Xəbərlər
Ədaləti özümüz təmin etdik
“Tarixi Zəfərimizdən ötən dövrün mühüm reallıqlarından biri işğaldan azad edilmiş ərazilərimizin müasir tələbələrə uyğun yenidən qurulması, bərpası, soydaşlarımızın mərhələ-mərhələ öz dogma yurd-yuvalarına qayıdışıdır. Bu gün qürurla sakinlərinə qovuşan şəhərlərimizin, kənd və qəsəbələrimizin artan sayından bəhs edirik. Bərpa-quruculuq işlərinin geniş miqyas alması Azərbaycanın iqtisadi qüdrəti ilə yanaşı, xalqımızın necə qurucu xalq olduğunun təqdimatıdır. 30 illik işğal dövrünün dağıntılarını quruculuq mərhələsi əvəzləyib. Bundan böyük xoşbəxtlik ola bilməz. Xalqımız 30 il məhz bu günlərin həsrəti ilə yaşadı. Müzəffər Ali Baş Komandan İlham Əliyevin rəhbərliyi ilə rəşadətli Ordumuzun 44 günlük İkinici Qarabağ müharibəsində, eyni zamanda, bir günlük antiterror tədbirlərində qazandığı Zəfərlər bu reallıqları şərtləndirdi. Dövlət başçısı İlham Əliyevin, birinci xanım Mehriban Əliyevanın və qızları Arzu Əliyevanın fevralın 25-də Xocalı və Xocavənd rayonlarına səfəri bir daha bu reallıqların təqdimatı oldu. Belə ki, səfər zamanı Xocalı rayonunun Xanabad kəndində, Xocavənd rayonunun Xocavənd kəndində və Xocavənd şəhərində görülmüş işlərlə tanış olan Prezident İlham Əliyev, birinci xanım Mehriban Əliyeva və qızları Arzu Əliyeva Xocavənd şəhər və Xocavənd kənd sakinləri ilə görüşdülər. Xocavənd şəhəri Böyük Qayıdışın növbəti ünvanı, sakinlərinə qovuşan 9-cu şəhər oldu. Sakinlərlə söhbət zamanı dövlətimizin başçısı İlham Əliyev bildirdi ki, uzun illər əzab-əziyyət içində yaşamısınız. Köçkün həyatı ağır həyatdır, həm mənəvi əzablar, həm fiziki çətinliklər, öz doğma torpağını tərk edib başqa yerə, hətta Azərbaycanın içində olsa belə getmək və əzab-əziyyət içində yaşamaq böyük sınaqdır. Siz bu sınaqdan şərəflə çıxmısınız. Bütün Azərbaycan xalqı, siz də hər zaman inanırdınız ki, bu gün gələcək və bu torpaqları biz azad edəcəyik, ədaləti bərpa edəcəyik, düşməni torpaqlarımızdan qovacağıq. Biz buna da nail olduq. Artıq o ağır dövr arxada qaldı, bir daha qayıtmayacaq. İndi isə quruculuq vaxtıdır”. Bu fikirləri Milli Məclisin deputatı Malik Həsənov bildirib.
Millət vəkili qeyd edib ki, səfər zamanı Prezident İlham Əliyev, birinci xanım Mehriban Əliyeva və ailə üzvləri fevralın 26-da Xocalı şəhərində Xocalı Soyqırımı Memorialının açılışında iştirak etdilər. Memorialla tanış oldular və Xocalı rayon ictimaiyyətinin nümayəndələri ilə görüşdülər: “Dövlətimizin başçısı İlham Əliyev görüşdə Xocalı faciəsinin soyqırımı kimi beynəlxalq ictimaiyyətə çatdırılması istiqamətində həm Azərbaycan dövlətinin, həm də ictimai təşkilatların, qeyri-hökumət təşkilatlarının, bir çox qurumların gördüyü işlərdən, həyata keçirilən layihələrdən geniş bəhs etdi. Bildirdi ki, bu Kompleks silinməz yaddaşımızın təcəssümü olacaq. Xocalı soyqırımını heç vaxt unutmamalıyıq. Ermənistan dövlətinin vəhşiliklərini heç vaxt unutmamalıyıq. Öz tariximizi heç vaxt unutmamalıyıq, ayıq olmalıyıq, həmişə güclü olmalıyıq”.
Malik Həsənov vurğulayıb ki, həmin görüşdə Prezident İlham Əliyev bu çağırışımızı xüsusi qeyd etdi ki, biz Xocalıya ədalət tələb edirdik. Ancaq əfsuslar olsun ki, beynəlxalq təşkilatlar, dünyanın aparıcı ölkələri bu faciəmizə biganə yanaşırdılar. Ermənistan dövlətinin törətdiyi bu qanlı cinayəti ört-basdır etməyə çalışırdılar. Biz isə ədalətə addım-addım irəlilədik. 20-yə yaxın ölkənin Xocalı soyqırımını rəsmən tanıması bir addım, Vətən müharibəsi və şanlı Zəfərimiz ikinci addım, Xocalı şəhərinin iki il yarım bundan əvvəl azad edilməsi isə son addımlardan biri idi. Nəhayət, axırıncı addım bu yaxınlarda müharibə cinayətkarlarına qarşı Bakıda keçirilmiş məhkəmə prosesi idi. Xocalı soyqırımını törətmiş, əli Azərbaycan xalqının qanına batmış quldurlar məhkəmə qarşısında cavab verməli oldular. Bu, ədalətin tam təntənəsidir. Ədaləti biz özümüz təmin etdik, xalqımız bir yumruq kimi birləşərək həm 2020-ci, həm 2023-cü illərdə böyük qəhrəmanlıq göstərmişdir. Biz ədaləti Silahlı Qüvvələrimizin peşəkarlığı, fədakarlığı, rəşadəti hesabına özümüz təmin etdik. Dünyada nadir halda ölkələr tapılar ki, həm ədalətli müharibədə tam və mütləq qələbə qazansın, həm öz ərazi bütövlüyünü və suverenliyini hər qarış torpağı azad edərək özü təmin etsin və müharibə cinayətkarlarını məhkəmə qarşısına gətirsin.
Millət vəkili bildirib ki, görüşdə tarixi Zəfərimizə gedən yoldan da geniş bəhs edildi: “Təbii ki, güclü Azərbaycan həmişə əsas hədəf olub. Güclü Azərbaycan qurmasaydıq heç vaxt ərazi bütövlüyümüzü bərpa edə bilməzdik. Prezident İlham Əliyev Xocalı rayon ictimaiyyətinin nümayəndələri ilə görüşündə bu reallıqları bir daha diqqətə çatdırdı. Ərazi bütövlüyümüzün bərpasının əsas məsələ olduğunu önə çəkən dövlətimizin başçısı vurğuladı ki, hazırlıq dövrü çox çəkdi, bu da təbiidir. Çünki güc yığmalı, öz haqq işimizi beynəlxalq müstəvidə təsdiqləməli, Ermənistan dövlətinin hərbi cinayətləri haqqında məlumatı, Xocalı soyqırımı ilə bağlı həqiqətləri çatdırmalı idik və çatdırmışıq. Son illər ərzində bir çox beynəlxalq təşkilatlar məcburiyyət qarşısında ədalətli mövqeyimizi dəstəkləyən qərar və qətnamələr qəbul etmişdir. Bu, Ermənistan-Azərbaycan münaqişəsinin həllinin hüquqi əsasını təşkil etmişdir. Biz bir çox ölkələrlə sıx ikitərəfli, bir çox ölkələrlə strateji tərəfdaşlıq münasibətləri qurduq. Bu da beynəlxalq müstəvidə Azərbaycan həqiqətlərini, Qarabağ münaqişəsi həqiqətlərini çatdırmaq üçün imkan yaratmışdır. Heç kimdən asılı olmayan güclü iqtisadiyyat qurduq. Güclü ordu qurduq. Yəni hər gün, hər ay biz Qələbəyə doğru addımlayırdıq. Azərbaycan xalqı bilirdi ki, o gün uzaqda deyil”.
Malik Həsənov qeyd edib ki, bu gün bu Memorial Kompleksin timsalında Azərbaycan xalqının əyilməz ruhunu görürük: “30 il ərzində ədalətsizliklə üzləşən xalqımız öz mənliyini, ləyaqətini, inamını saxladı. Dövlətimizin başçısı İlham Əliyev bir daha bu çağırışı etdi ki, bu gün Azərbaycan dövləti o qədər güclüdür ki, heç kimin ağlına bizə qarşı hər hansı bir təxribat törətmək gəlməsin. Artıq Azərbaycan 1992-ci ilin Azərbaycanı deyil. Bu gün dövlətimiz güclü, özünü müdafiə etməyə qadir olan dövlətdir. Bu gün biz sülh içində yaşayırıq və bunun təminatçısı Azərbaycan dövlətidir, bizim siyasətimizdir”.