Xəbərlər
“Azərbaycan dili: Konstitusiyamızın ruhu, milli kimliyimizin ifadəsi”
Noyabrın 12-də Yeni Azərbaycan Partiyası (YAP) Daşkəsən rayon təşkilatının və Daşkəsən Rayon İcra Hakimiyyətinin birgə təşkilatçılığı ilə “Konstitusiya və Suverenlik İli” çərçivəsində 12 Noyabr - Konstitusiya Gününə həsr olunan “Azərbaycan dili: Konstitusiyamızın ruhu, milli kimliyimizin ifadəsi” adlı tədbir keçirilib.
Əvvəlcə Ulu Öndər Heydər Əliyevin Daşkəsən şəhərinin mərkəzində ucaldılmış abidəsi ziyarət olunub, abidə önünə tər güllər düzülüb.
Tədbirdə Dövlət Himni səsləndirilib, Ümummilli Lider Heydər Əliyevin, Azərbaycanın ərazi bütövlüyü və suverenliyi uğrunda canından keçən şəhidlərin, eləcə də Gəncədən qalxaraq Gürcüstan ərazisində qəzaya uğrayan Türkiyə Hərbi Hava Qüvvələrinə məxsus yük təyyarəsində həlak olan hərbçilərin xatirəsi bir dəqiqəlik sükutla yad edilib.
Tədbirdə Daşkəsən Rayon İcra Hakimiyyətinin başçısı Orxan Abbasov, YAP Daşkəsən rayon təşkilatının sədri Meydanəli Yolçiyev, Daşkəsən Rayon Heydər Əliyev Mərkəzinin direktoru Nailə Məmmədova, Daşkəsən şəhər A.Mürsəlov adına 2 nömrəli tam orta ümumtəhsil məktəbinin Azərbaycan dili və ədəbiyyat müəllimləri Günay Mirzəzadə və Nigar Məmmədova çıxış ediblər.
Natiqlər Azərbaycan Respublikasının Konstitusiyasının müstəqil dövlət quruculuğunun hüquqi əsaslarını müəyyənləşdirdiyini, ölkədə insan hüquq və azadlıqlarının təminatında, idarəetmə sisteminin demokratik prinsiplər üzərində formalaşmasında mühüm rol oynadığını deyiblər. Qeyd olunub ki, Ümummilli Lider Heydər Əliyevin rəhbərliyi ilə 1995-ci ildə qəbul edilən Konstitusiya Azərbaycanın dövlətçilik tarixində dönüş nöqtəsi olub, milli suverenliyin, siyasi sabitliyin və hüquqi dövlətçiliyin bərqərar olmasına zəmin yaradıb.
Prezident İlham Əliyev bu sənədi dövrün tələblərinə uyğun inkişaf etdirərək qanunun aliliyinin təmin olunması istiqamətində ardıcıl islahatlar həyata keçirib.
Çıxışlarda qloballaşma şəraitində və süni intellekt dövründə Azərbaycan dilinin qorunması və istifadəsi məsələləri barədə də danışılıb.
Tədbirin sonunda “Heydər Əliyev və Azərbaycan dili” adlı sənədli film nümayiş etdirilib.
