Xəbərlər
Fəzail İbrahimli: 18 oktyabr 1991-ci il Azərbaycan tarixində mühüm yer tutur
«18 oktyabr 1991-ci il Azərbaycan tarixində mühüm yer tutur». Bu fikri Milli Məclisin deputatı, tarix elmləri doktoru Fəzail İbrahimli deyib.
F.İbrahimli bildirib ki, xalqımız tarix boyu çətinliklərlə, faciələrlə üzləşib. Onun sözlərinə görə, bu çətinliklər onu azadlıq mübarizəsindən döndərə bilməyib.
«XX əsrin əvvəlində qazandığımız müstəqilliyimizi itirsək də, əsrin sonunda yenidən onu qazanmaq imkanımız oldu. Təbii ki, müstəqilliyimizin bərpasına gedən yol heç də asan başa gəlmədi. Bu, yaxın tariximiz olduğu üçün hər kəs hansı ağrılı-acılı məqamların yaşandığını yaxşı bilir. Ən əsas problem odur ki, torpaqlarımız Ermənistan tərəfindən işğal olunub, 1 milyondan çox insan məcburi köçkün vəziyyətinə düşüb. Amma bu gün Azərbaycan güclü dövlətdir və onun müstəqilliyinin dönməzliyi təmin edilib. İnanırıq ki, güclənən Azərbaycan öz torpaqlarını işğalçılardan azad edəcək»- deyə, deputat qeyd edib.