YENİ AZƏRBAYCAN PARTİYASI

Yeni Azərbaycan Partiyası dünənin, bu günün və gələcəyin partiyasıdır!
ÜZVLƏRİN SAYI : 0
BİZƏ YAZIN

Xəbərlər

Yeni Azərbaycan Partiyasının Gəncədən olan 4 namizədinin gənclərlə görüşü keçirilib

VI çağırış Azərbaycan Respublikasının Milli Məclisinə seçkilərin təbliğat kampaniyası çərçivəsində Yeni Azərbaycan Partiyası tərəfindən Gəncənin 4 seçki dairəsi üzrə namizədliyi irəli sürülmüş Naqif Həmzəyevin, Pərvin Kərimzadənin, Musa Quliyevin və Müşfiq Cəfərovun gənc seçicilərlə görüşü keçirilib.

Görüşü giriş nitqi ilə açan Yeni Azərbaycan Partiyası Mərkəzi Seçki Qərargahının Gəncə şöbəsinin sədri, YAP Gəncə şəhər təşkilatının sədri Naqif Həmzəyev ölkəmizdə gənclərin hərtərəfli inkişafı, onların düzgün yetişdirilməsi, milli-mənəvi dəyərlərə sadiqlik və vətənpərvərlik ruhunda tərbiyəsi Prezident İlham Əliyev tərəfindən daim diqqət mərkəzində saxlanıldığını bildirib. Naqif Həmzəyev qeyd edib ki, prioritet istiqamət olaraq müəyyən edilən gənclər siyasəti öz növbəsində ölkədə könüllülük hərəkatının geniş vüsət almasına şərait yaratdı: “2020-ci ilin ölkəmizdə “Könüllülər ili” elan edilməsi insanların sülhsevərlik, xeyirxahlıq kimi ümumbəşəri dəyərlər ətrafında birləşməsinə, Azərbaycanın parlaq gələcəyinin təminatçısı olan gənclərin dövlətə, Vətənə bağlı, məsuliyyətli bir vətəndaş kimi formalaşmasına, uğurla həyata keçirilən gənclər siyasətinə yeni nəfəs verəcək”.

AMEA Gəncə Bölməsinin akademik katibi Fuad Əliyev çıxış edərək,ölkə gənclərinin hər zaman diqqət və qayğı ilə əhatə olunduğunu, onların cəmiyyətdə layiqli təmsil olunması istiqamətində mühüm islahatların həyata keçirildiyini bildirib. Fuad Əliyev bütün gəncləri həmyaşıdları olan Yeni Azərbaycan Partiyasının namizədlərinə səs verməyə çağırıb.

40 saylı Kəpəz ikinci (Gəncə) seçki dairəsindən deputatlığa namizəd Musa Quliyev bu günün gənclərinin yüksək potensiala, intellektə malik olduğundan, ölkənin inkişafında, tərəqqisində yaxından iştirak etdiklərindən danışıb, onları qarşıdan gələn Milli Məclisə seçkilərdə “Daha güclü Azərbaycan naminə” şüarı ilə seçkilərə qatılan Yeni Azərbaycan Partiyasının namizədlərinə səs verməyə çağırıb.

37 saylı Nizami birinci (Gəncə) seçki dairəsindən fevralın 9-da Milli Məclisə keçiriləcək seçkilərda deputatlığa namizəd Pərvin Kərimzadə gənc seçiciləri salamlayaraq, bir pedoqoq kimi gənclərlə sıx ünsiyyətdə olduğunu diqqətə çatdırıb. Pərvin Kərimzadə Prezident İlham Əliyevin daim diqqət və qayğısını öz üzərlərində hiss edən gənclərin, əvvəlki seçkilərdə olduğu kimi parlament seçkilərində də böyük fəallıq və coşqu nümayiş etdirəcəklərinə, bu siyasi kampaniyanın yüksək səviyyədə keçirilməsinə nail olacaqlarına əmin olduğunu bildirib.

39 Saylı Kəpəz birinci (Gəncə) seçki dairəsindən deputatlığa namizədliyi irəli sürülən Müşfiq Cəfərov ölkədə həyata keçirilən bütün proseslərdə gənclərin yaxından iştirakının dövlətin onlara olan inamından və etibarından irəli gəldiyini vurğulayıb. Hər zaman gənclərin təkliflərini, təşəbbüslərini dəstəkləməyə hazır olduğunu diqqətə çatdıran Müşfiq Cəfərov seçicilərin etimadını qazanaraq millət vəkili seçilərsə bu etimadı layiqincə doğruldacağını qeyd edib.

Gənclərdən Nərmin Əliyeva, Valeh Əsədov, Ruslan Vəliyev Əli Tağıyev və digərləri çıxış edərək, qarşıdan gələn Milli Məclisə seçki prosesində üzərlərinə düşən vəzifələrin öhdəsindən layiqincə gələcəklərini, “Daha güclü Azərbaycan naminə” şüarı ilə seçkilərə qatılan Yeni Azərbaycan Partiyasının namizədlərinə səs verəcəklərini bildiriblər.

Yüksək əhval-ruhiyyə ilə keçən görüş gənc seçicilərin Yeni Azərbaycan Partiyasının namizədləri ilə xatirə şəkili çəkdirilməsi ilə başa çatıb.