YENİ AZƏRBAYCAN PARTİYASI

Yeni Azərbaycan Partiyası dünənin, bu günün və gələcəyin partiyasıdır!
ÜZVLƏRİN SAYI : 0
BİZƏ YAZIN

Xəbərlər

Misir Ermənistan-Azərbaycan münaqişəsinin beynəlxalq hüququn norma və prinsipləri əsasında həllini dəstəkləyir

Azərbaycanın xarici işlər naziri Elmar Məmmədyarov Misirin ölkəmizdə yeni təyin olunmuş səfiri xanım Suzan Mouh Cəmil ilə görüşüb.

Xarici İşlər Nazirliyinin mətbuat xidmətindən verilən məlumata görə, səfir Suzan Mouh Cəmil etimadnaməsinin surətini nazir E.Məmmədyarova təqdim edib.

Görüşdə Azərbaycan ilə Misir arasında tarixi və ənənəvi dostluq əlaqələrinin olduğu qeyd edilib, birgə səylərlə iqtisadiyyat, elm, təhsil, enerji, kənd təsərrüfatı, turizm və digər sahələrdə əməkdaşlığın genişləndirilməsinin vacibliyi vurğulanıb. Hökumətlərarası birgə əməkdaşlıq komissiyasının fəaliyyətinin və iki ölkə arasında birbaşa hava uçuşlarının ikitərəfli iqtisadi-ticarət və turizm əlaqələrinin inkişafına mühüm töhfə verəcəyi vurğulanıb.

Söhbət zamanı beynəlxalq təşkilatlar çərçivəsində iki ölkə arasında qarşılıqlı dəstəyin və əlaqələndirmənin vacibliyi ifadə olunub, bu xüsusda BMT, İslam Əməkdaşlıq Təşkilatı, Qoşulmama Hərəkatı və digər təsisatlar qeyd olunub.

E.Məmmədyarov Ermənistan-Azərbaycan münaqişəsinin həlli üzrə danışıqlar prosesi haqqında məlumat verərək, BMT Təhlükəsizlik Şurasının münaqişə ilə əlaqədar qəbul etdiyi dörd qətnamənin tələblərinin Ermənistan tərəfindən hələ də yerinə yetirilmədiyini diqqətə çatdırıb. Beynəlxalq hüquq və BMT Nizamnaməsinə əsasən kimin təcavüzkar, kimin isə təcavüz və işğala məruz qalan ölkə olmasının aydın şəkildə müəyyən olunduğunu deyən nazir münaqişə ilə əlaqədar beynəlxalq ictimaiyyətin mövqeyinin də birmənalı xarakter daşımalı olduğunu vurğulayıb. Azərbaycanın hər bir halda beynəlxalq səviyyədə tanınmış sərhədləri daxilində ərazi bütövlüyü və suverenliyinin təmin olunacağını qeyd edən nazir ölkəmizin BMT nizamnaməsinin 51-ci maddəsində nəzərdə tutulmuş hüququndan da istifadə etmək iqtidarında olduğunu nəzərə çatdırıb. O, münaqişənin həlli ilə əlaqədar Azərbaycanın qəti mövqeyinin BMT Baş Məclisinin 70-ci sessiyasının ümumi müzakirələr hissəsində beynəlxalq ictimaiyyətin diqqətinə çatdırıldığını deyib.

Görüş zamanı səfir ölkəmizdə keçirilmiş birinci Avropa Oyunlarının möhtəşəm təşkil edilməsi münasibətilə Azərbaycan xalqını təbrik edib. Diplomatik fəaliyyəti müddətində tarixi dostluq əlaqələri ilə bağlı olan Azərbaycan və Misir arasında siyasi, iqtisadi, ticarət, elm, təhsil və digər sahələrdə əməkdaşlığın inkişafı üçün səylərini əsirgəməyəcəyini bildirib.

Səfir Misirin beynəlxalq hüququn norma və prinsipləri, BMT Nizamnaməsi və BMT Təhlükəsizlik Şurasının müvafiq qətnamələri əsasında Ermənistan-Azərbaycan münaqişəsinin danışıqlar yolu ilə həllini dəstəklədiyini diqqətə çatdırıb.

Görüşdə Yaxın Şərq və Şimali Afrika regionunda cərəyan edən proseslər barədə də fikir mübadiləsi aparılıb.

Nazir Elmar Məmmədyarov səfir Suzan Mouh Cəmilə diplomatik fəaliyyətində uğurlar diləyib.