Xəbərlər
Azərbaycan əsas və etibarlı tərəfdaş kimi
Əlişah Rəcəbov
YAP Ağdaş rayon təşkilatının sədri
Ölkəmiz müasir nəqliyyat-logistika infrastrukturuna malikdir. Bu isə Prezident İlham Əliyevin uzaqgörən siyasəti nəticəsində mümkün olmuşdur. Azərbaycanda yaradılan müasir nəqliyyat-logistika infrastrukturu həmçinin beynəlxalq nəqliyyat şəbəkələrinə inteqrasiya olunub. Azərbaycan reallaşdırdığı nəhəng infrastruktur layihələri ilə Avropa ilə Asiya arasında vazkeçilməz nəqliyyat qovşağına və tranzit mərkəzinə çevrilməkdədir. Şərq-Qərb dəhlizi Avropa ilə Asiya arasında ən qısa, təhlükəsiz və iqtisadi baxımdan səmərəli bağlantı olaraq Avrasiya məkanında sərnişin və nəqliyyat daşımalarının gücləndirilməsinə böyük töhfə verəcək. Azərbaycanın Avropa, eyni zamanda, Asiya, xüsusilə də Mərkəzi Asiya ölkələri ilə çox yaxşı münasibətlərə malik olması Orta Dəhliz layihəsinin önəmini artıran əsas amillərdəndir.
Azərbaycanın çox yaxşı müasibətləri olan Mərkəzi Asiya dövlətlərindən biri isə Tacikistandır. Ölkələrimiz arasında diplomatik münasibətlər 1992-ci il mayın 29-da qurulub. 2007-ci ildə Azərbaycanın Tacikistanda, bir il sonra isə Tacikistanın Azərbaycanda səfirliyi fəaliyyətə başlayıb. İki ölkə arasında ümumilikdə 57 sənəd, o cümlədən 2007-ci il martın 15-də “Azərbaycan Respublikası və Tacikistan Respublikası arasında dostluq və əməkdaşlıq haqqında Müqavilə” imzalanıb. Cari ildə də ölkələrimiz arasında bir sıra memorandumlar imzalanmışdır. Bu memorandumlar “Azərbaycan Sahibkarlar Konfederasiyası və Tacikistanın Ticarət və Sənaye Palatası arasında əməkdaşlığa dair”, “Azərbaycanda Qadın Sahibkarlığın İnkişafı Assosiasiyası İctimai Birliyi və Tacikistan İş Qadınlarının Milli Assosiasiyası arasında əməkdaşlığa dair”, “Azərbaycan Beynəlxalq Mədən Şirkəti və Tacikistanın Talco Management şirkəti arasında əməkdaşlığa dair” və “AzərTürk Bank və Аmonatbonk arasında anlaşma memorandumu”dur.
Ölkələrimizin parlamentlərarası əlaqələri də yüksək səviyyədədir. Belə ki, Azərbaycan Respublikasının Milli Məclisində Azərbaycan-Tacikistan parlamentlərarası əlaqələr üzrə işçi qrupu fəaliyyət göstərir. Tacikistan Respublikasının Ali Məclisinin hər iki palatasında Azərbaycanın Milli Məclisi ilə parlamentlərarası dostluq və əməkdaşlıq qrupu mövcuddur. Bundan başqa, iki ölkə arasında elm və təhsil sahəsində də münasibətlər mühüm yer tutur. 2014-cü ildə Azərbaycan Respublikasının Prezidenti İlham Əliyevə Tacikistan Milli Universitetinin Fəxri Doktoru diplomu təqdim olunub. 2018-ci il avqustun 11-də Azərbaycanda rəsmi səfərdə olan Tacikistan Respublikasının Prezidenti Emoməli Rəhmona ADA Universitetinin fəxri doktoru diplomu təqdim edilib. Azərbaycan Dövlət Aqrar Universiteti ilə Ş.Şotemur adına Tacikistan Dövlət Aqrar Universitetinin əməkdaşlığı çərçivəsində müəllim və tələbələrin mübadiləsi həyata keçirilir.
Ölkələrimiz arasında birgə ticarətin inkişaf dinamikası da artan xəttlə inkişaf edir. Belə ki, 2022-ci ildə Azərbaycanın Tacikistan ilə ticarət dövriyyəsinin həcmi 5,95 milyon ABŞ dolları olub. 2023-cü ilin yanvar-fevral ayları üzrə ticarət dövriyyəsi isə 824,59 min ABŞ dolları təşkil edib. Tacikistandan Azərbaycana 4,4 milyon dollar, Azərbaycandan Tacikistana isə 1,5 milyon dollar investisiya qoyulub.
Prezident İlham Əliyev cari ildə qardaş Tacikistana iki dəfə səfər edib. 14 sentyabr tarixində Düşənbədə Mərkəzi Asiya Dövlət Başçılarının 5-ci Məşvərət görüşündə Prezident İlham Əliyevin fəxri qonaq qismində iştirak və çıxış etməsi də məhz ölkəmizin Tacikistan, ümumilikdə Mərkəzi Asiya ölkələri ilə olan çox yaxşı münasibətlərinin göstəricilərindəndir.