Xəbərlər
"20 Yanvar faciəsi tariximizin şərəf və qəhrəmanlıq səhifəsidir" mövzusunda tədbir keçirilib
19 yanvar 2022-ci il tarixdə YAP Yevlax rayon təşkilatının, Dini Qurumlarla İş üzrə Dövlət Komitəsinin Yevlax bölgəsi üzrə şöbəsinin birgə təşkilatçılığı ilə "20 Yanvar faciəsi tariximizin şərəf və qəhrəmanlıq səhifəsidir" mövzusunda rayonda fəaliyyət göstərən bir sıra idarə, müəssisə, təşkilatların rəhbərləri və nümayəndlərinin iştirakı ilə tədbir keçirilib.
Tədbiri giriş sözü ilə açan YAP Yevlax rayon təşkilatının məsul əməkdaşı Rafiq Əliyev ölkəmizin ərazi bütövlüyü uğrunda öz canlarından keçərək şəhid olmuş qəhrəmanlarımızın əziz xatirəsini anaraq, onlara Allahdan rəhmət diləyib. Bildirib ki, 20 yanvar hadisələrindən 32 il keçməsinə baxmayaraq xalqımız öz şanlı tarixinə qəhrəmanlıq səhifəsi kimi daxil olan bu günü heç zaman unutmur. Qanlı yanvar hadisələrinin Azərbaycan xalqının azadlıq uğrunda mübarizliyini təcəssüm etdirdiyini söyləyən R.Əliyev Sovetlər birliyinin xalqımızın müstəqillik əzmini qıra bilmədiyini, xalqımızın bu haqlı mübarizəsinin Ali Baş Komandan cənab İlham Əliyevin peşəkar rəhbərliyi ilə Azərbaycan Ordusunun rəşadəti hesabına 44 günülk Vətən müharibəsində möhtəşəm Qələbə ilə sonlandığını və bununlada şəhidlərin qanının yerdə qalmadığını vurğulayıb.
Sonra 20 yanvar hadisələrindən bəhs edən videoçarx nümayiş olunub.
Çıxış edən DQİDK-nin Yevlax bölgəsi üzrə şöbənin müdiri Natiq Əfəndiyev 20 Yanvar faciəsini Azərbaycan xalqının çoxəsrlik zəngin tarixinin ağır, qanlı faciəsi ilə yanaşı, həm də şanlı qəhrəmanlıq səhifəsi olduğunu vurğulayaraq, bu günün xalqın yaddaşında “Qəhrəmanlıq Günü” kimi yazıldığını bildirib. Qeyd edib ki, xalqımızın mübarizliyini, qorxmazlığını, cəsarətini bir daha bütün dünyaya nümayiş etdirən qanlı 20 Yanvar hadisələrindən uzun tarixi dövrün keçməsinə baxmayaraq, vətənimizin azadlığı və müstəqilliyi yolunda canlarını qurban vermiş oğul və qızlarımızın əziz xatirəsi, onların qanları ilə yazdıqları qəhrəmanlıq dastanı xalqımızın qəlbimizdə əbədi yaşayacaqdır. N.Əfəndiyev ilk dəfə bu qanlı hadisələrə hüquqi qiymətin Azərbaycan xalqının Ümummilli Lideri Heydər Əliyev tərəfindən verildiyini diqqətə çatdırıb.
Tədbirdə çıxış edənlər 20 yanvar hadisələrinin şahidi olmuş Cahid Nəbiyev, Kövər kənd məktəbinin direktoru Sevda Kərimova, Bərdə Regional Mədəniyyət İdarəsinin Yevlax üzrə nümayəndəsi Rafiq Məmmədov və “Yevlax Gənclər Evi” sosial xidmət müəssisəsinin direktoru Elgün Əzizov xalqımızın başına gətirilən müsibətli yanvar hadisələrindən geniş söhbət açaraq bildirdilər ki, 20 yanvar hadisələri xalqın müstəqillik, azadlıq əzmini qırmaq üçün törədilsə də bu istəklər baş tutmadı və qısa zaman sonra Azərbaycan xalqı öz dövlət müstəqilliyini bərpa etdi.
