olduğuna diqqət çəkdilər.
Eyni zamanda, humanitar sahədə əməkdaşlıq – təhsil, mədəniyyət və xalqlar arasında əlaqələrin möhkəmləndirilməsi münasibətlərin mühüm tərkib hissəsi kimi dəyərləndirildi.
Yekun olaraq, aprelin 6-da baş tutan dövlət səfəri bir daha nümayiş etdirdi ki, Azərbaycan–Gürcüstan münasibətləri yalnız ikitərəfli əməkdaşlıq çərçivəsi ilə məhdudlaşmır, həm də regionun geosiyasi və geoiqtisadi arxitekturasının formalaşmasında mühüm rol oynayır. Dövlət başçıları cənab İham Əliyev və Mixeil Kavelaşviliin mətbuata verdikləri bəyanatlar da göstərir ki, tərəflər qarşılıqlı etimada əsaslanan strateji xətti davam etdirməkdə qətiyyətlidirlər.
Beləliklə, bu səfər Azərbaycan–Gürcüstan əlaqələrinin yeni keyfiyyət mərhələsinə yüksəlməsi ilə yanaşı, Cənubi Qafqazda sabitlik, təhlükəsizlik və iqtisadi inkişaf üçün mühüm siyasi zəminin yaradılmasına əhəmiyyətli töhfədir.