Xəbərlər
Bizim nümunəmiz öyrənilməlidir
Həbib Cəfərov
YAP Astara rayon təşkilatının sədri
Tarixi Zəfəri, suverenliyinin tam bərpası ilə dünyaya səs salan Azərbaycanın istər regionda, istərsə də dünyada nüfuzu durmadan artır. Prezident İlham Əliyevin yürütdüyü müdrik və uzaqgörən siyasət nəticəsində ölkəmiz beynəlxalq aləmdə etibarlı tərəfdaş kimi tanınır. Bunu dünya ölkələrinin, nüfuzlu beynəlxalq təşkilatların Azərbaycanla əməkdaşlıqda maraqlı olmaları da təsdiqləyir. Xarici siyasətimizin prioritet istiqamətlərindən olan ikitərəfli əlaqələrin inkişaf etdirilməsi istiqamətində əldə olunan uğurlar da diqqətdən kənarda qalmır. Daim sülhə, təhlükəsizliyə, əməkdaşlığa çağırışlar edən Azərbaycan yeni körpülərin qurulmasında maraqlı olmaqla yanaşı, ənənəvi tərəfdaşları ilə də əlaqələrini daha da möhkəmləndirir. Azərbaycan-Birləşmiş Ərəb Əmirlikləri münasibətləri bunun bariz nümunəsidir.
Dövlətimizin başçısı İlham Əliyev fevralın 2-də bu ölkəyə işgüzar səfər etdi. Ümumiyyətlə, hər iki ölkənin liderlərinin qarşılıqlı səfərləri dinamikliyi ilə diqqətdədir. Cənab İlham Əliyev bu səfər çərçivəsində BƏƏ Prezidenti Şeyx Məhəmməd bin Zayed Al Nəhyan və Müsəlman Ağsaqqalları Şurasının baş katibi Məhəmməd Əbdülsalam ilə görüşdü. Prezidentlərin görüşündə Azərbaycan-BƏƏ ikitərəfli əlaqələrinin strateji tərəfdaşlığa əsaslandığı vurğulanaraq, ölkələrimiz arasında əməkdaşlığın bütün sahələrdə, o cümlədən siyasi, iqtisadi, enerji, həmçinin bərpaolunan enerji, mədəni, humanitar və digər istiqamətlərdə inkişafından məmnunluq ifadə olundu, münasibətlərimizin genişlənməsində hər iki Prezidentin Azərbaycana və BƏƏ-yə qarşılıqlı səfərlərinin, görüşlərinin önəmi qeyd edildi.
Müsəlman Ağsaqqalları Şurasının baş katibi Məhəmməd Əbdülsalam isə dövlətimizin başçısını “Zayed İnsan Qardaşlığı Mükafatı”na layiq görülməsi münasibətilə təbrik etdi. Prezident İlham Əliyev təbrikə və yüksək mükafata görə minnətdarlığını bildirərək, Zayed Fondunun fəaliyyətini, xüsusilə Birləşmiş Ərəb Əmirliklərinin qurucusu Şeyx Zayed bin Sultan Al Nəhyanın humanitar irsinin və bəşəri dəyərlərinin dünyada təşviq edilməsində oynadığı mühüm rolu yüksək qiymətləndirdi.
Azərbaycan Prezidentinin bu mükafata layiq görülməsi, həmçinin Roma Papası XIV Leonun və Əl-Əzhər Şərifin şeyxi, böyük imam Əhməd Əl-Tayyibin Azərbaycan Prezidentinin sülhün bərqərar olunması istiqamətində fəaliyyətinə verdikləri qiymətin təcəssümü kimi dəyərləndirildi.
Səfər çərçivəsində “Zayed İnsan Qardaşlığı Mükafatı”nın təqdimolunma mərasimi keçirildi. Cənab İlham Əliyev mərasimdə çıxış edərək bildirdi ki, bugünkü mükafatlandırma mərasimi və hörmətli münsiflər heyəti ilə bütün dostlarımız tərəfindən səylərimizin qiymətləndirilməsi olduqca ruhlandırıcıdır: “Mən hesab edirəm ki, bizim nümunəmiz öyrənilməli və hələ də müharibə vəziyyətində olanlar üçün yol xəritəsi kimi istifadə edilməlidir. Bizim nümunəmiz göstərir ki, uzunmüddətli münaqişəyə, əzablara və qarşılıqlı etimadsızlığa baxmayaraq, sülh mümkündür. Hər iki tərəfdən güclü siyasi iradə mövcud olduğu və həmin proses dost ölkələr və beynəlxalq ictimaiyyət tərəfindən dəstəkləndiyi halda, sülh mümkündür”.
O da qeyd edildi ki, Əbu-Dabidə keçirilən bu mükafatlandırma mərasimi rəmzi məna daşıyır. Çünki Ermənistan ilə Azərbaycan arasında sonuncu danışıqlar raundu ötən ilin iyul ayında, tarixi Vaşinqton Sammitindən cəmi bir ay əvvəl məhz burada baş tutmuşdur. BƏƏ Prezidenti Şeyx Məhəmməd bin Zayed Al Nəhyanın dəstəyi ilə sülhün bərqərar olunması üçün son razılığa burada gəlindi və həmin razılıq daha sonra Vaşinqtonda rəsmiləşdirildi. Cənab İlham Əliyev Azərbaycan və Ermənistan arasında sülhün bərqərar olunmasına verdiyi töhfəyə görə Amerika Birləşmiş Ştatlarının Prezidenti Donald Trampa minnətdarlığını bildirdi. Vurğuladı ki, o, 2025-ci il avqustun 8-də üçtərəfli Zirvə Görüşünə ev sahibliyi etmişdir. Həmin Zirvə Görüşünün nəticəsi olaraq Ermənistan və Azərbaycan arasında sülh sazişi paraflanmış, həmçinin Birgə Bəyannamə imzalanmışdır. Prezident Tramp şahid qismində həmin sənədi də imzalamış və bununla da üç onillikdən artıq davam edən qanlı və ölümcül münaqişəyə son qoyuldu.
Dövlət başçısı İlham Əliyevin sözügedən mükafata layiq görülməsi Azərbaycanın dünyaya təqdim etdiyi sülh modelinə, ölkəmizin miltikultural dəyərlərin inkişafına verdiyi töhfələrə dəstəyin, yüksək qiymətin göstəricisidir. Azərbaycan regionda dayanıqlı inkişafa nail olmaq üçün Ermənistana sülh təklifini etdi, buna nail olmaq üçün səylər göstərdi və real nəticələr göz qabağındadır. Dövlətimizin başçısı İlham Əliyevin qeyd etdiyi kimi, altı ay münasibətlərimizin inkişafı baxımından çox mühüm oldu. Biz təkcə Azərbaycan ərazisindən Ermənistana yük daşımalarına qoyulmuş məhdudiyyətləri aradan qaldırmadıq, eyni zamanda, Ermənistana neft məhsullarının ixracına da başladıq. Hazırda ticarət əlaqələrimizi genişləndiririk.