Xəbərlər
Ulu Öndər idarəetmənin ustadı və siyasətin kamil bilicisi idi
Sevinc Qasımova
Yeni Azərbaycan Partiyası Gənclər Birliyinin sədr müavini
29 il bundan əvvəl, yəni 1993-cü ilin may-iyun aylarında ölkədə xaos və anarxiya özünün pik həddinə çatmışdı. Vətəndaş müharibəsi və müstəqilliyin itirilməsi təhlükəsi yaranmışdı. Dövlətin idarəetmə strukturları faktiki olaraq iflic olmuşdu. Belə bir vəziyyətdə müdrik və qədirbilən Azərbaycan xalqı ümummilli lider Heydər Əliyevin yenidən hakimiyyətə gətirilməsi tələbini irəli sürdü. Ölkənin o dövrdəki rəhbərliyi onu Bakıya dəvət etməyə məcbur oldu. Çünki o zamankı rəhbərlik özünün yaratdığı mürəkkəb durumdan çıxmağı bacarmırdı.
1993-cü ilin iyunun 9-da Heydər Əliyev Naxçıvandan Bakıya gəldi. 15 iyun tarixində Heydər Əliyev xalqın təkidli tələbi ilə Azərbaycan Respublikası Ali Sovetinin sədri seçildi. Həmin gün parlamentin tarixi iclasında Heydər Əliyev çıxış edərək bildirdi ki, Azərbaycan Respublikasının həmin dövrdəki ağır, mürəkkəb və gərgin vəziyyətini tam məsuliyyətlə dərk edir: “Bu vəzifəni üzərimə götürərək öz məsuliyyətimi anlayıram və bunların hamısını rəhbər tutaraq əlimdən gələni edəcəyəm. Ali Sovetin sədri kimi Azərbaycan xalqının tarixi nailiyyəti olan Azərbaycan Respublikasının dövlət müstəqilliyini qorumağı, möhkəmləndirməyi, inkişaf etdirməyi özüm üçün əsas vəzifələrdən biri hesab edirəm.
Elə həmin gündən başlayaraq Azərbaycan Respublikasının dövlət müstəqilliyi 1918-ci ildə yaranmış ilk Azərbaycan Demokratik Respublikasının ənənələri əsasında, müasir tələblərlə, dünyada gedən proseslərlə bağlı olaraq təmin edilməyə başladı. Ulu öndər bu sahədə daim çalışaraq ömrünün ondan sonrakı hissəsini, harada olursa-olsun yalnız və yalnız Azərbaycan Respublikasının müstəqil dövlət kimi inkişaf etməsinə həsr etdi. Elə həmin tarixdən başlayaraq Azərbaycan Respublikası bütün bəlalardan alnıaçıq çıxdı. Ən əsası, ulu öndərin də söylədiyi kimi müstəqilliyini itirmədi. Yenidən heç bir dövlətin tərkibinə daxil olmadı. Heç bir başqa dövlətin əsarəti altına düşmədi.
Həmin mürəkkəb tarixi-siyasi dövrün iştirakçıları və şahidləri də yaxşı xatırlayır ki, Ulu Öndər Heydər Əliyev Ali Sovetin sədri kimi ilk gündən parlamentarizm ənənələrinə sadiq qalaraq aşkarlıq prinsipinə üstünlük verdi. Milli Məclisin iclasları, mətbuat konfransları, respublika əhəmiyyətli müşavirələr birbaşa yayımla televiziya ekranlarında yayımlandı. Ölkədəki vəziyyət olduğu kimi xalqa çatdırıldı. İctimai-siyasi həyatdakı gərginliyin aradan qaldırılması üçün lazımi tədbirlər görülməyə başlandı. Heç şübhəsiz ki, bu ədalətin və milli iradənin təntənəsi idi. Eyni zamanda, parlamentin 24 iyun tarixli iclasında Milli Məclis Prezident səlahiyyətlərinin Ali Sovetin sədri Heydər Əliyevə verilməsi barədə qərar qəbul etdi. Bu, artıq bütün hadisələrin dövlətin nəzarəti altına götürülməsi, xalqın iradəsinə tabe edilməsi anlamına gəlirdi.
Ölkənin Ermənistanla müharibə şəraitində olduğu, daxildə siyasi parçalanmaların, tuğyan etdiyi bir dövrdə ulu öndər cəmi 4 ay Ali Sovetin sədri vəzifəsində çalışsa da, bu qısa müddətdə parlamentin ruhunu kökündən dəyişdi. Milli Məclisə siyasi mədəniyyət gətirdi. Onun iclası aparmaq tərzi, fikirlərini dəqiq əsaslandırması, çıxışların məğzini tutmaq bacarığı, qiymətli fikirləri ümumiləşdirmək qabiliyyəti yeni bir yanaşma idi. Eyni zamanda, bütün bunlar özlüyündə parlamentin üzvləri üçün yeni bir örnək, əsl parlamentarizm məktəbi sayılmalıdır.
1993-cü ilin 15 iyunundan başlayan böyük siyasi kursun icrası nəticəsində kiçik bir ölkə Heydər Əliyevin uğurlu siyasəti sayəsində qısa müddət ərzində dünyada tanınan nüfuzlu bir dövlətə çevrildi. Qısa müddət ərzində müstəqil Azərbaycan Respublikasının xarici siyasətində böyük dönüş yarandı. Eləcə də böyük uğurlar əldə olundu. Dünyanın aparıcı dövlətləri və beynəlxalq təşkilatları Azərbaycana ciddi diqqət yetirməyə başladı və ölkəmiz beynəlxalq münasibətlər sisteminin suveren aktoruna çevrildi. Respublikamızda cinayətkarlıq və hüquq pozuntularına qarşı barışmaz mübarizə elan edildi. Ümummilli Lider hakimiyyətə gəlişinin ilk illərindən etibarən ölkədə ictimai-siyasi sabitliyin bərpası istiqamətində gərgin iş apardı. Ölkədəki qeyri-qanuni silahlı dəstələr zərərsizləşdirildi. Respublikamızın sosial-iqtisadi yüksəlişinə yol açan ən mühüm amil kimi cəmiyyətdə ictimai-siyasi sabitlik bərqərar edildi.
Ulu Öndər fəaliyyət göstərdiyi bütün sahələrdə özünü məhz birinci şəxs kimi, lider kimi təsdiq edib. O, idarəetmənin ustadı və siyasətin kamil bilicisi idi. Şəxsiyyətlərin gücü, siyasi iradəsi və müdrikliyi mənsub olduğu xalqın, onun yaratdığı dövlətin həyatında əvəzedilməz rola malikdir. Məhz ulu öndər Heydər Əliyev də güclü xarizmatik şəxsiyyət, fenomenal siyasətçi və dövlət xadimi idi.