Xəbərlər
Qəhrəman Vətən övladlarının xatirəsi unudulmazdır!
Ağstafa rayonunda Vətən müharibəsi şəhidi Quliyev Rusif Asim oğlunun 33-cü doğum günündə əziz xatirəsi yad olunub.
Yeni Azərbaycan Partiyası Ağstafa (YAP) rayon təşkilatının sədri Etibar Hacıyev, Ağstafa Rayon İcra Hakimiyyəti başçısı Aparatının Vətən müharibəsi iştirakçıları və şəhid ailələri ilə işin təşkili şöbəsinin müdiri Ariz Qədiməliyev, “Ağstafa Gənclər evi” sosial xidmət müəssisəsinin direktoru Nicat Vəkilov və müəssisənin əməkdaşı Əlövsəd Allahyarov, şəhid ailələri, partiya fəalları və rayon ictimaiyyətinin nümayəndələri şəhidin məzarını ziyarət edib, önünə gül dəstələri düzüb və ruhuna dualar oxuyublar.
Tədbir çərçivəsində şəhidimizlə eyni məzarlıqda uyuyan Vətən müharibəsi şəhidləri Cəlilov Xaləddin Asəf oğlunun və Cəfərov İbrahim Şamil oğlunun da məzarları ziyarət olunub, məzarları önünə gül dəstələri düzülərək əziz xatirələri yad edilib.
Daha sonra tədbir iştirakçıları şəhid Rusif Quliyevin ailə üzvlərinə baş çəkib, onların qayğıları ilə maraqlanıblar, dərin hüznlə başsağlığı veriblər. Söhbət zamanı şəhidimizin keçdiyi şərəfli həyat və döyüş yolundan geniş bəhs edilib.
Şəhidin ailəsi dövlət səviyyəsində onlara göstərilən diqqət və qayğıya görə Prezident İlham Əliyevə və Birinci vitse-prezident Mehriban xanım Əliyevaya öz minnətdarlıqlarını bildiriblər.
Qeyd edək ki, Rusif Quliyev 2020-ci il noyabr ayının 5-də Vətən müharibəsi döyüşlərində şəhidlik zirvəsinə yüksəlib. Prezident İlham Əliyevin müvafiq sərəncamlarına əsasən o, ölümündən sonra “Vətən uğrunda”, “Şuşanın azad olunmasına görə” və “Hərbi xidmətlərə görə” medalları ilə təltif edilib.
