Xəbərlər
Qobustanda prezidentliyə namizəd İlham Əliyevin təbliğat-təşviqat kampaniyası uğurla davam edir
Qobustanda prezidentliyə namizəd İlham Əliyevin təbliğat-təşviqat kampaniyası davam edir.
Qobustanlılar ölkənin tərəqqisini məhz cənab İlham Əliyevin Azərbaycana rəhbərliyində görürlər. Ötən gün Qobustan rayonunun Qurbançı kəndində Yeni Azərbaycan Partiyası Mərkəzi Seçki Qərargahı Qobustan rayon şöbəsinin tərtib olunmuş qrafikinə uyğun olaraq seçicilərlə görüş keçirilib.
Tədbiri YAP Mərkəzi Seçki Qərargahı Qobustan rayon şöbəsinin və partiyanın rayon təşkilatının sədri Füzuli Gülaliyev açaraq cənab İlham Əliyevin 15 illik fəaliyyətindən, bütün sahələrdə sosial-iqtisadi inkişafdan, siyasi sabitlikdən, ulu öndər Heydər Əliyev dühasından bəhrələnən bugünkü qüdrətli Azərbaycandan, sabahkı firavan gələcəyimizə hesablanan ardıcıl siyasətdən danışıb. F.Gülaliyev regionların sosial-iqtisadi inkişafından danışaraq qeyd edib ki, Qobustan rayonu da gündən-günə böyüyür, abadlaşır, regionda abad guşələrdən birinə çevrilir.
Görüşdə çıxış edən təbliğat qrupunun üzvü Yusif Quliyev əminliklə bildirib ki, ölkəmizin dünyada nüfuzunun artması cənab İlham Əliyevin qətiyyətinin nəticəsidir.
Çıxış edən YAP fəallarından Ənvər Əsədov qobustanlıları bu seçkidə də düzgün seçim edərək cənab İlham Əliyevə səs verməyə səsləyib: «Cənab Prezidentin ötən illərdə önəm verdiyi bütün sahələrin hərtərəfli inkişafı, ölkənin iqtisadi və siyasi sferasının möhkəmlənməsini təmin etməsi üçün bir daha ölkəmizin qüdrətli olması üçün məhz yenidən cənab İlham Əliyevə səs verməlıyik.»
Tədbirdə çıxış edən Cəmşid Səftərov, Rafiq Vəliyev, Ağasəf İsgəndərov və digərləri birmənalı şəkildə bildiriblər ki, 11 aprel 2018-ci ildə seçki məntəqələrinə gələrək güclü dövlət, xoşbəxt gələcək naminə cənab İlham Əliyevə səs verəcəklər.
